ދަރަނީގެ ވާހަކަ ދައްކާއިރު، ނިމިދިޔަ ސަރުކާރުން ޤާއިމުކޮށްދިން ފަސޭހަތަކުގެ ވާހަކަވެސް ދައްކަންޖެހޭ: ޖާބިރު

މި ސަރުކާރުން ދަރަނީގެ ވާހަކަ ދައްކާއިރު، ނިމިދިޔަ ސަރުކާރުން ޤާއިމުކޮށްދިން ފަސޭހަތަކުގެ ވާހަކަވެސް ދައްކަންޖެހޭކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.

އަންގާރަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅު ދައްކަވަމުން ޖާބިރު ވިދާޅުވީ، ނިމިދިޔަ ސަރުކާރުންވެސް ދަރަނި ނަގައިގެން ކުރި އެއް މަސައްކަތަކީ ރާއްޖޭގެ ރަށްތަކުގައި އަސާސީ ޚިދުމަތްތައް ޤާއިމުކޮށް، ފަތުރުވެރިކަން އިތުރަށް ފުޅާ ކުރެވޭނެ މަގުތައް ފަހިކުރުން ކަމަށެވެ.

އެ މަސައްކަތް އެމްޑީޕީން ކުރިއަށް ގެންދަނިކޮށް ސަރުކާރު ބަދަލުވެފައިވާކަން ފާހަގަ ކުރައްވައި ޖާބިރު ވިދާޅުވީ، މިހާރު ބަލަންޖެހޭ ކަމަކީ ރަށްރަށުގައި ޤާއިމު ކުރެވިފައި ހުރި ޚިދުމަތްތަަކަކީ ކޮބައިތޯކަމަށެވެ.

އެގޮތުން ބަލާއިރު، ރަށްރަށުގައި ޤާއިމުކޮށްދެވިފައި ހުރި، އާމްދަނީ ލިބޭނެ ފަދަ އެސެޓުތަކަކީ ކޮބައިތޯވެސް ބަލަންޖެހޭކަން ޖާބިރު ފާހަގަ ކުރެއްވިއެވެ.

ފިނޭންސް މިނިސްޓްރީން އެކަންކަމުގެ ހިސާބު ޖަހާލުން މުހިއްމުކަމަށް ޖާބިރު ވިދާޅުވިއެވެ.

ޖާބިރު ވިދާޅުވީ، އިޤްތިސާދީ އެޖެންޑާތައް ހިންގަމުންދާއިރު، ރާއްޖެ އަނދަވަޅަކަށް ވެއްޓިފައިވާކަމަށް މިހާރުގެ ސަރުކާރަށް ބުނެވެން ނެތްކަމަށެވެ. އެގޮތުން ދިވެހިން ބޭނުންވާ ކުރިއެރުމާ އެއްވަރަށް ނިމިދިޔަ ސަރުކާރުންވެސް ތަރައްޤީ ގެނައުމުގެ މަސައްކަތްތައް ކުރަމުން ގޮސްފައިވާކަމަށް ޖާބިރު ވިދާޅުވިއެވެ.

ޖާބިރު ވިދާޅުވީ، ގިނަ ރަށްރަށުގައި މިހާރު އަސާސީ ޚިދުމަތްތައް ތަރައްޤީކުރެވި، ފަތުރުވެރިކަމަށްވެސް އިތުރަށް ފުޅާކުރެވިފައިވާކަމަށެވެ.