ސްޕެނިޝް ސުޕަކަޕް ސައޫދީގައި ކުޅެން ޕީކޭ އަށް 25 މިލިއަން ޑޮލަރު
ސްޕޭން ފެޑަރޭޝަނުގެ ފަރާތުން މި ފައިސާ ޕީކޭ އަށް ދީފައިވަނީ ސައޫދީ ފެޑަރޭޝަނުން
ޕީކޭ ބާސެލޯނާގެ ކޮންޓްރެކްޓެއްގައި ސޮއިކުރަނީ
ސްޕެނިޝް ސުޕަކަޕް ސައޫދީ އަރަބިއްޔާގައި ކުޅެން ޖެރާޑް ޕީކޭގެ ކުންފުނި ކޮސްމޯސް އަށް 25 މިލިއަން ޑޮލަރު ދިންކަން ޔަގީންވެއްޖެ އެވެ.
މި ފައިސާ އަކީ ހަތަރު ޓީމު ވާދަކުރާ ތިން މެޗުގެ ސުޕަކަޕް ސައޫދީގައި ކުޅެން ފުރުސަތު ހޯދައިދިނުމުގެ ބަދަލެއްގެ ގޮތުން ޕީކޭގެ ކުންފުންޏަށް ސްޕޭން ފުޓްބޯޅަ ފެޑަރޭޝަނުން ދީފައިވާ ފައިސާ އެވެ. ކުރިން ހީކުރެވިފައި އޮތީ މި ފައިސާ ދިނީ ސްޕެނިޝް ފުޓްބޯޅަ ފެޑަރޭޝަނުން ކަމަށެވެ. ނަމަވެސް ޕީކޭއާއި ސްޕޭނުގެ މީޑިޔާތަކުން ކުރި ސުވާލުތަކަށް އޭނާދިން ޖަވާބުތަކުން އެނގުނީ ސްޕޭން ފުޓްބޯޅަ ފެޑަރޭޝަނުގެ ފަރާތުން މި ފައިސާ ދީފައިވަނީ ސައޫދީ އަރަބިއްޔާއިން ކަމަށެވެ.
މި ޑީލަކީ ސްޕެނިޝް ސުޕަކަޕް ކުޅޭނެ ރަނގަޅުތަނެއް ހޯދުމަށް ސްޕޭން ފެޑަރޭޝަނުން ޕީކޭގެ ކުންފުންޏަށް ދީފައިވާ ޑީލެކެވެ. އެއިރު ސްޕޭން ފެޑަރޭޝަނުގައި ހުރީ ދާދި ފަހުން އިސްތިއުފާދިން ލުއިސް ރުބިއަލެސް އެވެ. އަދި މީގެ ތިން އަހަރު ކުރިން މި ޑީލް ދިންއިރު ޕީކޭ އަކީ ބާސެލޯނާގެ ކުޅުންތެރިއެކެވެ. މިހެންވެ މި ޑީލުން ބާސެލޯނާ އަށް 8 މިލިއަން ޑޮލަރު ލިބުނު ކަމަށްވެސް ސްޕޭނުގެ ނޫސްތަކުން ބުނެ އެވެ.
ސްޕޭނުގެ މީޑިޔާތަކުން މިކަމުގެ އަޑި ހޯދަން މަސައްކަތް ކުރަން ފަށާފައިވާއިރު ޔަގީންވާ ކަމަކީ ސުޕަކަޕް ސައޫދީގައި ކުޅެގެން ސްޕޭނުގެ ފެޑަރޭޝަނަށް އަހަރަކު 45 މިލިއަނަށްވުރެ ގިނަ ޑޮލަރު ލިބޭކަމެވެ. އަދި މުބާރާތުގައި ކުޅޭ ކުލަބުތަކަށް ވެސް ކުރިން ލިބޭ ފައިސާއަށްވުރެ ގިނަ ފައިސާ ލިބެ އެވެ. މިހެންވެ ކަމިޝަންގެ ގޮތުގައި ޕީކޭ އަށް ކިތަންމެ ގިނަ ފައިސާއެއް ލިބިފައިވިޔަސް މިއީ ބޮޑު މައްސަލައަކަށް ނުވާނެ ކަމަށް ދެކޭ މީހުން މަދެއްނޫނެވެ.
