ކާށިދޫ ދާއިރާގެ މެންބަރު އަބްދުﷲ ޖާބިރު އެމްޑީޕީއާ ގުޅިވަޑައިގެންފިއެވެ.
ޖާބިރު އެމްޑީޕީއާ ގުޅިވަޑައިގެންފައިވަނީ އާދިއްތަ ދުވަހު ރައީސް އިބްރާހީމް މުޙައްމަދު ސާލިޙާއި އެމްޑީޕީގެ އިސް ބޭފުޅުންނާއެކު ބޭއްވެވި ރަސްމިއްޔާތެއްގައެވެ.
ރަސްމިއްޔާތަށްފަހު ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ، ޖާބިރު އެމްޑީޕީއާ ގުޅިވަޑައިގަތުމަކީ އެމްޑީޕީއަށް ވެސް އަދި އެމަނިކުފާނަަށް ވެސް ލިބިވަޑައިގެންނެވި ވަރަށް ބޮޑު އުފަލެއް އަދި ކުރިއެރުމެއް ކަމަށެވެ.
ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބު ކޮށްދިނުމުގައި ޖާބިރުގެ ދައުރާއި ހިއްސާ އޮންނާނެ ކަމާމެދު އެމަނިކުފާނު ޝައްކު ނުކުރައްވާކަން ފާހަގަކުރައްވައި ރައީސް އިތުރަށް ވިދާޅުވީ، އެއީ އިންތިޚާބު ކާމިޔާބު ކުރުމަށް ލިބިގެންދާ ވަރަށް ބޮޑު އެހީތެރިކަމަކަށް ވާނެ ކަމަށެވެ.
ކުރިއަށް މި އޮތް ރިޔާސީ އިންތިޚާބު ކާމިޔާބު ކުރުމުގައި ޖާބިރުގެ ދައުރު، ހިއްސާ އަޅުގަނޑަށް ކުރިއަށް އޮތް ތަނުގައި ވަރަށް ބޮޑަށް ލިބިގެންދާނެކަމާމެދު އަޅުގަނޑު ޝައްކެއް ނުކުރަންރައީސް އިބްރާހީމް މުޙައްމަދު ސާލިޙު
ރައީސް އިތުރަށް ވިދާޅުވީ، 2018 ވަނަ އަހަރު އެމްޑީޕީ ވެރިކަމަށް އައި އިރުގައިވެސް ޖާބިރަކީ ހުރިހާ ގޮތަކުން ވަރަށް ބޮޑަށް އެހީތެރިކަން ފޯރުކޮށްދެއްވި ބޭފުޅެއް ކަމަށެވެ. އެކަމުގައި ޖާބިރުވެސް ބުރަ މަސައްކަތްތަކެއް ކޮށްދެއްވާފައިވާކަމަށް ރައީސް ވިދާޅުވިއެވެ.
އޭގެ އިތުރުން، ރައްޔިތުންގެ މަޖިލީހުގައި ހޭދަ ކުރެއްވި މުއްދަތުގައިވެސް އެކުގައި ގިނަ މަސައްކަތްތަކެއް ކުރައްވާފައިވާނެކަމަށް ރައީސް ވިދާޅުވިއެވެ.
އެ ތަޖުރިބާގެ އަލީގައި ވިދާޅުވާނަމަ، ޖާބިރުގެ އެ ޖޯޝާއި ފޯރިއާއެކު ނުކުމެވަޑައިގެން ކާމިޔާބީއާ ހަމައަށް ވާސިލުވުމަށް މަގުފަހިވެގެންދާނެކަން ރައީސް ފާހަގަ ކުރެއްވިއެވެ.
ޚާއްސަކޮށް މިއަދުގެ ޒުވާނުން ދެކޭ ގޮތުގައި ޖާބިރަކީ، ބައެއް ކުދިން ދެކޭ އެމީހުންގެ ލީޑަރުގެވެސް ގޮތުގައި، މިއީ ވަރަށް ރަނގަޅު ވަގުތެއް އަޅުގަނޑުމެންނާ ޖާބިރު ގުޅިވަޑައިގަންނަވަންރައީސް އިބްރާހީމް މުޙައްމަދު ސާލިޙު
ރައީސް އިތުރަށް ވިދާޅުވީ، ކުރިއަށް އޮތް ތަނުގައި ސިޔާސީ އިސް ސަފުގައި މަސައްކަތް ކުރައްވާ ފަރާތްތަކާއި، އާންމު ގިނަ ރައްޔިތުންތަކެއްވެސް އެމްޑީޕީއާ ގުޅޭނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން ޖާބިރު ވިދާޅުވީ، އޭނާއަކީ އަބަދުވެސް އެމްޑީޕީގެ މެންބަރެއް ކަމަށާއި، އޭރު އޭނާ އެމްޑީޕީގައި ހުރުމަށް ނޭދުނު މީހުން މިހާރު އެ ޕާޓީން ވަކިވެފައިވާ ކަމަށެވެ.
މި ރާއްޖޭގެ ރައީސަކަށް ހޮއްވަވަން ބޭނުންވަނީ ރައީސް އިބްރާހީމް މުޙައްމަދު ސާލިޙުކަން ފާހަގަކުރައްވައި ޖާބިރު ވިދާޅުވީ، އެކަން ޙާސިލު ކުރުމަށްޓަކައި ފުރިހަމަ ޤާބިލިއްޔަތުކަމާއެކު މަސައްކަތް ކުރައްވާނެ ކަމަށެވެ.
100 ޕަސެންޓު ކާމިޔާބު ވާނެ ކަމާމެދު ގެރެންޓީ އެބައޮތްކާށިދޫ ދާއިރާގެ މެންބަރު އަބްދުﷲ ޖާބިރު
ރައީސް ސާލިޙަށް މީހުން ތާއީދުކުރަނީ ތަރައްޤީގެ މަޝްރޫއުތަކާއި މަސައްކަތްތަކެއް ކޮށްދެވިފައިވާތީކަމަށް ޖާބިރު ވިދާޅުވިއެވެ.
