ފަލަސްޠީނުގެ ދައުލަތް ބަލައި ގަންނަން ކާނީ ނިންމުމާ އެކު، ޓްރަމްޕް ނުރުހުން ވެއްޖެ

ކެނެޑާ އިން، ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާ ކަމަށް އެ ޤައުމުގެ ބޮޑު ވަޒީރު މާކް ކާނީ އިއުލާން ކުރެއްްވުމާ އެކު، އެމެރިކާގެ ރައީސް ޑޮނަލްޑް ޓްރަމްޕް ނުރުހުން ވެއްޖެ އެވެ.

ބުދަ ދުވަހުގެ ރޭ ކާނީ ވަނީ ފަލަސްޠީނުގެ މިނިވަން ދައުލަތް ބަަލައި ގަންނަން ކެނެޑާ އިން ނިންމާފައިވާ ކަމަށް ހާމަ ކޮށްފަ އެވެ. އަދި މިއަހަރުގެ ސެޕްޓެމްބަރު މަހު އޮންނަ އދ ގެ 80 ވަނަ ޖެނަރަލް އެސެމްބްލީގައި ފަލަސްޠީނުގެ މިނިވަން ދައުލަތް ކެނެޑާ އިން ޤަބޫލު ކުރާނެ ކަމަށް ބުނެފައިވެ އެވެ.

އެކަމާ ގުޅިގެން އެމެރިކާގެ ރައީސް ޓްރަމްޕް ވިދާޅުވެފައި ވަނީ ކެނެޑާ އަދި ކާނީގެ އެ ނިންމުމާ އެކު، ދެ ޤައުމުގެ ދެ މެދުގައި ވިޔަފާރީގެ އެއްބަސްވުމަކަށް އައުމަށް ދަތި ވާނެ ކަމަށެވެ. ނަމަވެސް ޓްރަމްޕްގެ އެ ވާހަކަތަކާ ގުޅިގެން ކެނެޑާގެ ބޮޑު ވަޒީރު ކާނީ އަދި އޭނާގެ އޮފީހުން ވެސް ވަކި އެެެއްޗެއް ބުނެފައި ނުވެ އެވެ. 

މިވަގުތު ކެނެޑާ އާއި އެމެރިކާ އިން މަސައްކަތް ކުރަމުން އަންނަނީ އޯގަސްޓު މަހުގެ އެއް ވަނަ ދުވަހުގެ ކުރިން ވިޔަފާރީގެ އެއްބަސްވުމަކަށް އައުމަށެވެ. އެހެން ނޫން ނަމަ، އެމެރިކާ-މެކްސިކޯ-ކެނެޑާ ވިޔަފާރީގެ އެއްބަސްވުމުގައި ނުހިމެނޭ ކެނެޑާގެ ހުރިހާ މުދަލަކުން 35 އިންސައްތައިގެ ޓެރިފް ނެގުމަށް ޓްރަމްޕް ވަނީ އިންޒާރު ދެއްވައިފަ އެވެ. 

މީގެ ކުރިން ބޮޑު ވަޒީރު ކާނީ ވިދާޅުވެފައި ވަނީ ޓެރިފްގެ މައްސަލައިގައި އެމެރިކާގެ ސަރުކާރާ އެކު ކުރިއަށް ގެންދަމުން އައި މަޝްވަރާތައް ދަނީ ވަރަށް ރަނގަޅަށް ކަމަށެވެ. އެހެން ނަމަވެސް، ކަނޑައަޅާފައިވާ ސުންގަޑިއާ ހަމައަށް، މަޝްވަރާތައް ނިމެނޭ ކަމުގެ ޔަޤީންކަން ނެތް ކަމަށް ވެސް ކާނީ ވިދާޅުވެފައިވެ އެވެ. 

ކެނެޑާގެ މި ނިންމުމަަށް އެމެރިކާ އިން ފާޑު ކިޔާފައިވާއިރު، ވަކިން ޚާއްސަކޮށް ޓްރަމްޕް ނުރުހުން ވެފައިވާއިރު، ކާާނީ އަށް އިތުރު ޕްރެޝަރަކާ ކުރިމަތިލާާން ޖެހޭނެ ކަމަށް ސިޔާސީ މަޝްރަހު ދިރާސާ ކުރާ ފަރާތްތަކުން ބުނެ އެވެ.