އިދިކޮޅު ރިޔާސީ ކެންޑިޑޭޓް ޑރ.މުހައްމަދު މުއިއްޒު އަކީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމަށް ވުރެ އެތައް ގުނައެއް ބޮޑަށް އަނިޔާވެރި މީހެއް ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ހުކުރު ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަމުންނެވެ.
ޖާބިރު ވަނީ ކުރިން މުއިއްޒު އޭނާ އަށް ކުރައްވާފައިވާ އަނިޔާގެ ތުހުމަތުތަކުގެ ތަފްސީލް ދެއްވާފައެވެ. އެގޮތުން އޭނާގެ އަތުން ވެސްޓްޕާރކް އަތުލެއްވީ ޒާތީގޮތުން ކަމަށާއި އެއީ މަޖިލީހުގައި ހިނގައިދިޔަ ކަމެއްގެ ސަބަބުން މުއިއްޒު ކުރެއްވި ކަމެއް ކަމަށް ޖާބިރު ވިދާޅުވިއެވެ. އޭރު މަޖިލީހުގެ ތެރެއިން ބައްދަލުވެވަަޑައިގެން މުއިއްޒު އަކީ ވަރަށް ބޮޑު އަނިޔާވެރި އެއް ކަމަށް އޭނާ އަށް ދަންނަވާފައިވާނެ ކަމަށް ވެސް ޖާބިރު ވިދާޅުވިއެވެ. މުއިއްޒު ހައުސިން މިނިސްޓަރުކަމުގައި ހުންނެވި އިރު ވެސްޓް ޕާރކް އޭނާ އަތުން އަތުލެއްވުމަށް އިއުލާނެއް ކުރައްވައިގެން މަސައްކަތް ކުރެއްވީ ވަރަށް ހީލަތްތެރިކަމާއެކު ކަމަށް ޖާބިރު ވިދާޅުވިއެވެ. އަދި މުއިއްޒު އަކީ އަބަދުވެސް ވަރަށް ހީލަތްތެރިކަމާއެކު މަަސައްކަތް ކުރައްވާ ބޭފުޅެއް ކަމަށް ޖާބިރު ތުހުމަތުކުރެއްވިއެވެ.
މުއިއްޒަކީ ރައީސް ޔާމީންގެ އަރިހުގައި ބާރުގަދަ ބޭފުޅެއް ނޫން ކަމަށާއި، މުއިއްޒަކީ ވަރަށް ކުރީއްސުރެ ވެރިކަމަށް ވަޑައިގަތުމަށް މަސައްކަތް ކުރެއްވި ބޭފުޅެއް ކަަމަށް ވެސް ޖާބިރު ވިދާޅުވިއެވެ. އެގޮތުން ވެރިކަަމަށް ވަޑައިގަންނަވަން ޓިކެޓް ހޯއްދެވީ ވެސް ނުފޫޒުގެ ތެރެއިން ކަމަށާއި މޭޔަރުކަމަށް ހޮވިވަޑައިގަތުމުން ވެސް ނުފޫޒު ބޭނުން ކުރައްވައިގެން ވެރިކަން ހޯއްދަވަން ވަރަށް ބޮޑަށް މަސައްކަތް ކުރެއްވި ކަމަށް ޖާބިރު ވިދާޅުވިއެވެ. ޖާބިރ ވިދާޅުވީ ޔާމީންގެ އިތުބާރު ވެސް މުއިއްޒަށް ނެތް ކަމަށެވެ.
ޔާމީން ވެއްޖެއްޔާ ކުރާ ކަންކަން މޫނުމަތިން ފެންނާނެ. މީނަ ވެއްޖެއްޔާ ނޭނގޭނެ. މޫނުމަތިން ވެސް ނުފެންނާނެ. މީނައަށް ވެސް ނޭނގޭނެ.އަބްދުﷲ ޖާބިރު / ކާށދޫ ދާއިރާގެ މެންބަރު
މި ޕްރޮގްރާމްގައި ވާހަކަފުޅު ދައްކަވަމުން މުއިއްޒު ކެމްޕެއިން ކުރަމުންދާ ގޮތާމެދު ސުވާލު އުފައްދަވާ ޖާބިރު ވަނީ ރާއްޖޭގައި އޮތް އަނދިރި ދައުލަތާއި ގުޅުން އޮތް ކަމަށް ޝައްކުވާ ކަމަށް ވެސް ވިދާޅުވެފައެވެ.
އެގޮތުން އަނދިރި ދައުލަތެއްގެ ވެރިކަން ރާއްޖޭގައި އޮންނަން އެއްވެސް ރައްޔިތަކު ބޭނުން ނުވާނެ ކަމަށް ޖާބިރު ވިދާޅުވިއެެވެ. ޖާބިރު އިތުރަށް ވިދާޅުވީ މުއިއްޒު ވެރިކަން ކުރައްވަން، މަޖިލީހުގެ ކޮންޓްރޯލް ހޯއްދަވާނީ މަޖިލީހުގެ ބާރު ބައްލަވައިގަނެގެން ކަމަށެވެ. މުއިއްޒު އަކީ ފައިސާ އިން ކަންކަން ކުރައްވާ ބޭފުޅެއް ކަމަށް ތުހުމަތުކުރައްވާ ޖާބިރު ވިދާޅުވީ މުއިއްޒަކީ ޔާމިނަށް ވެސް އިޚުލާސްތެރި ބޭފުޅެއް ނޫން ކަމަށެވެ. މުއިއްޒު އަކީ ޔާމީނަށް އިޚުލާސްތެރި އެއް ކަމަށް ޕީޕީއެމްގެ ބައެއް ބޭފުޅުން ވިދާޅުވަމުން ގެންދަވަނީ ޔާމީން ޖަލުގައި ހުންނެވުމުން ކަމަށާއި އެހެން ނޫން ނަމަ އެހެން ވިދާޅުނުވާނެ ކަމަށް ޖާބިރު ވިދާޅުވިއެވެ.
މީގެ އިތުރުން މުއިއްޒު ޔާމީން މިނިވަން ކުރައްވާނެ ކަމަށް ވިދާޅުވެ ދައްކަވަނީ ދަޅައެއް ކަމަށް ތުހުމަތުކުރައްވާ ޖާބިރު ވިދާޅުވީ ކުރީގެ ޑިފެންސް މިނިސްޓަރު މުހައްމަދު ނާޒިމާއެކު މުއިއްޒު މަސައްކަތް ކުރެއްވުމަކީ ޔާމީން މިނިވަން ނުކުރައްވާނެ ކަމުގެ ހެތްކެއް ކަމަށެވެ.
