ގާސިމް 11 މިލިއަން ނެންގެވިކަމަށް ޖާބިރު ދެއްކެވި ވާހަކަ؛ ޖޭޕީން ބުނަނީ އެއީ ޒާތީ ވާހަކައެއް ކަމަށް

ކާށިދޫ ދާއިރާގެ މެންބަރު އަބްދުﷲ ޖާބިރުގެ އަތުން، މާމިގިލި ދާއިރާގެ މެންބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް 11 މިލިއަން ރުފިޔާ ނަންގަވާފައިވާ ކަމަށް ޖާބިރު ވިދާޅުވެއްޖެއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވާހަކަ ދައްކަވަމުން މެންބަރު ޖާބިރު ވިދާޅުވީ ސިޔާސީ ގޮތުން ވެސް ރާއްޖޭގެ އިތުބާރު ގެއްލިއްޖެ ކަމަށެވެ. ޖާބިރު ވިދާޅުވީ ރައީސް ނަޝީދުގެ އަރިހުގައި ސިއްރުވާހަކައެއް ދަންނަވާ ހިތްވާ ކަމަށާއި، އެއީ ގާސިމާއެކު ވަރަށް ގާތްކޮށް އުޅުއްވާތީ ކަމަށް އޭނާ ވިދާޅުވިއެވެ.

ޖާބިރު ވިދާޅުވީ އޭނާ އަތުން ގާސިމް ނަންގަވާފައިވާ 11 މިލިއަން ރުފިޔާ ރައީސް ނަޝީދު މެދުވެރިވެވަޑައިގެން ހޯއްދަވައިދެއްވުމަށެވެ. އެއީ ރައީސާއި ގާތުން އުޅުއްވާތީ ކަމަށް އަދި، ގާތުގައި އުޅުއްވާތީ އެވާހަކަ ދަންނަވާލެވޭނެކަަމަށް ދެކިވަޑައިގަންނަވާކަމަށެވެ. ޖާބިރު ވިދާޅުވީ އޭނާ އެވާހަކަ ދަންނަވާ ދަންނަވާ އަޑެއް ނީވުނު ކަމަށެވެ. މި 11 މިލިއަން ރުފިޔާއަކީ ކޮން އިރަކު ކޮން ބޭނުމެއްގައި ގާސިމް ނެންގެވި ފައިސާއެއްކަމެއް ޖާބިރު ވިދާޅު ނުވެއެވެ.

މިކަމާއި ގުޅޭގޮތުން ޖުމްހޫރީ ޕާޓީގެ އިސްތަރުޖަމާނު އަލީ ސާލިހު ވިދާޅުވީ ޖާބިރު މަޖިލީހުގައި ދެއްކެވީ ޒާތީ ވާހަކައެއް ކަމަށެވެ. އިންސާފަށް ދައްކާނަމަ އެއަށްވުރެ ފުރިހަމައަށް އެ ވާހަކަ ދައްކަވާނެ ކަމަށެވެ. އަދި އެއީ ސިޔާސީ މަންފާއަކަށް ދައްކާ ވާހަކައެއް ކަމަށާއި، ސިޔާސީ ގޮތުން މިހާރު ކުރިއަށްދާ ކަންކަމާއި ގުޅިގެން ދޮގު ވާހަކަ ދައްކާ އިލްޒާމް އަޅުވަން މަސައްކަތް ކުރައްވާ ކަމަށް އަލީ ސާލިހު ވިދާޅުވިއެވެ.