އިޒްރޭލުން ދިން ޙަމަލާ ކުށްވެރިކޮށްލަން ކެރިވަޑައިނުގަތް، މިއީ މިނިވަން ޚާރިޖީ ސިޔާސަތު؟
1 އޯގަސްޓު 2024 | ބުރާސްފަތި 08:48ފަލަސްތީނު މިނިވަން ކުރުމަށްޓަކައި ހަމާސް އިން އިޒްރޭލާ ކުރަމުން އަންނަ ހަނގުރާމަ ޓެރަރިޒަމާ ގުޅުވައިގެން ނުވާނެކަމަށް ވަރަށް ސާފުކޮށް ރައީސް ވިދާޅުވެފައިވޭ، އެއީ ރައީސް ކަމުގެ ހުވާ ކުރެއްވުމުގެ ކުރިންނެވެ.
އިޒްރޭލު ޕާސްޕޯޓު މަނާ ކުރުމުގެ މައްސަލައިގައިވެސް ސަރުކާރުން ފަހަތު ފަޔަށް ބުރަވި
ވެރިކަމުގެ ހުވާ ކުރައްވަން އެންމެ ދުވަހަކަށް ވެފައި ވަނިކޮށް ޗެނަލް ނިއުސް އޭޝިއާ'އަށް ދެއްވި އިންޓަވިއުއެއްގައި ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވަނީ ފަލަސްތީނު މިނިވަން ކުރުމަށްޓަކައި ހަމާސް އިން އިޒްރޭލާ ކުރަމުން އަންނަ ހަނގުރާމަ ޓެރަރިޒަމާ ގުޅުވައިގެން ނުވާނެކަމަށް ވަރަށް ސާފުކޮށް ވިދާޅުވެފައެވެ.
ފަލަސްތީނު މިނިވަން ކުރުމަށް ޙަމާސް ޖަމާއަތުން ކުރަމުންދާ މަސައްކަތް އެއީ އެއްވެސް ޙާލެއްގައި ޓެރަރިޒަމާ ގުޅުވައިގެންވާނެ ކަމެއް ނޫންކަމަށް އެ ދުވަހު އެ ވަނީ ވިދާޅުވެފައެވެ.
އެހެންކަމުން މިއަދު އުފެދޭ ސުވާލަކީ ފަލަސްތީނުގެ ޙައްޤުގައި ވެރިކަމުގެ ފުރަތަމަ ކޮޅުގައި، ކެމްޕޭނުގައި އަދި ވެރިކަމުގެ ހުވާ ކުރެއްވުމުގެ އެއް ދުވަސް ކުރިން އެ ދެއްކެވިހާ ވާހަކަތައް މިއަދު ކޮބައިބާއެވެ. ހުރިހާ ދިމާލަކުންވެސް ފެންނަނީ އެ ދުވަހު ދެއްކެވި ވާހަކަފުޅުގެ އެއްވެސް އިހުލާސްތެރިކަމެއް ނެތް ކަމެވެ.
ހަމާސް ޖަމާއަތުން ކުރާ މަސައްކަތަކީ ޓެރަރިޒަމާ ގުޅުވޭނެ ކަމެއް ނޫންކަމަށް އިންތިޚާބީ ރައީސްކަމުގައި ހުންނަވައި ރައީސް އެ ވަނީ ވިދާޅުވެފައެވެ. އެހެންވިއްޔާ މިއަދު އެ ޖަމާއަތުގެ އެންމެ އިސް ލީޑަރު އިސްމާއިލް ހަނިއްޔާ އަވަހާރަ ކޮށްލުމުންވެސް ކުޑަމިނުން އެކަން ކުށްވެރިކޮށްނުލައްވައި ރައީސް ހުންނަވަނީ ކީއްވެބާއެވެ.
ދާދި ފަހުން އެމެރިކާގެ ރައީސް ޑޮނަލްޓް ޓްރަމްޕު އަވަހާރަ ކޮށްލަން މީހަކު ދިން ހަމަލާއަށް ބަލާއިރު، ކުޑަ ވަގުތުކޮޅެއްގެ ތެރޭގައި ރައީސް ވަނީ އެ ހަމަލާ ކުށްވެރި ކުރައްވާފައެވެ. އަނިޔާވެރިކަމަށް ޖާގަ ދެވިގެން ނުވާނެކަމަށް ވިދާޅުވެފައެވެ.
