ރިޔާސީ އިންތިޚާބުގެ ފުރަތަމަ ބުރު ރައީސް އިބްރާހީމް މުހައްމަދު ޞާލިހު އަށް ކާމިޔާބުނުކުރެއްވުނީ ޒަމާނަށް ފެތޭ ގޮތަށް ކެމްޕެއިން ނުކުރެއްވުމުން ކަމަށާއި، ކެމްޕެއިނަށް ޚަރަދު ކުރީ އެންމެ ރަނގަޅަށް ނޫން ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
ރާއްޖެ ޓީވީގެ ފަށާއިރު ޕްރޮގްރާމްގައި ކެމްޕެއިންގައި ހެދުނު ގޯސްތައް ފާހަގަކުރައްވަމުން ޖާބިރު ވިދާޅުވީ މި އިންތިޚާބުގައި އެޑްމިނިސްޓްރޭޓިވް މަސައްކަތްތައް ނުކުރެވި ހުރި ކަމަށެވެ. އެގޮތުން އިންތިޚާބުގެ ކެމްޕެއިންގެ ކަންކަން ކޯޑިނޭޓްކުރުމުގައި މައްސަލަތަކެއް ހުރި ކަމަށް ޖާބިރު ވިދާޅުވިއެވެ. އަދި ވަޒީރުން ކެމްޕެއިނުގައި ހަރަކާތްތެރިވެވަޑައިގެންނެވުމާއި ގިނަ ކެމްޕެއިން މެނޭޖަރުން ތިބުމަކީ ވެސް ދިމާވި މައްސަލަ އެއް ކަމަށް ޖާބިރު ވިދާޅުވިއެވެ. ނެތް އެސަމްޕްޝަންތަކެއް ނުވަތަ ނުވާނެ ކަންތައްތަކެއް ވާނެ ކަމަށް ބަލައިގެން ތިބުމަކީ އިންތިޚާބުގައި ތިމާވި އިތުރު މައްސަލަ ކަމަށް ޖާބިރު ފާހަގަކުރެއްވިއެވެ. އެހެންނަމަވެސް ކުރިއަށް އޮތްތަނުގައި އެކަން ރަނގަޅުކޮށް އިންތިޚާބު ކާމިޔާބު ކުރައްވާނެ ކަމަށް ޖާބިރު ވިދާޅުވިއެވެ.
ޖާބިރު ވިދާޅުވީ 1000 ވޯޓު ލިބޭނެ ކަމަށް އަންދާޒާކޮށްފައި އޮތްތަނަކުން ބޮޑުތަނުން އެ އަދަދުތައް ވޯޓުލީ އިރު ތަފާތުވުމަކީ ހިސާބު ރަނގަޅު ނޫންކަން އެނގޭ ކަމެއް ކަމަށެވެ. އެހެންނަމަވެސް ކެމްޕެއިން ޓީމްތަކުން ވަރަށް މަސައްކަތް ކުރި ކަމަށާއި އެއީ ތައުރީފު ހައްގު ކަމެއް ކަަމަށް ވެސް ޖާބިރު ވިދާޅުވިއެވެ. މިހާރު މި ވަގުތަކީ ރައީސުލްޖުމްހޫރިއްޔާ ހިސާބު ޖައްސަވައިގެން އަކުރުން އަކުރަށް ކަންކަން ބައްލަވައިގެން މަސައްކަތް ކުރައްވަން ޖެހިވަޑައިގަންނަވާ ދަނޑިވަޅެއް ކަަމަށް ވެސް ޖާބިރު ވިދާޅުވިއެވެ.
ކެމްޕެއިން ކުރާ އިރު މެނޭޖަރަކަށް ވެވަޑައިގަންނަވަންވާނީ ޚުދު ރައީސުލްޖުމްހޫރިއްޔާ ކަމަށާއި މާ މެނޭޖަރުން ގިނަ ވުމަކީ ވެސް މައްސަލަ އެއް ކަމަށް އޭނާ ވިދާޅުވިއެވެ. އަދި ރައްޔިތުންގެ ގާތަށް ދާން ޖެހޭ ކަމަށާއި ދޮރުން ދޮރަށް ކެމްޕެއިނަށް ހިނގިނަމަ، ނަތީޖާ ތަފާތު ވާނެ ކަމަށް ދެކިވަޑައިގަންނަވާ ކަމަށް ޖާބިރު ވިދާޅުވިއެވެ. އަދި ރައްޔިތުންނަށް މެސެޖު ފޯރުކޮށްދިނުމުގައި ސިޓީފަދަ ތަފާތު ސީދާ ގޮތްތަކަށް މަސައްކަތް ކުރުން މާ ރަނގަޅު ކަމަށް އޭނާ ވިދާޅުވެފައެވެ.
އަދި ބޮޑު ތަފާތަކުން ހޮވޭނެ ކަމަށް ވިސްނައިގެން އެ ވާހަކަ އެގޮތަށް ދެއްކުމުން ވޯޓުލާން ނުދާ މީހުންގެ އަދަދު ވަރަށް ބޮޑަށް އިތުރުވި ކަމަށް ވެސް ޖާބިރު ވިދާޅުވިއެވެ. އެކަން ހައްލުކޮށް އިންތިޚާބުގެ ދެވަނަ ބުރު ކާމިޔާބުކުރުމުގެ އުންމީދު ބޮޑު ކަމަށް ފާހަަގަކުރައްވާ ޖާބިރު އިތުރަށް ވިދާޅުވީ ދެވަނަ ބުރެއް އޮތުމުން ވޯޓުލާން ނުދާ މީހުން ވެސް ތިބިކަމަށެވެ.
