ރިޔާސީ އިންތިޚާބުގެ ދެވަނަ ބުރުގައި ވާދަކުރާ ދެ ޕާޓީއަށް ހުށަހެޅި ދެ ހުށަހެޅުމަށް އެއްބަސްވުމަށް ދެ ދުވަހުގެ މުއްދަތެއް ދޭން ދަ ޑިމޮކްރެޓްސް އިން ނިންމައިފިއެވެ.

ދަ ޑިމޮކްރެޓްސް އިން މިގޮތަށް ނިންމާފައިވަނީ ހޯމަ ދުވަހުގެ ރޭ ކުރިއަށްދިޔަ އެ ޕާޓީގެ އިންޓެރިމް ކައުންސިލު ބައްދަލުވުމުގައެވެ. މިގޮތަށް ނިންމާފައިވަނީ އެ ޕާޓީން ރިޔާސީ އިންތިޚާބުގެ ދެވަނަ ބުރުގައި ވާދަކުރާ އެމްޑީޕީ އާއި ޕީއެންސީއަށް ހުށަހަޅާފައިވާ ހުށަހަޅެންތަކާ ގުޅިގެން ބައްދަލުވުން ފެށުމާ ހަމައަށް ވަކިގޮތެއް ނިންމާފައި ނުވާތީއެވެ.

އެ ޕާޓީން އެމްޑީޕީއަށް ހުށަހަޅާފައިވަނީ މި މަހުގެ 28 ވަނަ ދުވަހު ނިޒާމީ ވޯޓަކަށްދާން އެއްބަސްވުމަށެވެ. އެގޮތުން ފެންނަ ނުފެންނަ ވޯތެއް ކުރިއަށްގެންދިއުމަށް އެއްބަސްވެ ސޮއި ކުރުމަށް ވަނީ ހުށަހަޅައިފައެވެ.

ޕީއެންސީއަށް ހުށަހަޅާފައިވަނީ ނިޒާމީ ވޯޓެއްގެ އިތުރުން ޑިމޮކްރެޓްސްއަށް ހިއްސާ ލިބޭގޮތަށް ސަރުކާރު އެކުލަވައިލުމަށެވެ.

ހޯމަ ދުވަހުގެ ރޭ ބޭއްވި ބައްދަލުވުމުގައި ޑިމޮކްރެޓްސް އިން ހުށަހަޅާފައިވާ ކަންކަމަށް އެއްބަސްވާން ދެ ދުވަހުގެ މުއްދަތެއް ދޭން ހުށަހެޅީ އެޕާޓީގެ އިންޓެރިމް ކައުންސިލްގެ މެމްބަރު މުޙައްމަދު ޝިފާޒުއެވެ. އެގޮތުން، ބުދަ ދުވަހުގެ ނިޔަލަށް މުއްދަތުދީ އެ މުއްދަތުގެ ތެރޭގައި ދެ ޕާޓީން ވެސް އެއްބަސްނުވެއްޖެނަމަ އެއްވެސް ޕާޓީއަކަށް ތާއީދު ނުކުރުމަށް އޭނާ ހުށަހެޅުއްވިއެވެ.

އެ ބައްދަލުވުމުގައި ޝިފާޒުގެ މި ހުށަހެޅުން ފާސްވެފައިވަނީ 50 މެމްބަރުންގެ ވޯޓުންނެވެ.

ޑިމޮކްރެޓްސް އިން މިގޮތަށް ނިންމާފައިވާއިރު ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހިމް މުޙައްމަދު ޞާލިހު ވަނީ ޑިމޮކްރެޓްސްގެ ހިންގުމާ އެންމެ އިސްކޮށް ހަވާލުވެ ހުންނެވި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދާ ފޯނުން ގުޅުއްވާ މަޝްވަރާ ކުރައްވާފައެވެ. ރައީސް ޞާލިހު ހޯމަ ދުވަހު ވިދާޅުވީ ރިޔާސީ އިންތިޚާބުގެ ކުރިން ނިޒާމީ ވޯޓަކަށް ދިއުމަކީ ޕްރެކްޓިކަލް ކަމަކަށްނުވާތީ އިންތިޚާބުގެ ފަހުން އެ ވޯޓު ނަގާނެ ތާރީހަކާ މެދު ނަޝީދުއާ މަޝްވަރާ ކުރެއްވި ކަމަށެވެ.

މި މަހުގެ ނުވަވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ޑިމޮކްރެޓްސްއިން ވާދަކުރެއްވި ކެންޑިޑޭޓް، އިލްޔާސް ލަބީބަށް ލިބިވަޑައިގެންނެވީ 15،839 ވޯޓެވެ. ތިންވަނައަށް އެންމެ ގިނަ ވޯޓު ލިބުނު ޕާޓީއަށް އެ ޕާޓީވާއިރު އެންމެ ގިނައިން ވޯޓު ހޯއްދަވައިގެން ދެވަނަ ބުރުގައި ވާދަކުރައްވަނީ ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒު އާއި އެމްޑީޕީގެ ކެންޑިޑޭޓް، އިބްރާހިމް މުޙައްމަދު ޞާލިހުއެވެ.