ނުވިތާކަށް ހަނިއްޔާ އަވަހާރަ ކޮށްލެވުނު ދުވަހު ރައީސް ވަނީ އަވައްޓެރި އިންޑިއާގައި ބިންގަނޑު ކަނޑައިގެން ދިއުމުގެ ސަބަބުން ހިނގި ޙާދިސާއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީއަށްވެސް ތައުޒިޔާ ވިދާޅުވެ ހަމްދަރުދީގެ މެސެޖެއް ފޮނުއްވާފައެވެ.
އިންޑިއާގެ ބޮޑުވަޒީރަށް ފޮނުއްވެވި މެސެޖުގައި ރައީސް ވަނީ އެ ޚަބަރާއެކު، ފުން ހިތާމައެއް ލިބިވަޑައިގަތްކަން ހާމަކުރައްވާފައެވެ. އެއީ ހިތްޕުޅަށްވެސް ގެންނަވަންދަތި ހިތާމަވެރި ހާދިސާއެއްގެ ގޮތުގައި އެ މަނިކުފާނު ސިފަކުރެއްވިއެވެ.
އޭރު އެކި ޤައުމުތަކުން ވަނީ ހަނިއްޔާ އަވަހާރަކޮށްލުމަށް ދިން ޙަމަލާ ކުށްވެރި ކުރައްވާފައެވެ. ނަމަވެސް ރާއްޖެއިން ހަމަ ބަހެއްވެސް ބުނެ ނުލައެވެ.
އެހެންކަމުން މިއަދު ގިނަ ބަޔަކު ގެންދަނީ އެކަމަށް ފާޑު ކިޔަމުންނެވެ. ސަރުކާރުން ދައްކާ ވާހަކައާ، އަމަލު ދިމާ ނުވާކަމަށް ބުނަމުންނެވެ. އޭގެ އަނެއް ހެއްކެއްގެ ގޮތުގައި ގިނަ ބަޔަކު ދައްކަނީ އިޒްރޭލު ޕާސްޕޯޓު މަނާ ކުރުމުގެ ބިލެވެ.
އެކަން ސަރުކާރަށް ކުރަން ނުކެރިގެން މިހާރު އެންމެ ފަހުން ވަނީ މަޖިލީހުގެ ކޮމިޓީއަކަށް އެ ބިލު ފޮނުވާފައެވެ. ކޮމިޓީގައި އެ ބިލު އޮންނަތާ 50ށް ވުރެ ގިނަ ދުވަސް ވެފައިވާއިރު، ރައީސް ވަނީ އެންމެ ފުރަތަމަ ދުވަހުން ފެށިގެން ވެސް ރާއްޖެ އޮތީ އަދި އޮންނާނީވެސް ފަލަސްތީނާ އެކުކަމަށް ވިދާޅުވެ، ރައްޔިތުންނަށް މަންޒަރު އޮޅުވާލެއްވެވޭތޯ މަސައްކަތް ކުރައްވާފައެވެ.
އެ ޙަމަލާ ކުށްވެރިކުރި ޤައުމުތަކުގެ ތެރޭގައި މުސްލިމު ނޫން ޤައުމުތައްވެސް ހިމެނެއެވެ. ވީއިރު ރާއްޖެއިން ކުޑަމިނުން އެކަމާ ބަހެއް ނުބުނަނީ ކޮން މަޖުބޫރުކަމެއް އޮވެގެންބާއެވެ.
ވަކިން ޚާއްސަކޮށް މި ސަރުކާރަކީ މިނިވަން، ސިޔާދަތީ ބާރު ލިބިގެންވާ ޚާރިޖީ ސިޔާސަތެއް އޮންނަކަމަށް ދައުވާ ކުރާ ސަރުކާރެކެވެ. ވެރިކަމަށް އައުމަށްވެސް އެންމެ އަޑުހަރުކޮށް ދެއްކި ވާހަކައަކީ އެއީއެވެ. ނަމަވެސް މިއަދު މި ފެންނަނީ ރާއްޖެއިން ކޮންމެވެސް ސަބަބަކާހުރެ، އެ ވިދާޅުވާ ޚާރިޖީ ސިޔާސަތު "ކޮމްޕްރޮމައިޒް" ކުރާ މަންޒަރެވެ. ކޮންމެވެސް ބައެއް ދެކެ ބިރުން އުޅޭ މަންޒަރެވެ. އެހެންވިމާ މިނިވަން، ޚާރިޖީ ސިޔާސަތެއް ނެތެއްނޫންތޯއެވެ؟
