ރީ-ރަޖިސްޓްރޭޝަން ޕޯޓަލްގެ އެކްސެސް އެއްވެސް ބަޔަކަށް ނުލިބޭނެ، ހަޤީޤަތާއި ޚިލާފު ޚަބަރު ނުފަތުރާ - ހަބީބު

ރީ-ރަޖިސްޓްރޭޝަން ޕޯޓަލްގެ އެކްސެސް އެއްވެސް ބަޔަކަށް ނުލިބޭ ކަމަށާއި، ޕޯޓަލްއާ މެދު ޙަޤީޤަތާ ޚިލާފު ޚަބަރުތައް ނުފެތުރުމަށް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު އިލްތިމާސްކުރައްވައިފިއެވެ.

އިލެކްޝަންސް ކޮމިޝަންގެ ނާއިބްރައީސް މިފަދައިން ވިދާޅުވެފައިވަނީ ރިޔާސީ އިންތިޚާބުގެ ދެ ވަނަ ބުރުގައި ރީ-ރަޖިސްޓްރީ ވުމަށް ދެ ދުވަހުގެ ތެރޭގައި 25،000 މީހުން ރަޖިސްޓްރީ ވެފައިވާ ކަމަށް އެ ކޮމިޝަނުން ބުނުމާއެކު، އެކި ކަހަލަ ފާޑުކިޔުންތައް އަމާޒުވެ އިންތިޚާބު އޮޅުވާލަން މަސައްކަތް ކުރަމުންދާކަމުގެ ތުހުމަތުތައް އިދިކޮޅުން ކުރަމުން އަންނަނިކޮށެވެ. މީގެ އިތުރުން ރީރަޖިސްޓްރޭޝަންގެ އެކްސެސް، އިލެކްޝަންސް ކޮމިޝަންގެ ކުރީގެ މެންބަރަކަށް ދީފައިވާ ކަމުގެ ތުހުމަތު ވެސް ދަނީ ކުރަމުންނެވެ.

މިކަމަށް ރައްދުދެއްވާ ހަބީބުކުރެއްވި ޓްވީޓެއްގައި ވިދާޅުވީ ރިޔާސީ އިންތިޚާބުގެ ރީ-ރަޖިސްޓްރޭޝަން ޕޯޓަލްގެ އެކްސެސް، އިލެކްޝަންސް ކޮމިޝަނުގެ ކުރީގެ މެންބަރަކަށް ނުވަތަ ކަމާ ނުބެހޭ އެއްވެސް ފަރާތަކަށް ދީފައި ނޯންނާނެ ކަމަށެވެ. ރިޔާސީ އިންތިޚާބުގެ ރީ-ރެޖިސްޓްރޭޝަން އޮންލައިން ޕޯޓަލް ހެކް ކުރުމަށް ބޭރުން މަސައްކަތްކޮށް، އެޓޭކްތަކެއް ދޭން އުޅުނަސް އެކަން ދެނެގަނެ، ޙައްލުކުރުމުގެ ޤާބިލުކަން އީސީގައި ޤާއިމްކޮށްފައި ހުންނާނެ ކަމަށްވެސް ހަބީބު ވިދާޅުވިއެވެ.

ހަބީބު ވަނީ ރީ-ރަޖިސްޓްރޭޝަން ޕޯޓަލްއާ މެދު ޙަޤީޤަތާ ޚިލާފު ޚަބަރުތައް ނުފެތުރުމަށް އިލްތިމާސްކުރައްވާފައެވެ.

މި މަހު ބާއްވާ ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރީ -ރަޖިސްޓްރީވުމަށް ހުޅުވާލި ފުރުސަތުގައި ދެ ދުވަހުގެ ތެރޭގައި 25،000 އަށްވުރެ ގިނަ ފޯމު ވަނީ ހުށަހަޅާފައެވެ. އަދި މިއާއެކު އިދިކޮޅުން އަންނަނީ ގިނަ އަދަދެއްގެ ބަޔަކު ރީ-ރަޖިސްޓްރީކުރުމަށް ހުށަހަޅާފައިވާތީ، އެއީ އިންތިޚާބު އޮޅުވާލުމަށް ކުރަމުން އަންނަ މަސައްކަތެއްކަމަށް ބުނެ ޝަކުވާކުރަމުންނެވެ. މީގެ އިތުރުން ތަފާތު ލިޔުންތައް ތައްޔާރުކޮށް އަންނަނީ ދައުރުކުރަމުންނެވެ.

ރިޔާސީ އިންތިޚާބުގެ ދެވަނަ ބުރުގައި ރީ-ރަޖިސްޓްރީވުމުގެ ފުރުސަތު އީސީން ހުޅުވާލާފައިވަނީ ތިން ދުވަހުގެ މުއްދަތަކަށެވެ. އެގޮތުން ހުކުރު ދުވަހުގެ މެންދުރު 3:00 އިން ފެށިގެން އަދީއްތަ ދުވަހުގެ ހަވީރު 4:00 އާ ހަމައަށް ފުރުސަތު ހުޅުވާލިއެވެ.

މި މަހުގެ ނުވަ ވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ވޯޓުލުމުގެ ޙައްޤު 282,395 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 408 މީހުންނާއެކު ޖުމްލަ 282,803 މީހުންނަށް ވޯޓުލުމުގެ ޙައްގު ލިބިގެންވެއެވެ.