ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވާން މަސައްކަތް ކުރާތީ ތަމްރީން ނުކުރާނެ ކަމަށް އެއިންޓްރަކްޓް ފްރެންކްފާޓްގެ ފޯވާޑް ރަންޑަލް ކޯލޯ މުއާނީ ބުނެފި އެވެ.
އުމުރުން 24 އަހަރުގެ މުއާނީ ބުނީ ފްރާންސްގެ ޗެމްޕިއަނުންނަށް ބަދަލުވާން ބޭނުންވަނީ އެއީ އޭނާއަށް ލިބޭ ވަރަށް ހާއްސަ ފުރުސަތަކަށް ވާތީ ކަމަށެވެ. ޔޫރޮޕާ ކޮންފަރެންސް ލީގު ކޮލިފައިންގައި ބުރާސްފަތި ދުވަހު ލެވްސްކީ ސޯފިއާއާ ދެކޮޅަށް ކުޅޭ މެޗުގައި ފްރާންސްގެ މި އިންޓަނޭޝަނަލް ކުޅުންތެރިޔާ ބައިވެރިނުވާނެ އެވެ.
ފްރެންކްފާޓްގެ ސްޕޯޓިން ޑިރެކްޓަރު މާކަސް ކްރޮޝޭ ބުނީ ޓްރާންސްފާ ވިޔަފާރީގައި މި އަމަލުގެ އެއްވެސް އަސަރެއް ނެތް ކަމަށެވެ. ޖަރުމަނުގެ ކްލަބާއެކު 2027 ވަނަ އަހަރާ ހަމައަށް ހަދާފައިވާ މުއާނީގެ ކޮންޓްރެކްޓްގެ އަގަކީ 100 މިލިއަން ޔޫރޯ އެވެ.
އަންގާރަ ދުވަހު މުއާނީ ދިން އިންޓަވިއު އެއްގައި މުއާނީ ބުނީ، ޕީއެސްޖީން އޭނާއަށް ރެކޯޑް އަދަދެއް ހުށަހަޅާފައިވުމަކީ ސިއްރެއް ނޫން ކަމަށެެވެ. މިދިޔަ ސީޒަނުގައި ނާންޓޭސް އިން ފްރޭންކްފާޓަށް ބަދަލުވުމަށްފަހު މުއާނީ ވަނީ 50 މެޗުން 26 ލަނޑު ޖަހައިދީފައެވެ.
މުއާނީ ވަނީ ފްރާންސްގެ ގައުމީ ޓީމަށް ނުވަ މެޗު ކުޅެދީފައެވެ. މިދިޔަ އަހަރުގެ ވޯލްޑް ކަޕް ފައިނަލުގައި އާޖެންޓީނާ އާ ދެކޮޅަށް އޭނާ ކުޅެފައިވެއެވެ.
