އެސްޓަން ވިލާ އިން ބާންލީ ބަލިކޮށްފި

އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗު އެސްޓަން ވިލާ އިން ކާމިޔާބުކޮށްފި އެވެ.

ބާންލީގެ ދަނޑުގައި ކުޅުނު މެޗު އެސްޓަން ވިލާ އިން ކާމިޔާބު ކުރީ 3-1 އިންނެވެ. މެޗު ފަށައިގެން ތިން ވަނަ މިނެޓުގައި އެސްޓަން ވިލާ އަށް ލީޑު ނަގައިދިނީ މެޓީ ކޭޝް އެވެ. އެއީ އެ ޓީމުގެ އޮލީ ވަޓްކިންސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 20 ވަނަ މިނެޓުގައި މެޓީ ކޭޝް ވަނީ ދެ ވަނަ ލަނޑެއް ޖަހައި އެސްޓަން ވިލާގެ ލީޑު ފުޅާ ކޮށްދީފަ އެވެ. އެ ލަނޑު ޖަހަން އޭނާ އަށް އެހީތެރިވެދިނީ މޫސާ ޑިއާބީ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ބާންލީ އިން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ލީލް ފޮސްޓާ އެވެ. މެޗުގައި އެސްޓަން ވިލާގެ ތިން ވަނަ ލަނޑު 61 ވަނަ މިނެޓުގައި ޖެހީ މޫސާ ޑިއާބީ އެވެ.

މިއީ ލީގުގައި އެސްޓަން ވިލާ އިން ހޯދި ދެ ވަނަ މޮޅެވެ. ކުޅުނު ތިން މެޗުގެ ތެރެއިން އެއް މެޗުން އެ ޓީމު ވަނީ ބަލިވެފަ އެވެ. ތިން މެޗު ހޯދި ހަ ޕޮއިންޓާއެކު އެ ޓީމު އޮތީ ހަތް ވަނައިގަ އެވެ. އެސްޓަން ވިލާ އަތުން ބަލިވި ބާންލީ ވަނީ ކުޅުނު ދެ މެޗުން ވެސް ބަލިވެފަ އެވެ. އެ ޓީމު އޮތީ ލީގު ތާވަލްގެ 18 ވަނައިގަ އެވެ.