ސްޕެނިޝް ސުޕަރ ކަޕް ފައިނަލްގެ ދެވަނަ ޖާގަ ބާސެލޯނާ ހޯދައިފިއެވެ.

ބާސެލޯނާ ފައިނަލްގެ ދެވަނަ ޖާގަ ހޯދީ ސެމީފައިނަލްގައި ރެއާލް ބެޓިސް ޕެނަލްޓީގައި ބަލިކޮށްގެންނެވެ. މެޗުގެ ފުރިހަމަ ވަގުތު ހަމަވީ 1-1 ން ދެޓީމް އެއްވަރުވެގެންނެވެ, 40 ވަނަ މިނެޓުގައި ބާސެލޯނާއަށް ލީޑް ހޯދައިދިނީ ލެވާންޑޯސްކީއެވެ. އޭގެކުރިން ޕެޑްރީ ލަނޑެ ޖެހިނަމަވެސް ވީއޭއާރުން ބެލުމަށްފަހު ލަނޑެއް ނޫންކަމަށް ނިންމީއެވެ. ރެއާލް ބެޓިސްއިން ނަތީޖާ ހަމަހަމަކުރީ ދެވަނަ ހާފްގައި ނަބީލް ފެކީރް ޖެހި ގޯލުންނެވެ. މެޗުގެ ފުރިހަމަ ވަގުތު ހަމަވުމުގެ ކުރިން ލެވާންޑޯސްކީ އިތުރު ލަނޑެއް ޖަހާ ކުރި ހޯދައިދިން ނަމަވެސް މިފަހަރުވެސް ހުރަސްއެޅީ ވީއޭއާރެވެ.

މެޗުގެ 90 މިނެޓުގައި ނަތީޖާ 1-1 ން އެއްވަރުވުމުން ނަތީޖާ ނެރުމަށް ކުޅުނު 15 މިނެޓުގެ ދެހާފްގައި ކޮންމެ ޓީމަކުން އެއް ލަނޑުޖެހިއެވެ. ފުރަތަމަ ކުރި ހޯދީ ބާސާއިންނެވެ. އެއީ އަންސޫ ފާޓީ ޖަހި ލަނޑުންނެވެ. ރެއާލް ބެޓިސްއަށް ނަތީޖާ ހަމަހަމަކޮށްދިނީ ލޮރެން މޮރޯންއެވެ.

ނަތީޖާ ނެރުމަށް ޖެހި ޕެނަލްޓީގައި ބާސާ ކުރިހޯދީ 4-2 ނެވެ. ބާސެލޯނާގެ ހަތަރު ޕެނަލްޓީވެސް ކާމިޔާބުކުރިއެވެ. އެކަމަކު ރެއާލް ބެޓިސްގެ ތިންވަނަ އަދި ހަތަރުވަނަ ޕެނަލްޓީ ނާކާމިޔާބުވީއެވެ. އެއީ ހުއާންމީއާއި, ވިލިއަމް ކަވާލިއޯ ޖެހި ޕެނަލްޓީއެވެ. އެދެޕެނަލްޓީވެސް ބާސާގެ ކީޕަރު އަންދްރޭ މާކް ޓާ ސްޓެގެން މަތަކުރިއެވެ.

މުބާރާތުގެ ފައިނަލްގެ ފުރަތަމަ ޖާގަ ރެއާލް މެޑްރިޑް ހޯދީވެސް ޕެނަލްޓީގައި ސެމީ ފައިނަލް މެޗު ކާމިޔާބުކޮށްގެންނެވެ. އެއީ ވެލެންސިޔާ ބަލިކޮށްގެންނެވެ.