އަރި އަތޮޅުގެ ރަށްތަކަށް ރައީސް މުއިއްޒު ފައްޓަވާފައިވާ ދަތުރުފުޅުގެ ތެރެއިން، އއ. ރަސްދޫ އަށް ވަޑައިގަތުމުގެ 2 ގަޑީރެއްހާއިރު ކުރިން، ރަސްދޫ އަށް ހިލަ ބާޖަކާއި ހައިމާކެއް ގެންގޮސްފި އެވެ. ރަސްދޫއިން މިކަމާ ގުޅޭ ގޮތުން ރާއްޖެ އެމްވީ އަށް މައުލޫމާތުދިން ފަރާތަކުން ބުނީ މިއީ އެތައް ދުވަހެއް ވަންދެން ހުއްޓާލާފަ އޮތް ރަސްދޫ ބަނދަރުގެ މަސައްކަތަށް ގެނައި ތަކެތި ކަމުގައެވެ.

ރަސްދޫއިން މައުލޫމާތު ދިން ފަރާތުން ބުނީ، ސަރުކާރުން މިގޮތައް އަމަލު ކުރީ، ކުރީ ސަރުކާރުން ރަސްދޫގައި ފަށާފައިވާ މަޝްރޫއުތަކެއް ހުއްޓިފައިވާތީ، ސަރުކާރަށް އެރަށުގައި އޮންނަ ތާއީދު ވަަރަށް ބޮޑަށް ކުޑަވެފައި ވުމުން ރައީސް މުއިއްޒަށް މަރުހަބާ ދެންނެވުމަށް ދާނެ ބަޔަކު ނުވެދާނެ ކަމުގެ ބިރު ހީވެގެން ކަމަށެވެ. ރަސްދޫ ޕީއެންސީގެ ބައެއް ފަރާތްތަކުން ވެސް ބުނަމުންދިޔައީ ދަތުރުފުޅުގެ ކުރިން ބަނދަރުގެ މަސައްކަތައް ބޭނުންވާ ސާމާނު ރަށަށް ނާރުވައިފި ނަމަ ރައީސް މުއިއްޒު އަށް މަރުހަބާ ދެންނެވުމަށް ނުދާނެ ކަމުގައެވެ.

ރަސްދޫ އަށް ރައީސް މުއިއްޒުގެ ދަތުރުފުޅާ ދިމާކޮށް ހިލަ ގެނެސްފައިވަނީ ފ. ނިލަންދޫއިން ކަމަށް ވެސް ރަސްދޫއިން މައުލޫމާތު ދެއްވި ފަރާތުން ބުނެފައިވެއެވެ. ނަމަވެސް ގެނެސްފައިވާ 1000 ޓަނުގެ ހިލަ އަކީ މި މަޝްރޫއުއާ ބަލަފާ ވަރަށް ކުޑަ މިންވަރެއް ކަމަށްވެސް އޭނާ ފާހަގަ ކޮށްފައި ވެއެވެ. އަދި ހިލައިގެ ކޮލިޓީއަށް ބަލާ އިރު މިއީ މި ފަދަ މަޝްރޫއު އަކަށް ބޭނުންކުރަން އެންމެ އެކަށީގެންވާ ހިލަ ނޫން ކަމަށްވެސް އެފަރާތުން ބުނެފައި ވެއެވެ. އަދި ރަސްދޫ އަށް ގެންގޮސްފައިވާ ހައިމާކަކީ ރަސްދޫއަށް ރައީސް ވަޑައިގަތުމުގެ އެއްދުވަސް ކުރިން އއ. މަތިވެރީގެ މަސައްކަތެއް ފަށަން އެރަށަށް ގެންދިޔަ ހައިމާކު ކަމަށް މައުލޫމާތު ލިބިފައި ވެއެވެ.

ރަސްދޫ ބަނދަރުގެ މައްސަލަ އަކީ، އެކި ފަހަރު މަތިން މަރާާތުކޮށްގެން ވެސް ހައްލު ނުވެފައިވާ ގިނަ ޒަމާންތަކެއް ވެފައިވާ މައްސަލަ އެކެވެ. 2012 ވަނަ އަހަރު ހަދާފައިވާ މި ބަނދަރު މަރާމާތު ކުރުމުގެ މަސައްކަތް، ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ ފަށާފައެވެ. ނަމަވެސް ވެރިކަން ބަދަލުވިފަހުން މި މަޝްރޫއު ހުއްޓި، މަޝްރޫއު ކުރިޔަށް ގެންދިޔުމަށް އެރަށަށް ގެންގޮސްފައިވާ ތަކެތިވެސް ވަނީ އެހެން ރަށްރަށަށް ގެންގޮސްފަ އެވެ.

ދައުލަތުގެ ބަޖެޓުން 86.8 މިލިޔަން ރުފިޔާ ހަރަދުކުރާ ގޮތައް، ރަސްދޫގެ ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން، 106,552 ކިއުބިކް މީޓަރުގެ ސަރަޙައްދެއްގައި ބިން ހިއްކުމާއި، 106 މީޓަރުގެ ސަރަޙައްދެއްގައި ބޭރުތޮށި ލުމާއި، 1,656 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 177 މީޓަރުގެ ސަރަޙައްދެއްގައި އެއްގަމު ތޮށި ލުމާއި، 244 މީޓަރުގެ ސަރަޙައްދެއްގައި ގްރޮއިން ޖެހުމާއި، 11 މީޓަރު ދިގު 11 މީޓަރު ފުޅާ ރޭމްޕެއް ހެދުމާއި، 43 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމަށް، ރައީސް ސޯލިހުގެ ސަރުކާރުން ވަނީ އެމްޓީސީސީ އާ ހަވާލު ކޮށްފައެވެ.

2018 ގައި ވެރިކަން ބަދަލުވުމުން މި މަޝްރޫއު ހިމެނޭހެން ރަސްދޫގެ ތަރައްގީއަށް ފަށާފައިވާ ގިނަ މަޝްރޫއު ތަކެއް ވަނީ ހުއްޓިފައެވެ.