ވެރިކަމަށް ވަޑައިގެންނެވިފަހުން ތޮއްޑޫގައި ތަރައްގީގެ މަސައްކަތެއް ނުފެށޭ، ރައީސް ވިދާޅުވީ ކައުންސިލުން ބުނި ކަންކަން ބައްލަވާނެ ކަމަށް

މި ސަރުކާރަށް 2 އަހަރުވާން ކައިރިވެފައިވާއިރު އއ. ތޮއްޑޫގައި ތަރައްގީގެ މަސައްކަތެއް ނުކުރިނަމަވެސް ކައުންސިލުން އެދުނު ކަންކަން ކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އއ. އަތޮޅަށް ކުރައްވަމުން ގެންދަވާ ދަތުރުފުޅުގައި ބުދަ ދުވަހުގެ މެންދުރު ރައީސް ވަނީ ތޮއްޑޫ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވާފައެވެ. މި ބައްދަލުކުރެއްވުމުގައި ކައުންސިލްގެ ފަރާތުން ވަނީ، ޓާރމިނަލަކާއެކު ސީ ޕްލޭންގެ ޚިދުމަތް ފަށަން ބޭނުންވާކަމަށާއި، އިތުރުވަމުންދާ އާބާދީއަށާއި އަދި ފަތުރުވެރިކަން ފުޅާވަމުންދިއުމާއެކު މިހާރު ހުރި ހެލްތު ސެންޓަރ ހޮސްޕިޓަލެއްގެ ދަރަޖައަށް ބަދަލުކުރައްވައި، އެފެންވަރަށް ތަރައްޤީކޮށްދެއްވުމަށް އެދިވަޑައިގަންނަވާފައެވެ. މި ބައްދަލުކުރެއްވުމުގައި ސްކޫލުގެ ފަރާތުން ވަނީ، ސްކޫލުގެ ޖާގައިގެ ދަތިކަން ހައްލުކޮށްދެއްވައި، ސައިންސް ލެބެއް ނެތުމުން ދިމާވާ ދަތިތައް ހިއްސާކުރައްވާފައެވެ.

ކައުންސިލުން ގިނަ ކަންކަން ހުށަހެޅިނަމަވެސް ރައީސް ވަނީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ. އަދި ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދައުލަތުގެ ކުންފުނިތަކުގެ ވެރިން މެދުވެރިކުރައްވައި އެ މަނިކުފާނު ވަނީ ރަށުގައި ކުރިއަށްދާ މަޝްރޫޢުތަކުގެ އަދާހަމަ މަޢުލޫމާތު ޙިއްޞާކުރައްވާފައެވެ.

މިހާތަނަށް އައިރު މި ސަރުކާރުން ތޮއްޑޫގައި އަލަށް ތަރައްގީގެ މަސައްކަތެއް ފަށާފައި ނުވެއެވެ. ރައީސް ތޮއްޑޫއަށް ވަޑައިގެން ރަސްމީކޮށް ފައްޓަވައިދެއްވި ނަރުދަމާ ނިޒާމަކީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ފެށި މަސައްކަތެކެވެ. ރައީސްގެ މި ދަތުރުފުޅުގައި ތޮއްޑޫގައި އަލަށް ފެށުމަށް ސޮއިކުރި ޕްރޮޖެކްޓަކީ ތޮއްޑޫ ދެކުނު ފަރާތުގައި ފާލަން ތަރައްގީކުރުމުގެ މަސައްކަތެވެ.

އިންތިޚާބު ތެރޭގައި ވެސް އެރަށަށް ގިނަ ކަންތައްތަކެއް ކޮށްދެއްވާނެ ކަމަށް އެމަނިކުފާނު ވަނީ ވިދާޅުވެފައެވެ. އެންމެ ފަހުން ތޮއްޑޫއަށް ވަޑައިގެންނެވި ދަތުރުފުޅުގައި 8 ޑިސެމްބަރު 2024 ގައި ތޮއްޑޫގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، މަގުހެދުމުގެ މަޝްރޫޢު އާއި ސްކޫލުގެ އެކްސްޕޭންޝަންއާއި، ސިއްހީ މަރުކަޒު ތަރައްޤީކޮށް ބޮޑުކުރުމާއި، ކުނި މެނޭޖްކުރުމުގެ މަސައްކަތަކީ ތޮއްޑޫއަށް ކޮންމެހެން ބޭނުން ޖެހިފައި ހުރިކަންކަން ކަމަށެވެ.

ނަމަވެސް މިއިން އެއްވެސް މަސައްކަތެއްގެ އަމަލީ މަސައްކަތް އަދި ފަށާފައި ނުވެއެވެ.