ވެރިޔަކު ދެވަނަ ދައުރަކަށް ހޮވުމަކީ ޑިމޮކްރަސީ ރާއްޖެ އައީސުރެ ދެކެވަޑައިގަންނަވާ ހުވަފެނެއް ކަމަށާއި، ރައީސް އިބްރާހިމް މުހައްމަދު ޞާލިހު ދެވަނަ ދައުރަކަށް ހޮވޭނެ ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު އެފަދައިން ވިދާޅުވީ އެމްޑީޕީ އަށް ސޮއިކުރެއްވުމަށް ފަހު ނޫސްވެރިންނާއި ވާހަކަދައްކަވަމުންނެވެ. ޖާބިރު ވަނީ އެމްޑީޕީ އާއި ރައީސް ޞާލިހު އާއި އެކު މަސައްކަތް ކުރައްވާ ކާމިޔާބު ހޯއްދަވަން ތައްޔާރަށް ހުންނެވި ކަމަށް ވިދާޅުވެފައެވެ. އަދި މިއަދަކީ އެމަނިކުފާނުގެ ހަޔާތުގައި މުހިންމު ދުވަހެއް ކަމަށް ވެސް ވިދާޅުވިއެވެ. ރައީސުލްޖުމްހޫރިއްޔާ އާއެކު ދެ ދައުރު ފުރިހަމަ ކުރުމަކީ އެމަނިކުފާނުގެ ހުވަފެނެއް ކަމަށް ވެސް ވިދާޅުވިއެވެ. އަދި މި ދައުރަކީ އެންމެ ފުރިހަމަ ފައްކާ ދައުރު ކަމަށް ވެސް އޭނާ ވިދާޅުވިއެވެ. ރައީސް ޞާލިހާާއި އެކު މަސައްކަތް ކުރައްވަމުން ގެންދެވީ އަމިއްލަ އަށް އެދިވަޑައިގެން ކަމަށާއި، އެކަން ކުރީ އެންމެ ރަނގަޅަށް ވެރިކަން ކުރަނީ ރައީސް ޞާލިހު އަށް ވުމުން ކަމަށް އޭނާ ވިދާޅުވިއެވެ.
ރައީސް ޞާލިހު އަކީ ތަހުޒީބު ބޭފުޅެއް ކަމަށާއި ކޮވިޑް-19 އިން ރާއްޖެ އަރައިގަތް ގޮތަށް ބަލާލުމުން އެކަން އިނގޭނެ ކަމަށް އޭނާ ވިދާޅުވިއެވެ. އޭނާ އެމްޑިޕީއާއި އަލުން ގުޅިވަޑައިގަތީ އެމްޑީޕީގައި އޭނާ ހުރުމަށް ބޭނުންނުވާ މީހުން މިހާރު ނެތުމުން ކަމަށް ވެސް ވިދާޅުވިއެވެ. ޖާބިރު އެމްޑީޕީ އާއި ގުޅިވަޑައިގެންނެވުން އޭނާ ސިފަކުރެއްވީ ގެއަށް ވަޑައިގެންނެވުމުގެ ގޮތުގައެވެ. ޖާބިރު އެމްޑީޕީއާ ގުޅިވަޑައިގެންފައި މި ވަނީ އެމްޑީޕީގެ ޗެއާޕާސަން ފައްޔާޒް އިސްމާއީލް އޭނާއަށް އެމްޑީޕީއާއި ގުޅުމުގެ ދައުވަތުވެސް ދެއްވާފައިވަނިކޮށެވެ.
ޖާބިރު އެމްޑީޕީއާ ގުޅިވަޑައިގެންފައިވަނީ އާދިއްތަ ދުވަހު ރައީސް އިބްރާހީމް މުޙައްމަދު ސާލިޙާއި އެމްޑީޕީގެ އިސް ބޭފުޅުންނާއެކު ބޭއްވެވި ޚާއްސަ ރަސްމިއްޔާތެއްގައެވެ.
