ހަނިއްޔާ ޝަހީދު ކޮށްލުން، ދިވެހި ސަރުކާރު އޮތީ އިޒްރޭލާ އެކުގައި ކަމެއް ފަލަސްތީނާ އެކުގައި ކަމެއް ނޭގުނު!

ބުދަ ދުވަހަށް އަލިވިލިގެން އައީ މުޅި ދުނިޔެ ސިއްސައިގެންދާ ފަދަ ބޮޑު ޚަބަރަކާ އެކުގައެވެ.

އެ ޚަބަރަކީ ހަމާސްގެ ސިޔާސީ ލީޑަރު އިސްމާއީލް ހަނިއްޔާ އީރާނުގައި ހުންނަވަނިކޮށް ޔަހޫދީ ދައުލަތުން ހަމަލާދީ ކުށްލި ގޮތަކަށް އަވަހާރަ ކޮށްލި ޚަބަރެވެ.

ހަނިއްޔާ ޝަހީދު ކޮށްލި ޚަބަރާއެކު ދުނިޔޭގެ އެތައް މިތަނުން އިޒްރޭލުގެ އެ އަމަލު ހަރުކަށި އިބާރާތުން ކުށްވެރި ކުރަމުން ގެންދިޔައެވެ. އޭގެ ތެރޭގައި މުސްލިމް ގައުމުތަކާއި އެނޫން ގައުމުތައްވެސް ހިމެނޭ ގޮތުގައެވެ. ރަޝިއާ، ޗައިނާ، ތުރުކީ، މެލޭޝިއާ، ގަތަރު ފަދަ ގައުމުތަކުން ގޮސް ރާއްޖެ އާ އަވައްޓެރި ސްރީލަންކާގެ ރައީސްވެސް ވަނީ ހަނިއްޔާ އަވަހާރަ ކޮށްލުމުގެ ހަމަލާ ކުށްވެރި ކުރައްވާފައެވެ.

ހަމަލާގެ ހާދިސާ އާ ވަރަށް ގާތުގައި ރާއްޖޭގެ އެންމެ އިސްވެރިންގެ ފެންވަރުގައި ބޭފުޅުން ތިއްބެވި ނަމަވެސް އެބޭފުޅުންނަކަށް އެ މަންޒަރު ފެންނަ ކަމަކަށް ނުވިއެވެ. ހަނިއްޔާ އަވަހާރަ ކޮށްލި ނިރުބަވެރި އަމަލު ކުށްވެރި ކުރި ގައުމުތަކުގެ ލިސްޓަކަށް ރާއްޖެއެއް ނޭރިއެވެ.

އިޒްރޭލުން ހަނިއްޔާ އަވަހާރަކޮށްލަން ހަމަލާ ދިން ދަނޑިވަޅާ ދިމާވީ ރާއްޖޭގެ އިސްވެރިއަކު އީރާނަށް ދަތުރު ނުކުރައްވާތާ އެތައް ދުވަހެއް ފާއިތުވީ ފަހުން ރާއްޖޭގެ މަތީ ފަންތީގެ ވެރިއެއްގެ ހައިސިއްޔަތު ނައިބު ރައީސް ހުސެއިން މުހައްމަދު ލަތީފް އީރާނަށް ވަޑައިގެން ހުންނަވަނި ކޮށްނެވެ.

2016 ވަނަ އަހަރު އީރާނާ އެކު އޮންނަ ސިޔާސީ ގުޅުން ރާއްޖެއިން ކަނޑާލުމަށް ފަހު، 2023 ވަނަ އަހަރުގެ މާޗް މަހުގެ 10 ވަނަ ދުވަހު އަލުން ގުޅުން ގާއިމް ކުރި ފަހުން، ރާއްޖޭގެ ނައިބު ރައީސް އީރާނަށް ވަޑައިގަތީ ހަނިއްޔާ ވެސް ވަޑައިގެންނެވި އީރާނުގެ އައު ރައީސް މަގާމުގެ ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގަތުމަށެވެ.

