ގޮއިފުޅަފެހެންދޫ ފަޅުގައި ރިސޯޓެއް ތަރައްގީ ކުރައްވާނެ ކަމަށް، ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

"އުފާވެރި އަމާން ރާއްޖެ" ކެމްޕޭނަށް ބ. ފެހެންދޫއަށް ވަޑައިގެން ބޭއްވި ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ގޮއިފުޅަފެހެންދުއަކީ މުސްތަގުބަލުގައި އިގްތިސާދަށް ފައިދާހުރި މަސައްކަތްތަކެއް ކުރާނެ ސަރަހައްދެއް ކަމަށެވެ. ރައީސް ވިދާޅުވީ އެ ސަރަހައްދުގެ ބޭނުން ރަނގަޅަށް ހިފިއްޖެނަމަ، އިގްތިސާދަށް އެތައް ގުނައެއް ދިރުން ލިބިގެންދާނެ ކަމަށެވެ. އެހެންކަމުން، ބޭނުންފުޅުވަނީ ފުރުސަތު ހުޅުވާލައްވައި، ރައްޔިތުންނަށް ގޮތްތަކެއް ހޯއްދަވައިދެއްވުމަށް ކަމަށެވެ. އަދި ރަށު ފަތުރުވެރިކަން ކުރިއެރުވުމަށްޓަކައި ކުރަންޖެހޭ ބައެއް މަސައްކަތްތައް އެބަހުރިކަމަށާއި، ކަރަންޓާއި ފެނާއި ނަރުދަމާގެ ޚިދުމަތް ރަނގަޅަށް ލިބެންޖެހޭ ކަމަށް ވިދާޅުވިއެވެ.

ލަފައިފުރުން ފަސޭހަކޮށްދޭން ޖެހޭކަމަށާއި، ދަތި ހާލުގައި ރަށުގެ ރައްޔިތުން އަމިއްލައަށް އިސްނަގައިގެން ގިނަ މަސައްކަތްތަކެއް ކޮށް ބަނދަރަށް ގެނެވުނު ބަދަލާއެކު، ނަރުދަމާގެ ޚިދުމަތް ނިމުމުން ރަށުގެ އިގްތިސާދު 3 ގުނަ އިތުރުވެގެން ދާނެކަމަށެވެ. ރައީސް ވިދާޅުވީ އެ ސަރަހައްދުގެ އިގްތިސާދު ރަނގަޅުކުރުމަށްޓަކައި ފަޅުތެރޭގައި ރިސޯޓެއް އެޅުމަށް ޕްރައިވެޓް ސެކްޓަރަށް ހުޅުވާލާނެ ކަމަށެވެ.

ފެހެންދޫއަށް ވެވަޑައިގެންނެވި ވައުދުފުޅުތައް

- ސިއްހީ މަރުކަޒު 24 ގަޑިއިރަށް ބަދަލުކޮށް، ޚިދުމަތް އިތުރުކޮށް، ލެބޯޓަރީ ގާއިމްކުރުން

- ސެޓެލައިޓް ސްކޫލް މެނޭޖްކޮށް ހިންގުން ގޮއިދުއިން ފެހެންދުއަށް ބަދަލުކުރުން

- ރޯހައުސް ރައްޔިތުން ބޭނުންވާ ވަރަކަށް އެޅުން

- ކޮމިއުނިޓީ ސެންޓަރު

- ސަރުކާރު މުވައްޒަފުންނަށް އެކޮމޮޑޭޝަން ބްލޮކް

- ފްލޯޓިންގ ޖެޓީ

ރައީސް ވިދާޅުވީ ރަށްތަކަށް ކުރައްވާ ދަތުރުފުޅުތަކުގައި ކޮންމެ ރަށަކުންވެސް ރައްޔިތުން ބޭނުންވަނީ އުފާވެރި އަމާން ރާއްޖެއަކަށް ދިއުމަށް ކަމަށެވެ.

ގޮއިފުޅަފެހެންދޫ ފަޅުތެރޭގައި ތަރައްގީކުރާ ރިސޯޓާ ގުޅޭގޮތަށް ރައީސް ވިދާޅުވީ، އެތަނުގައި އިންވެސްޓްކުރާނެ ވަރަށް ގިނަ އިންވެސްޓަރުން ތިބޭނެކަމަށެވެ. އެއާ ގުޅިގެން ވަޒީފާތައް އުފެދި، އިގްތިސާދީ ތަފާތު އެކި މަސައްކަތްތައް އިތުރުވެގެންދާނެ ކަމަށެވެ. ރައީސް ވިދާޅުވީ އެއީ މުސްތަގުބަލު އޮތް، ރަނގަޅު ސަރަހައްދެއް ކަމަށާއި ގޮއިފުޅަފެހެންދޫ ބާކީ ނުކުރައްވާނެ ކަމަށެވެ.