ބާސެލޯނާގެ ފުރިހަމަ އިތުބާރު ޒަވީ އަށް އެބައޮތް!

ޒަވީ ހެނާންޑޭޒް އަށް ބާސެލޯނާގެ ފުރިހަމަ އިތުބާރު އެބައޮތް ކަމަށް އެ ކުލަބުގެ ޑިރެކްޓަރު ޑެކޯ ވިދާޅުވެއްޖެ އެވެ.

ޑެކޯ މިހެން ވިދާޅުވީ، ބާސެލޯނާ އިން ޒަވީގެ އެއްބަސްވުން އައުކުރުމަށް މަސައްކަތް ކުރަމުން އަންނަ ވަގުތެއްގަ އެވެ. އޭނާ ބުނީ، ބާސެލޯނާ އާއެކު ޒަވީ އައު އެއްބަސްވުމެއްގައި ސޮއިކުރާނެ ކަމަށާއި، އެއްބަސްވުން އައު ކުރުން ޒަވީ އަށް ހައްގު ކަމަށެވެ. ނަމަވެސް ބާސެލޯނާގެ އެއްބަސްވުން ޒަވީ އައު ކުރަނީ ކިހާ މުއްދަތަކަށް ކަމެއް ޑެކޯ ހާމަކޮށްފައެއް ނުވެ އެވެ. އޭނާ ވިދާޅުވީ، ބާސެލޯނާ އިން ޒަވީ އަށް ފުރިހަމަ އަށް އިތުބާރު ކުރާ ކަމަށާއި، އެ ކުލަބުން މުސްތަޤުބަލަށް ތައްޔާރުވަނީ ޒަވީ އާއެކު ކަަމަށެވެ.

މީގެ ކުރިން ބާސެލޯނާގެ ރައީސް ޖީން ލަޕޯޓާ ވެސް ވަނީ އެ ކުލަބުން ޒަވީ އަށް އައު އެއްބަސްވުމެއް ދޭނެކަން ޔަގީން ކޮށްދީފަ އެވެ. ސްޕެއިންގެ ބައެއް މީޑިއާތަކުގައި ބުނެފައިވާ ގޮތުން ބާސެލޯނާ އިން ޒަވީ އަށް ހުށަހަޅާނީ ފަސް އަހަރު ދުވަހުގެ އެއްބަސްވުމެކެވެ. މިހާރު އެ ކުލަބާއެކު ޒަވީ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

ބާސެލޯނާގެ ކޯޗުކަމަށް ޒަވީ ހަމަޖެއްސީ 2021 ވަނަ އަހަރުގެ ނޮވެމްބަރު މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި ނެދަލެންޑްސްގެ ރޮނާލްޑް ކޫމަން މަގާމުން ވަކި ކުރުމަށްފަހު އެވެ. ޒަވީގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް 94 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 58 މެޗުން މޮޅުވެފަ އެވެ. 19 މެޗަކުން ބަލިވެފައިވާއިރު، 17 މެޗެއް ނިމުނީ އެއްވަރުވެގެންނެވެ. ޒަވީގެ އިރުޝާދުގެ ދަށުން ބާސެލޯނާ އިން ވަނީ ދެ ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގު އަދި ސްޕެނިޝް ސުޕަ ކަޕް އެވެ.