ހީނަރުވެފައިވާ ސިޔާސީ ގުޅުން ނައިބު ރައީސްގެ މި ދަތުރުފުޅުގެ ސަބަބުން ބަދަހި ވާނެ ކަމަށް އުއްމީދު ކުރެވިފައި ވިޔަސް، އީރާނުގެ ފަސްގަނޑަށް ބޭރުގެ ގައުމަކުން ހަމަލާ އެއް ދިނުން އެއީ ކުށްވެރި ކުރަން ޖެހޭ ކަމެއް ކަމަކަށް ދިވެހި ސަރުކާރަކަށް ނުފެނުނެވެ. އެއް ގައުމުން އަނެއް ގައުމަށް ކްރޮސްބޯޑަރ ހަމަލާތައް ދިނުމަކީ އަދި ވަކިން ޚާއްސަކޮށް ސިޔާސީ ފަރާތަކަށް ޓާގެޓް ކޮށް މަރުގެ ހަމަލާ ދިނުމަކީ ބައިނަލް އަގްވާމީ ގާނޫނުތަކުން ކަނޑައެޅިގެން މަނާ ކަމެއް ކަމުގައި ވިޔަސް ރާއްޖޭއިން ނިންމީ އިޒްރޭލުގެ ހަމަލާ އަށް އެއްޗެއް ނުބުނެ ހަނު ހުންނާށެވެ.

ކޮންމެއަކަސް ހަނިއްޔާ އަވަހާރަކޮށްލުމުގެ އުފާ އިޒްރޭލުގައި ދަނީ ފާހަގަކުރަމުންނެވެ. މަގުތަކުގައި ހިލޭ ފޮނިކާއެއްޗެހި ޔަހޫދީން ގެންދަނީ ބަހަމުންނެވެ. ހީވަނީ ބޮޑު އީދެއް އައިސްގެން އުޅޭހެންނެވެ. އަނެއްކޮޅުން ފަލަސްތީނުގެ ރައްޔިތުން ދެކޭ ގޮތުގައި ގެއްލިގެން އެ ދިޔައީ އެމީހުންނަށް ޓަކައި އެތައް ގުރުބާނެއްވީ ލީޑަރެކެވެ. ހެޔޮ މިޒާޖެއްގެ އެންމެންނާ ވެސް ގުޅޭ ފަލަސްތީނުގެ އެތައް ބައެއްގެ ލޯބި ހޯދާފައިވާ ހިތްވަރުގަދަ ފަހުލަވާނެކެވެ.

މިއީ ފަލަސްތީނު ރައްޔިތުންނާ އެކުގައި ތިބިކަން ހާމަކޮށްދޭން ސަރުކާރަށް ލިބުނު ފުރުސަތެއް ނޫން ބާވައެވެ؟ ޓެރަރިޒަމް އާއި ގައުމުތަކުގެ އިސްތިގްލާލަށް އަރައިގަތުން ކުށްވެރިކުރަން ޖެހޭ ހާދިސާ އެއް ނޫން ބާވައެވެ؟ މިއީ މިނިވަން ކަމާއެކު ބަސް ބުނާ ގައުމެއްކަން ދައްކާލަން ލިބުނު ފުރުސަތެއް ނޫން ބާވައެވެ؟

ސުވާލުތަކުގެ ޖަވާބު ފެންނަން އޮތްލެއް ސާފު ކަމުން ފަލަސްތީނުގެ ދިފާއުގައި އަދި ފަލަސްތީނުގެ ރައްޔިތުންގެ ހައްގުގައި ދިވެހި ސަރުކާރުން އަބަދުވެސް ދެމި އޮންނަމޭ މި ބުނާ ބަހުގެ މާނަ އަކީ ވެސް ތާކުންތާކުން ނުޖެހޭ އެއްޗެއް ކަން އެނގިއްޖެއެވެ. އެ ބުނާ މިނިވަންކަމާ އެކު ބަސް ބުނުމުގެ މިނިވަންކަން އޮތް ސަރުކާރެކޭ ބުނެވޭނެ ޖާގަވެސް ނެތިއްޖެއެވެ. މިކަންވެސް މިދިޔައީ އިޒްރޭލް ޕާސްޕޯޓަށް ވީގޮތް ވެގެންނެވެ. ހުސް ވާހަކަ ދައްކާފައި ތާކުން ތާކުން ނުޖެހިއެވެ.

ހަނިއްޔާ އަވަހާރަކޮށްލުމުގެ ހާދިސާ ހިނގުމުން އިންސާފާ ހަމައަށް ލޯބިކުރާ އަދި ފަލަސްތީނު ރައްޔިތުންނާ މެދު ހަމްދަރުދީ އޮންނަ އާންމުންގެ އެތައް ބަޔަކު އިންޓަނެޓްގައި އިޒްރޭލުގެ އެ އަމަލު ކުށްވެރިކޮށް ޝުއޫރު ފާޅު ކުރަމުން ދިޔައިރު ދިވެހި ސަރުކާރަށް ކަމެއް ދުނިޔޭގައި ހިނގައިގެން އުޅޭހެން ހީވެސް ނުވިއެވެ.

