ވާދަވެރި ރެއާލް މެޑްރިޑު ނޫން ޓީމަކާ ދެކޮޅަށް ކުޅެން ޖެހުނު ނަމަވެސް، ބާސެލޯނާގެ އަމާޒަކީ ތަށި ކާމިޔާބުކުރުން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.

ޒަވީ މިހެން ބުނީ މި ސީޒަންގެ ސްޕެނިޝް ސުޕަ ކަޕްގެ ފައިނަލްގައި ރެއާލް މެޑްރިޑާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. ފައިނަލަށް ނުކުންނައިރު، މި ސީޒަންގެ ސްޕެނިޝް ލީގުގައި ވެސް މި ދެ ޓީމުގެ ވާދަވެރިކަން ބޮޑެވެ. ލީގު ތާވަލްގެ އެއް ވަނައިގައި ބާސެލޯނާ އޮތީ 41 ޕޮއިންޓާއެކު އެވެ. ދެ ވަނައިގައި އެންމެ ފަހުގެ ޗެމްޕިއަން ރެއާލް އޮތީ 38 ޕޮއިންޓާއެކު އެވެ. މި ދެ ޓީމު އެންމެ ފަހުން ބައްދަލުކުރީ ލީގު މެޗެއްގަ އެވެ. މިދިޔަ އަހަރު ރެއާލްގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 3-1 އިންނެވެ.

ސުޕަ ކަޕްގެ ފައިނަލަށް ނުކުންނައިރު، މިއީ ބާސެލޯނާގެ ކޯޗުކަމާ ޒަވީ ހަވާލުވި ފަހުން ފައިނަލެއްގައި އެ ޓީމު ކުޅޭ ފުރަތަމަ ފަހަރެވެ. ކުޅުންތެރިޔެއްގެ ގޮތުގައި ބާސެލޯނާއާއެކު 25 ތަށި ކާމިޔާބުރި ޒަވީގެ އުންމީދަކީ ކޯޗެއްގެ ގޮތުގައި ބާސެލޯނާ އަށް ތަށި ކާމިޔާބު ކޮށްދިނުމެވެ. ޒަވީ ބުނީ ބާސެލޯނާގައި ބޭނުންވާނީ މޮޅުވުން ކަމަށާއި، އެކަމާ މަޝްވަރާ ވެސް ނުކުރެވޭނ ކަމަށެވެ. އަދި ބާސެލޯނާ އިން ބޭނުންވަނީ ތަށި ކާމިޔާބު ކުރުން ކަމަށާއި، ޓީމުގެ ލަނޑު ދަނޑިއަކީ އެއީ ކަމަށެވެ. އެގޮތުން ޒަވީ ބުނީ މިހާރު ބާސެލޯނާ އޮތީ ތައްޓެއް ކާމިޔާބު ކުރުމާ 90 މިނެޓު ނުވަތަ 120 މިނެޓު ކައިރީގައި ކަމަށެވެ. އެކަމަށް އެދޭ ސަބަބަކީ ވާދަވެރި ރެއާލާ ދެކޮޅަށް ކުޅެން ޖެހޭތީ ނޫން ކަމަށާއި، އިދިކޮޅަށް ކޮންމެ ޓީމެއް އޮތް ކަމުގައިވީ ނަމަވެސް ބާސެލޯނާ އިން ބޭނުންވަނީ އެ ގޮތް ކަމަށެވެ. އޭނާ ބުނީ މުޅު ޓީމު ވެސް އޮތީ ރަނގަޅު ރޫޙެއްގައި ކަމަށާއި، ސުޕަ ކަޕް ތައްޓަކީ ބާސެލޯނާ އަށް މުހިންމު އެއްޗެއް ކަމަށެވެ.

މީގެ އިތުރުން ޒަވީ ވަނީ ބައެއް ކުޅުންތެރިންނާ ގުޅޭ ގޮތުން ވެސް ވާހަކަ ދައްކާފަ އެވެ. އޭނާ ބުނީ އެއްވެސް ކުޅުންތެރިޔަކު ޓީމު ދޫކޮށްލަން އޭނާ ބޭނުންނުވާ ކަމަށެވެ. ނަމަވެސް އެއްވެސް ކުޅުންތެރިޔަކު ޓީމުގައި ހުންނަން ބޭނުންނުވެ، ޓީމު ދޫކޮށްލަން ބޭނުންވާ ނަމަ، އެ ކުޅުންތެރިޔަކަށް އެ ފުރުސަތު ދިނުމަށް އޭނާ ބާސެލޯނާގައި އެދޭނެ ކަމަށް ވެސް ޒަވީ ބުންޏެވެ. ހަމައެއާއެކު އެ ކުޅުންތެރިޔެއްގެ ބަދަލަށް ކުޅުންތެރިޔަކު ހޯދާނެ ކަމަށް ވެސް ޒަވީ ބުންޏެވެ.

ސުޕަ ކަޕްގެ ފައިނަލްގައި އާދިއްތަ ދުވަހުގެ ރޭ ރެއާލާ ދެކޮޅަށް ނުކުންނައިރު، ބާސެލޯނާ އަކީ ސުޕަ ކަޕްގެ އެންމެ ކާމިޔާބު ޓީމެވެ. އެ ޓީމުން ވަނީ 13 ފަހަރު ސުޕަ ކަޕް ކާމިޔާބުކޮށްފަ އެވެ. ބާސެލޯނާގެ ފަހަތުން ވާދަވެރި ރެއާލް ވަނީ 12 ފަހަރު ސުޕަ ކަޕް ކާމިޔާބުކޮށްފަ އެވެ. ބާސެލޯނާ އަދި ރެއާލް ވާދަކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން 12 ޖަހާއިރު އެވެ.