އަންޗެލޮޓީގެ ފޯކަސް ސުޕަ ކަޕްގެ ފައިނަލަށް
15 ޖެނުއަރީ 2023 | އާދީއްތަ 02:18މި ސީޒަންގައި ހަ ތަށި ކާމިޔާބުކުރުމުގެ ފުރުސަތު ރެއާލަށް އެބަ އޮތް
ޕްރެސް ކޮންފަރެންސްގައި ރެއާލްގެ ކޯޗު އަންޗެލޮޓީ
މިވަގުތު ހުރިހާ ފޯކަަސްއެއް ހުރީ ސްޕެނިޝް ސުޕަ ކަޕްގެ ފައިނަލަށް ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ މި ސީޒަންގެ ސްޕެނިޝް ސުޕަ ކަޕްގެ ފައިނަލްގައި ބާސެލޯނާއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. މިއީ މި ސީޒަންގެ ރެއާލް ކުރިމަތިލާ ދެ ވަނަ ތައްޓެވެ. އެ ޓީމުން ވަނީ ޔުއެފާ ސުޕަ ކަޕް ކާމިޔާބުކޮށްފަ އެވެ. ސްޕެނިޝް ސުޕަ ކަޕަށްފަހު ދެން ރެއާލަށް އޮތީ ފީފާ ކުލަބް ވޯލްޑް ކަޕެވެ. މި ދެ މުބާރާތް ކާމިޔާބުކުރެވިއްޖެ ނަމަ، މި ސީޒަންގައި ހަ ތަށި ކާމިޔާބުކުރުމުގެ ފުރުސަތު ރެއާލަށް އެބަ އޮތެވެ. ކޮޕަ ޑެލްރޭގެ އިތުރުން ރެއާލް އަންނަނީ ސްޕެނިޝް ލީގާއި ޔުއެފާ ޗެމްޕިއަންސް ލީގުގައި ވެސް ވާދަކުރަމުންނެވެ. ނަމަވެސް އަންޗެލޮޓީ ބުނީ މިވަގުތު ހަ ތަށި ކާމިޔާބުކުރުމަށް ވިސްނުން ނުބަހައްޓާ ކަމަށާއި، ވިސްނުން ހުރީ ސްޕެނިޝް ސުޕަ ކަޕްގެ ފައިނަލަށް ކަމަށެވެ.
މީގެ އިތުރުން އަންޗެލޮޓީ ބުނީ ރެއާލްގައި އޮތް ސްކޮޑާމެދު އޭނާ ހިތްހަމަޖެހޭ ކަމަަށާއި، ތަޖުރިބާ ހުރި ކުޅުންތެރިންނާއި، ޒުވާން ކުޅުންތެރިންނާއެކު ޓީމާމެދު އުންމީދު އޮތް ކަމަށެވެ. އަަދި ކުޅުންތެރިން ބޭނުންވާނީ މޮޅުވުން ކަމަށާއި، ކުޅުންތެރިންގެ މެންޓާލިޓީ އެކަމަށް ތައްޔާރުވާނެ ކަމަށެވެ. އޭނާ ބުނީ ރެއާލަކީ ކާމިޔާބީ ހޯދަން އެދޭ ކުލަބެއް ކަމަށާއި، އެހެނިހެން ކަންކަމާ ވިސްނަން ކުލަބުން ފުރުސަތު ނުދޭނެ ކަމަށެވެ. އަދި އޭނާ ދައްކަމުން މި އަންނަނީ 2013 ވަނަ އަހަރުން ފެށިގެން ރެއާލްގައި ކާމިޔާބީ ހޯދަމުން އަންނަ ކުޅުންތެރިންގެ ވާހަކަ ކަމަށެވެ.
ބާސެލޯނާއާ ދެކޮޅަށް ނުކުންނައިރު، ރެއާލް ވަނީ މިހާތަނަށް 12 ފަހަރު ސްޕެނިޝް ސުޕަ ކަޕް ކާމިޔާބުކޮށްފަ އެވެ. މި ސީޒަންގެ ސްޕެނިޝް ސުޕަ ކަޕް ކާމިޔާބު ކުރެވިއްޖެނަމަ، ރެއާލުން ބާސެލޯނާއާ އަރާ ހަމަ ކުރެވޭނެ އެވެ. މިހާތަނަށް ސްޕެނިޝް ސުޕަ ކަޕް އެންމެ ގިނަ ފަހަރު ކާމިޔާބު ކުރި ކުލަބަކީ ބާސެލޯނާ އެވެ. އެ ޓީމުން ވަނީ 13 ފަހަރު ސުޕަ ކަޕް ކާމިޔާބުކޮށްފަ އެވެ. ސުޕަ ކަޕްގެ ފައިނަލް އޮންނާނީ އާދިއްތަ ދުވަހުގެ ރޭ ރާއްޖެ ގަޑިން 12 ޖަހާއިރު އެވެ.
