އެކްސިޑެންޓުގައި ލޮލުގެ ފެނުން ގެއްލުނު 6 ދަރިންގެ ބައްޕަ: ލިބޭ މިންވަރަށް ޝުކުރު ކުރުމުގައި ސަޢީދަކީ ނަމޫނާއެއް!

ދިރިއުޅުމަކީ ހީވެސް ނުކުރާ ފަދަ ގޮތްގޮތަށް ބަދަލުވެގެންދާ، ޤުދުރަތުގެ ފުރިހަމަ ނިޒާމެކެވެ. ހިތްދަތި ކަމެއް ދިމާވާ ހިނދު، އެއީ އިންތިހާ މާޔޫސްކަން ކުރިމަތި ކުރުވާ ކަމަކަށް ވީ ނަމަވެސް، ދިރިއުޅުމުގެ ހަލަބޮލިކަމުން ހަވާސާ ވެލާ، ހިންދެމިލުމަށް ފަހު ވިސްނަލައިފިނަމަ، އެކަމުގައިވެސް ހެޔޮ ރަޙުމަތެއް މެނުވީ ނުވާކަން ޤަބޫލު ކުރެވެއެވެ.

6 ދަރިންގެ ބައްޕަ، ސަޢީދު އަބޫ ހަސީރާގެ ދިރިއުޅުންވެސް ހުއްޓުމަކަށް އައެވެ. އެއީ އޭނާގެ ލޮލުގެ ފެނުން ގެއްލި، ކަނާތުގެ 3 އިނގިލި ބުރިވި ހިސާބުންނެވެ. ސަޢީދަށް އެފަދަ ހާލަތެއް މެދުވެރިވީ އެއްޗެއް ގޮވައިގެން ހިނގި ވަރުގަދަ އެކްސިޑެންޓެއްގައެވެ.

ޢާއިލާގެ ހުރިހާ ޒިންމާއެއް ކޮނޑު އަޅައިގެން ހުރި މީހަކީވެސް ސަޢީދުއެވެ. މާލީ ގޮތުން އެ ޢާއިލާގެ ހުރިހާ ކަމެއް ބަލަހައްޓަން ހުރި މީހަކީވެސް ހަމަ އޭނާކަމުން، އެ ހާލުގައިވެސް ދިރިއުޅުމައިގެން ކުރިއަށް ދިއުމަށް ޢަޒުމު ކަނޑައެޅިއެވެ. ސަޢީދު ނިންމީ، މަގުމަތީގައި އެއްޗެހި ވިއްކުމުގެ މަސައްކަތަށް ނުކުތުމަށެވެ. ސަޢީދުގެ މަސައްކަތަކަށް ވީ، ބޭކަރީތަކުގެ ބޭރާއި، މަގު ހިނގާ މީހުންނަށް ކުދީނާ ފަތް ވިއްކުމެވެ.

ޢުމުރުން 45 އަހަރުގެ ސަޢީދު ކުރިން ކުރަމުން އައި މަސައްކަތަކީވެސް މަގުތަކަށް ބިނާވެފައި އޮތް މަސައްކަތެކެވެ. ހިމާރު ގާޑިޔާއެއްގައި ބާދަގަނޑު އެއްކޮށް، އެ ވިއްކުމުގެ މަސައްކަތުގައި އުޅެމުން ދިޔައެވެ. އެއީ މީގެ 4 އަހަރު ދުވަސް ކުރިއެވެ. ބާދަގަނޑު ކަމަށް ހިތާ ސަޢީދު ނެގި ސިލިންޑަރު ވީ ނުގޮވާ އޮތް ހަތިޔާރަކަށެވެ. އެ ސިލިންޑަރު ގޮވާ، ސަޢީދުގެ 2 ލޮލާއި، އަތްވެސް ޒަޚަމްވިއެވެ.

ފަލަސްޠީނުގެ އެންމެ ތޮއްޖެހިފައި ވާ އެއް ސިޓީ ކަމަށް ވާ ޣައްޒާގެ ބޭކަރީއެއްގެ ބޭރުގައި ހުރެ، ކަސްޓަމަރުންގެ ސަމާލުކަން ހޯދުމަށް "1 ޝެކްލް (0.26 ޑޮލަރު) އަށް ކުދީނާ ފަތް ކޯޅިއެއް" މިހެން ގޮވަމުން ސަޢީދު ދިޔައިރު، އޭނާގެ ފިރިހެން ދަރިފުޅުވެސް، ގާތުގައި ހުއްޓެވެ.

ޣައްޒާގެ ރަށްވެހިންނަކީ ކުދީނާ ފަތަށް ލޯބި ކުރާ ބައެކެވެ. ސައިގެ އިތުރުން އެކި ކަހަލަ ކޭންތައް ތައްޔާރުކޮށް ރަހަ ހެޔޮވަރު ކުރުމަށްވެސް ކުދީނާ ފަތް ބޭނުން ކޮށް އުޅޭ ބައެކެވެ. ބަނޑާއި ގޮހުރުގެ އުނދަގޫތަކަށް ލުޔެއް ލިބޭތޯ، ކުދީނާ ފަތް، ފެނު ކައްކައިގެން އެ ބޮއެ ހަދާ ބައެކެވެ.

ޣައްޒާގެ ދޭސީ ތަޖުރިބާކާރުން ބުނާ ގޮތުގައި ޣައްޒާގައި ލޮލުގެ ފެނުމުން މަހުރޫމުވެފައި ވާ 14000 އެއްހާ މީހުން ދިރިއުޅެއެވެ. އެއީ 2.3 މިލިއަން މީހުންގެ އާބާދީއެއް އޮތް ޣައްޒާ ސިޓީގައި ދިރިއުޅޭ ނުކުޅެދޭ މީހުންގެ 28 އިންސައްތައެވެ.