މިނިސްޓަރު ޔުމްނާގެ މެސެޖު: ހިތްވަރު ދޫކޮށްނުލައްވާ، 2 ވަނަ ބުރު އަދި އޮތީ!

ދެވަނަ ބުރުގައި މަސައްކަތްކޮށް 'އުފާވެރި އަމާން' ރާއްޖެ ހޯދޭނެކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.

އާދިއްތަ ދުވަހު ޔުމްނާ ކުރެއްވި ޓުވީޓެއްގައި ވަނީ ހިތްވަރު ދޫކޮށްނުލެއްވުމަށް އިލްތިމާސްކުރައްވާފައެވެ. އަދި ދެވަނަ ބުރު ކުރިއަށް އޮތީ ކަމަށާއި އެހެންކަމުން އުފާވެރިއަމާން ރާއްޖެއެއް ހޯދުމުގެ މަސައްކަތައިގެން ކުރިޔަށް ދިއުމަށް އޭނާ އިލްތިމާސްކުރެއްވިއެވެ.

ޔުމްނާގެ އިތުރުން އެމްޑީޕީއާއި ރައީސް ޞާލިހަށް ތާއީދު ކުރައްވާ ގިނަ މެމްބަރުން ދަނީ ދެވަނަ ބުރުގައި އިންތިޚާބު ކާމިޔާބުކުރެއްވޭނެ ކަމަށް ވިދާޅުވަމުންނެވެ. އެގޮތުން، ރިޔާސީ އިންތިޚާބުގެ ފުރަތަމަ ބުރުގެ ނަތީޖާއާ ގުޅޭގޮތުން "ރާއްޖެ އެމްވީ" އާ ވާހަކަދައްކަވަމުން މާރިޔާ ވިދާޅުވީ މި އިންތިޚާބުގައި ވޯޓުލީ ފަރާތްތަކުން ދީފައިވަނީ މެސެޖެއް ކަމަށެވެ. އެއީ ސަރުކާރުދެކެ ނުވަތަ އެމްޑީޕީދެކެ އޮތް ހިތްހަމަނުޖެހުމެއްގެ ސަބަބުން ނުކުތް ނަތީޖާއެއް ނޫންކަމަށް ވެސް އޭނާ ވިދާޅުވިއެވެ.

މީގެ އިތުރުން ބައެއް ފަރާތްތަކުން ދަނީ ކުރީ އިންތިޚާބުތަކުގައިވެސް ފުރަތަމަ ބުރުގައި ދެވަނަ ލިބިވަޑައިގެންނެވި ކެންޑިޑޭޓް ދެވަނަ ބުރުގައި އިންތިޚާބު ކާމިޔާބު ކުރެއްވިކަން ފާހަގަކުރައްވައި ރައީސް ޞާލިހަށް ދެވަނަ ދައުރެއް ކާމިޔާބު ކުރެއްްވޭނެ ކަމަށް ބުނަމުންނެވެ.

ހޮނިހިރު ދުވަހު ބޭއްވި ރިޔާސީ އިންތިޚާބު އެއްބުރުން އެއްވެސް ކެންޑިޑޭޓަކަށް ކާމިޔާބުކުރެވިފައެއްނުވެއެވެ. އެހެންކަމުން ރިޔާސީ އިންތިޚާބްގެ ދެވަނަ ބުރެއް ބޭއްވުމަށް ވަނީ ހަމަޖެހިފައެވެ. ދެވަނަ ބުރުގެ ވޯޓުލުން އޮންނާނީ ސެޕްޓެމްބަރ މަހުގެ 30 ގައެވެ.

ރިޔާސީ އިންތިޚާބުގައި ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު އަށް 101،180 ވޯޓު ލިބިވަޑައިގެންނެވިއިރު، ރައީސް ޞާލިހަށް ލިބިވަޑައިގެންނެވީ 85،000 ވޯޓެވެ. އެހެންކަމުން ދެވަނަ ބުރުގައި ވާދަކުރައްވާނީ މި ދެ ކެންޑިޑޭޓުންނެވެ.