އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ.

ލީގުގައި ކުޅުނު ފުރަތަމަ މެޗުގައި ޗެލްސީ ވަނީ ލިވަޕޫލް ކައިރިން އެއްވަރުވެފަ އެވެ. އާދިއްތަ ދުވަހުގެ ރޭ ވެސްޓް ހޭމްގެ ލަންޑަން ސްޓޭޑިއަމްގައި ކުޅުނު މެޗުން ޗެލްސީ ބަލިވީ 3-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ވެސްޓް ހޭމުންނެވެ. މެޗު ފަށައިގެން ހަތް ވަނަ މިނެޓުގައި އެ ޓީމަށް ލިބުނު ކޯނަރެއްގައި ވާޑް ޕްރައުސް ހުރަސްކޮށްދިން ބޯޅައެއް، ބޮލުން ގޯލަށް ވައްދާލައިގެން ވެސްޓް ހޭމަށް ލީޑު ނަގައިދިނީ ނަޔެފް އަގާޑް އެވެ. ނަމަވެސް މެޗުގެ 28 ވަނަ މިނެޓުގައި ޗެލްސީން ވަނީ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެރިޔާ ތެރެއިން ލިބުނު ބޯޅައެއް ޑިފެންޑަރެއް ކައިރިން ނައްޓައި، ގޯލުގެ އަރިމަތީ ކަނަށްވާ ގޮތަށް ފޮނުވާލައިގެން ޗެލްސީ އަށް ނަތީޖާ ހަމަހަމަ ކޮށްދިނީ ކާނީ ޗުކުމޭކާ އެވެ. ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ޗެލްސީ އަށް ވަނީ ލީޑު ނަގާނެ ފުރުސަތު ލިބިފަ އެވެ. އެއީ ވެސްޓް ހޭމްގެ އޭރިޔާ ތެރެއިން ރަހީމް ސްޓާލިން އަށް ކުރި ފައުލަކަށް ދިން ޕެނަލްޓީ އެކެވެ. ނަމަވެސް ޕެނަލްޓީގައި އެންޒޯ ފެނާންޑޭޒް ފޮނުވާލި ބޯޅަ ވެސްޓް ހޭމްގެ ގޯލް ކީޕަރު އަލްފަންސޯ އަރެއޯލާ މަތަކުރި އެވެ.

ވެސްޓް ހޭމުން އެ ޓީމުގެ އަނެއް ދެ ލަނޑު ވެސް ޖެހީ ދެ ވަނަ ހާފުގަ އެވެ. ދެ ވަަ ހާފު ފަށައިގެން އަށް ވަަނަ މިނެޓުގައި ޕްރައުސް ދިން ބޯޅައެއް ގޯލުގެ ތިރީ ކަނަށް ފޮނުވާލައިގެން ވެސްޓް ހޭމަށް ދެ ވަނަ ފަހަރަށް ލީޑު ނަގައިދިނީ މިކޭލް އެންޓޯނިއޯ އެވެ. އޭގެ ފަހުން 67 ވަނަ މިނެޓުގައި ވެސްޓް ހޭމްގެ އަގާޑަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކައިފަ އެވެ. ބާކީ ބައި ދިހަ ކުޅުންތެރިންނާއެކު ކުޅެން ޖެހުނު ނަމަވެސް، ވެސްޓް ހޭމުން ވަނީ އިތުރު ލަނޑެއް ޖަހައި މެޗުން ތިން ޕޮއިންޓު ޔަގީން ކޮށްފަ އެވެ. އެއީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިބުނު ޕެނަަލްޓީއެއް ކާމިޔާބުކޮށްގެން، ލޫކަސް ޕަކޭޓާ ޖެހި ލަނޑުންނެވެ.

މޮޅާއެކު ވެސްޓް ހޭމް އޮތީ ކުޅުނު ދެ މެޗުން ހަތަރު ޕޮއިންޓާއެކު ލީގު ތާވަލްގެ ހަ ވަނައިގަ އެވެ. ދެ މެޗުން ލިބުނު އެއް ޕޮއިންޓާއެކު ޗެލްސީ އޮތީ 15 ވަނައިގަ އެވެ. ލީގުގައި ދެން ޗެލްސީ އަށް އޮންނާނީ އޯގަސްޓު މަހުގެ 26 ވަނަ ދުވަހު އަމިއްލަ ދަނޑުގައި ލޫޓަން ޓައުނާ ދެކޮޅަށް ކުޅޭ މެޗެވެ.