މުއިއްޒު އިންޑިއާ ސިފައިން ފޮނުވާލާނެ ކަމަށް ބުނަނީ ވޯޓު ހޯދަން، އެކަމެއް ނުކުރައްވާނެ - ޖާބިރު

އިދިކޮޅު ކެންޑިޑޭޓް މުއިއްޒު އަށް ރާއްޖޭގައި ތިބި އިންޑިއާ ސިފައިން ފޮނުވާ ނުލެވޭނެ ކަމަށާއި އެކަން ނުވެސް ކުރައްވާނެ ކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

އޭނާ މިފަދައިން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަަދައްކަވަމުންނެވެ. އިންޑިއާ ސިފައިން ރާއްޖޭގައި ތިބި ކަމަށާއި އެއީ ރާއްޖޭގެ ސަލާމަތަށް އޮތް ނުރައްކަލެއް ކަމަށް އިދިކޮޅު ފަރާތްތަކުން ދަނީ ބުނަމުންނެވެ. އެކަން ސަރުކާރުން ދޮގުކުރި ނަމަވެސް ސަރުކާރަށް ފާޑުކިޔުމަށް އިދިކޮޅު ފަރާތްތަކުން އެންމެ ބޮޑަށް ދައްކާ ވާހަކަ އަކީ އެއީއެވެ. އެކަމާއި ގުޅޭ ގޮތުން ޖާބިރު ވިދާޅުވީ ރާއްޖެ އަށް އިންޑިއާ ސިފައިން އައިސްފައި ވަނީ މިލިޓަރީ ކަމަކު ނޫން ކަމަށެވެ. އެ މީހުން ކައިރީ ދާން ބުނުމުން ދާނެ ކަމަށާއި އިންޑިއާ އިން ރާއްޖެ ނުހިފާނެ ކަމަށް އޭނާ ވިދާޅުވިއެވެ.

އިންޑިއާ އަކީ ރާއްޖެ އަށް އުދުވާނީ ހަމަލާ އެއް ދިން އިރު ވެސް ރާއްޖެ އަށް އެހީ ފޯރުކޮށްދިން ބައެއް ކަަމަށާއި ރާއްޖެ އަށް ތަފާތު އެކި ޤައުމުތަކުން ސިފައިން އަންނަ ކަމަށް އޭނާ ވިދާޅުވިއެވެ. އަދި އިންޑިއާ އަކީ އަވަށްޓެރި ޤައުމުތައް ހިފާ ބައެއް ނޫންކަމަށާ، އެއީީ އިންޑިއާ މީހުން ދަންނަ ކަމެއް ނޫންކަމަށް ޖާބިރު ވިދާޅުވިއެވެ. މުއިއްޒުވެސް އެވާހަކަދައްކަވަނީ ސިޔާސީ މަގްސަދެއްގައި ވޯޓު ހޯއްދަވަން ކަމަށް ޖާބިރު ވަނީ ވިދާޅުވެފައެވެ. އެފަދަ ވާހަކަތައް ޤަބޫލުކުރާ ވަރަށް ވުރެ އާއްމުން މިއަދު ހޭލުންތެރިކަމަށް ޖާބިރު ވިދާޅުވިއެވެ. ގައުމުތައް ހިފުމަކީ އިންޑިއާގެ ޕޮލިސީ އެއް ނޫން ކަމަށް ވެސް ޖާބިރު ވިދާޅުވިއެވެ.

މި ސަރުކާރުގެ ފޮރިން ޕޮލިސީ އާއި މެދު ވެސް ޖާބިރު ވަނީ ވާހަކަދައްކަވާފައެވެ. އިންޑިއާ އާއި އެކު ރާއްޖެއިން ޒަމާނުއްސުރެ ގާތް ގުޅުމެއް ބާއްވަމުން އަންނަ އިރު ކުރީގެ ރައީސް އަބްދުﷲ ޔާމީންގެ ވެރިކަމާއި، ކުރީގެ ރައީސް މައުމޫން އަބްދުލް ޤައްޔޫމް އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް އެކަން އޮތީ އެހެން ކަމަށް ޖާބިރު ވިދާޅުވިއެވެ. ޖާބިރު ވިދާޅުވީ އިންޑިއާ އާއި އެކު އެހެން ސަރުކާރުތަކުން ބޭއްވި ގުޅުމާއި މި ސަރުކާރުން ބާއްވަމުންދާ ގުޅުމާއި ތަފާތެއް ނެތް ކަމަށެވެ.