ހަނިއްޔާ އަވަހާރަ ކޮށްލަން މާ ކުރިން ގެސްޓްހައުސް ތެރޭގައި ގޮވާތަކެތި ފޮރުވާފައި ހުރި: ނިއުޔޯކްޓައިމްސް

ހަމާސް ގެ ސިޔާސީ އެންމެ އިސް ލީޑަރ އިސްމާއީލް ހަނިއްޔާ އަވަހާރަ ކޮށްލަން އޭނާ ތެހެރާނުގައި ހުންނެވި ގެސްޓް ހައުސްގެ ތެރޭގައި ގޮވާތަކެތި ފޮރުވާފައި ހުރި ކަމަށް ނިއުޔޯކް ޓައިމްސް އިން ބުނެފިއެވެ.

މެދުއިރުމަތީގެ އަދި އެމެރިކާގެ އޮފިޝަލުންނާ ހަވާލާދީ ބުރާސްފަތި ދުވަހު ނިއުޔޯކް ޓައިމްސްގައި ޝާއިއު ކުރި ރިޕޯޓެއްގައި ބުނެފައިވަނީ ބުދަ ދުވަހުގެ ހާދިސާ ހިނގުމުގެ ދެ މަސް ދުވަސް ކުރިން އިމާރާތުގެ ތެރެއަށް ބޮމެއް ސްމަގްލް ކޮށްގެން ވައްދާފައިވާ ކަމަށެވެ. އަދި ބޮން ގޮއްވާލީ ހަނިއްޔާ ކޮޓަރީގައި ހުންނެވި ކަން ޔަގީން ވުމުން ރިމޯޓް ކޮށް ކަމަށްވެސް ބުނެފައިވެއެވެ.

ތެހެރާން ގައި ހަނިއްޔާ ހުންނެވި ގެސްޓް ހައުސް އަކީ ތެހެރާންގެ އުތުރު ގައި ނިޝާތު ނަމަކަށް ކިޔާ ކޮމްޕައުންޑެއް ގައި ހުރި ގެސްޓް ހައުސް އެކެވެ. އެތަނަކީ އީރާނުގެ އިސްލާމިކް ރިވޮލިއުޝަނަރީ ގާޑުން ހިމާޔަތް ކޮށް ބަލަހައްޓާ އިމާރާތެއް ކަމަށް ވެސް ނިއުޔޯކް ޓައިމްސްގައި ބުނެފައިވެއެވެ.

މީގެ ކުރިންވެސް ތެހެރާން އަށް ހަނިއްޔާ ކުރެއްވި ދަތުރުތަކުގައި އެތައް ފަހަރެއްގެ މަތިން އެ ގެސްޓް ހައުސްގައި އޭނާ ހުންނެވި ކަމަށް މި ރިޕޯޓްގައި ވެއެވެ.

ނިއުޔޯކް ޓައިމްސް އިން ބުނެފައިވަނީ މި ހަމާލާގެ ފަހަތުގައި ވަނީ އިޒްރޭލު ކަމަށާއި، މި ހާދިސާ ހިނގިތާ ކުޑަ ވަގުތު ކޮޅެއްގެ ތެރޭގައި އިޒްރޭލުގެ ޖާސޫސީ އޮފިޝަލުން އެމެރިކާ އާއި ހުޅަނގުގެ ގައުމުތަކުގެ ކަމާބެހޭ އޮފިޝަލުންނަށް ހާދިސާގެ މައުލޫމާތު ހިއްސާ ކުރި ކަމަށެވެ.

އީރާން އާއި ހަމާސް އިން ވަނީ މިއީ އިޒްރޭލުން ދިން ހަމަލާ އެއް ކަމަށް ބުނެފައެވެ. އެހެން ނަމަވެސް އިޒްރޭލުން ހަމަލާ އާ ބެހޭ ގޮތުން ސީދާ ގޮތުން އެއްޗެއް ނުބުނެއެވެ.

ހަނިއްޔާ ހުންނެވި އިމާރަތަކީ އީރާނުގެ އަސްކަރިއްޔާ އިން ބަލަހައްޓާ އިމާރާތަކަށް ވުމުގެ އިތުރުން މި ތަނަކީ ސިއްރު ބައްދަލުވުންތަކާއި، މުހިންމު މެހުމާނުންނަށް މެހުމާންދާރީ ދޭ ތަނަކަށް ވުމާއެކު މި ހާދިސާ އަކީ އީރާނަށް ކުރިމަތިވި ވަރަށް ބޮޑު ފެއިލިއަރ އެއް ކަމަށް އީރާނު އޮފިޝަލުން ބުނެފައިވާ ކަމަށް ވެސް ނިއުޔޯކް ޓައިމްސް ގައި ވެއެވެ.

މި ހާދިސާ އާ ގުޅިގެން އީރާނުގެ ރޫހާނީ ލީޑަރ އަލީ ޚާމަނާއީ ވަނީ ސީދާ ހަމަލާ އިޒްރޭލަށް ދިނުމަށް އީރާނުގެ އަސްކަރިއްޔާ އަށް އަންގަވާފައި ކަމަށް އީރާނުގެ އޮފިޝަލުންނާ ހަވާލާދީ ނިއުޔޯކް ޓައިމްސް ގައި ބުނެފައިވެއެވެ.

އިސްމާއީލް ހަނިއްޔާ އަވަހާރަ ކޮށްލީ އީރާނުގެ އައު ރައީސް މަސްއޫދު ޕެޒެޝްކިއާން ރައީސް ކަމުގެ ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގަތުމަށް ތެހެރާން އަށް ވަޑައިގެން ހުންނަވަނިކޮށްނެވެ.