މީގެ އަރަތަކީ ފަލަސްތީންގެ ހައްގުގައި އޮތްކަމަށް ބުނެފައި، މިނިވަން އެހެން ގައުމެއްގެ ސިޔާދަތު ފޫ އަޅުވާލުމަށް ފަހު ނިރުބަވެރި ހަމަލާދީ ފަލަސްތީނުގެ އިސް ލީޑަރަކު ޝަހީދު ކޮށްލުން އެއީ ކަމަކަށް ނުވާ ކަމެވެ. ދެން ކަމަކަށް ވާނީ ކޮން ކޮންކަމެއް ބާވައޭ ހިތައް ނާރާ ވަރެއްވެސް ނޫނެވެ.

ގުޅުން އޮންނަ ދޭދޭ ގައުމުތަކުގެ މެދުގައި އާންމުކޮށް ކަން ހިނގާ މޭރުމުން ވިސްނިޔަސް ހަނިއްޔާ އަވަހާރަ ކޮށްލުމުން އެކަން ކުށްވެރި ކުރާނެ ކަން ޑިޕްލޮމެސީގެ ހަމަތަކުން ވިސްނާލިޔަސް ދޭހަވެއެވެ. ހަނިއްޔާ އަކީ ފަލަސްތީނުގެ ބޮޑު ވަޒީރުކަން ކުރައްވާފައިވާ ބޭފުޅެކެވެ. ދިވެހި ރާއްޖެއިން ފަލަސްތީނަކީ މިނިވަން ގައުމެއްގެ ގޮތުގައި ބަލައިގަނެއެވެ. ހަނިއްޔާ އަކީ އަސްކަރީ ވެރިއެއް ނޫނެވެ. އަނެއްކޮޅުން އޭނާ އަވަހާރާ ކޮށްލި އިރު އެއީ ގާޒާގެ އެތައް މިލިއަން ފަލަސްތީން ރައްޔިތުންގެ ކަންކަން ބެލެހެއްޓުމަށް އުފައްދާފައިވާ ސަރުކާރު ހިންގާ ހަމާސްގެ ސިޔާސީ އެންމެ އިސް ލިޑަރެކެވެ. ފަލަސްތީނުގެ މިނިވަންކަމާއި ފަލަސްތީނު ރައްޔިތުންގެ ހައްގުގައި ދިގު މުއްދަތަކަށް ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ. ފަލަސްތީނުގެ ރައްޔިތުން ދެކޭ ގޮތުގައި އޭނާ އަކީ ހަމަ އެކަނި ހަމާސް ގެ ލީޑަރެއް ނޫނެވެ. އެއީ ފަލަސްތީނުގެ ވެސް ލީޑަރެކެވެ.

މި ކަމުގައި ހަނުއޮތުމަކީ މާ ސްމާޓް ގޮތެއް ނޫނެވެ. އެއީ ޝައްކެއްވެސް ނެތް ގޮތުގައި ޖަރީމާ ހިންގި އިޒްރޭލަށް ލިބޭނެ ހިތްވަރެކެވެ. އެއީ އަނިޔާ ލިބުނު ފަރާތައް ހަމްދަރްދީ ވުމުގެ ބަދަލުގައި އަނިޔާ ދިން ފަރާތައް ހަމްދަރުދީ ވުމެވެ. ރަތްރޮނގޭ މިނިވަންކަމޭ އިސްތިގްލާލޭ ކިޔަނީއެވެ. ފެންނަ މަންޒަރަކީ އެއްޗެއް ބުނަނަ ޖެހޭ ވަގުތު އެކަން ނުކުރެމުވެ. ފިނޑިވުމެވެ. ސިއްރުން ކޮންވެސް ބައެއްގެ ދަށުވެފައި އޮތުމެވެ. މުސްލިމް ދިވެހި ރައްޔިތެއްގެ ގޮތުން ބުނާން ޖެހެނީ ހަނިއްޔާ ޝަހީދު ކޮށްލި ހާދިސާ ގައި، ދިވެހި ސަރުކާރުން އޮތީ އިޒްރޭލާ އެކުގައި ކަމެއް ފަލަސްތީނާ އެކުގައި ކަމެއް ފާޅުގައި އެނެގެން ނެތް ކަމެވެ.