މޭޖާ ލީގު ސޮކާ (އެމެރިކާ ލީގު) ގައި ސްޕޯޓިން ކޭސީއާ ދެކޮޅަށް ކުޅުނު މެޗުން އިންޓަ މިއާމީ މޮޅުވެއްޖެ އެވެ.
އާދިއްތަ ދުވަހުގެ ހެނދުނު ކުޅުނު މެޗު މިއާމީން ކާމިޔާބު ކުރީ 3-2 އިންނެވެ. މެޗު ފަށައިގެން ނުވަ ވަނަ މިނެޓުގައި ލަނޑު ޖަހައި ލީޑު ނެގީ ސްޕޯޓިން އިންނެވެ. އެ ޓީމަށް ލީޑު ނަގައިދިނީ ޑެނިއެލް ސާލޮއީ އެވެ. ނަމަވެސް އޭގެ ފަހުން 25 ވަނަ މިނެޓުގައި މިއާމީން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ލިބުނު ޕެނަލްޓީއެއް ކާމިޔާބުކޮށް، ނަތީޖާ ހަމަހަމަ ކުރީ ލިއާންޑްރޯ ކަމްޕަނާ އެވެ. ފުރަތަމަ ހާފުގެ 45 ވަނަ މިނެޓުގައި ކަމްޕަނާ ވަނީ އިތުރު ލަނޑެއް ޖަހައި މިއާމީ އަށް ލީޑު ނަގައިދީފަ އެވެ. އެ ލަނޑު އޭނާ ޖެހީ ދިއާންދްރޭ ޔެޑްލިން ތަނަވަސްކޮށްދިން ފުރުސަތެއްގަ އެވެ. ދެ ވަނަ ހާފު ފަށައިގެން މިއާމީން ވަނީ ތިން ވަނަ ލަނޑެއް ޖަހައިފަ އެވެ. މެޗުގެ 60 ވަނަ މިނެޓުގައި ސާޖިއޯ ބުސްކެޓްސް ތަނަވަސްކޮށްދިން ހިތްގައިމު ފުރުސަތެއްގައި އެ ލަނޑު ޖަހައިދިނީ ފަކުންޑޯ ފާރިއާސް އެވެ. އެގެ ފަހުން ސްޕޯޓިން އިން އެ ޓީމުގެ ދެ ވަނަ ލަނޑު ޖެހީ 78 ވަނަ މިނެޓުގަ އެވެ. އެ ލަނޑު ޖަހައިދިނީ އާލަން ޕުލިޑޯ އެވެ.
މި މެޗުގައި މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ކުޅެފައެއް ނުވެ އެވެ. މިވަގުތު މެސީ ހުރީ ޤައުމީ ޓީމާއެކު ފީފާ ވޯލްޑް ކަޕް ކޮލިފިކޭޝަންގެ މެޗުތައް ކުޅުމަށެވެ. އެމެރިކާ ލީގުގައި ދެން މިއާމީ އަށް އޮންނާނީ އެޓަލަންޓާ ޔުނައިޓެޑާ ދެކޮޅަށް، ސެޕްޓެމްބަރު މަހުގެ 17 ވަނަ ދުވަހު ކުޅޭ މެޗެވެ.
