މެޗުގެ ފުރިހަމަ ވަގުތު ނަތީޖާ އެއްވަރުވުމުން, ނަތީޖާ ނެރުމަށް ކުޅުނު އިތުރު ވަގުތުގެ ދެހާފްގައި ލަނޑު ޖަހައިގެން ސްޕެނިޝް ސުޕަރ ކަޕްގެ ފައިނަލުން ރެއާލް މެޑްރިޑް ޖާގަ ހޯދައިފިއެވެ.

އެތްލެޓިކޯ މެޑްރިޑާ ވާދަކުރި ސެމީފައިނަލް މެޗުގެ 90 މިނިޓް ނިމުނީ 3-3 ން ދެޓީމް އެއްވަރު ވެގެންނެވެ. ނަމަވެސް ނަތީޖާ ނެރުމަށް ކުޅުނު އިތުރު ވަގުތުގައި ރެއާލް އިން ވަނީ އިތުރު ދެ ލަނޑު ޖަހައިގެން މޮޅުވެ ފައިނަލުން ޖާގަ ހޯދާފައެވެ. މެޗު ރެއާލް މެޑްރިޑުން ކާމިޔާބުކުރީ 5-3 ނެވެ. މެޗު ފަށައިގެން ހަވަނަ މިނިޓްގައި ކުރިހޯދީ އެތްލެޓިކޯ މެޑްރިޑުންނެވެ. އެއީ ހާމޯސޯ ބޮލުން ޖެހި ގޯލުންނެވެ. ބޮލުން ގޯލު ޖަހާ ރެއާލް އަށް ނަތީޖާ ހަމަހަމަ ކޮށްދިނީ ޑިފެންޑަރ ރުޑިގާ އެވެ. ރެއާލް އަށް ފުރަތަމަ ފަހަރަށް ކުރި ހޯދައިދިނީ މެންޑީ އެވެ. ހާފް ނިމުމުގެ ކުރިން އެތްލެޓިކޯ އިން ނަތީޖާ ހަމަހަމަ ކުރީ ގްރީޒްމަންގެ ރެކޯޑް ލަނޑުންނެވެ. މިއީ ގްރީޒްމަން އެތްލެޓިކޯ އަށް ޖަހައިދިން 174 ވަނަ ގޯލެވެ. އެކްލަބަށް އެންމެ ގިނަ ގޯލް ޖަހައިދިން ކުޅުންތެރިއަކީ މިހާރު ފްރާންސްގެ ގްރީޒްމަން އެވެ.

ދެވަނަ ހާފްގައި އެތްލެޓިކޯ އަށް ކުރި ލިބުނީ ރުޑިގާ އަތުން ބައިކޮޅަށް ވަން ގޯލުންނެވެ. މެޗު އެއްވަރުކޮށް, ނަތީޖާ ނެރެން އިތުރު ވަގުތު ކުޅެން ޖެހުނީ ކަވާހަލް ލަނޑު ޖަހާ 85 ވަނަ މިނިޓްގައި ނަތީޖާ ހަމަހަމަ ކޮށްދިނުމުންނެވެ. އިތުރު ވަގުތުގައި ރެއާލް އިން ހަތަރު ވަނަ ލަނޑު ޖެހީ ހޮސެލޫ އެވެ. އަދި ހޮސެލޫ ތަނަވަސްކޮށްދިން ފުރުޞަތެއްގައި ރެއާލް އަށް ފައިނަލްގެ ޖާގަ ކަށަވަރުކޮށްދިނީ 120 ވަނަ މިނިޓްގައި ޑިއާޒް އެވެ. ޑިއާޒް ލަނޑު ޖެހީ އެތްލެޓިކޯ ކީޕަރު އިތުރު ވަގުތުގައި ފޯވާޑަކަށް ކުރިއަށް އަރާހުރި ވަގުތެއްގައެވެ.

ސްޕެނިޝް ސުޕަރ ކަޕްގެ ފައިނަލްގެ ދެވަނަ ޖާގައަށް ވާދަކުރަނީ ބާސެލޯނާ އާއި އޮސަސޫނާ އެވެ. ސެމީފައިނަލް ދެވަނަ މެޗު ބުރާސްފަތި ދުވަހުގެރޭ ކުޅޭނެއެވެ. އެންމެ ފަހުން ފައިނަލްގައި ވާދަކުރީ ރެއާލް އާއި ބާސެލޯނާ އެވެ. ރެއާލް ބަލިކޮށް ތަށި ހޯދީ ބާސެލޯނާ އެވެ. މިފަހަރުގެ ފައިނަލް މެޗު ކުޅޭނީ އާދިއްތަ ދުވަހު އެވެ.