ކެޕާ ހުރި ފެންވަރާމެދު އަންޗެލޮޓީ ހިތްހަމަޖެހޭ!

ލޯނު އެއްބަސްވުމެއްގެ ދަށުން ރެއާލް މެޑްރިޑާ ގުޅުނު ޗެލްސީގެ ގޯލް ކީޕަރު ކެޕާ އަރިއްޒަބަލާގާ ހުރި ފެންވަރާމެދު ހިތްހަމަޖެހޭކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.

އަންޗެލޮޓީ މިހެން ބުނީ ސްޕެނިޝް ލީގުގައި ރެއާލުން އަލްމޭރިއާއާ ދެކޮޅަށް ނިކުންނަ މެޗުގެ ކުރިން ވާހަކަދައްކަމުންނެވެ. އެ މެޗަކީ ރެއާލަށް ބަދަލުވި ފަހުން ކެޕާ އެ ޓީމަށް ކުޅޭނެ ފުރަތަމަ މެޗެވެ. ރެއާލުން ކެޕާ ހޯދީ, އެ ޓީމުގެ އެއްވަނަ ގޯލް ކީޕަރު ބެލްޖިއަމްގެ ތިބައޫ ކޯޓުއާއަށް އަނިޔާވެ, ކުޅުމާ ދުރުގައި ހުންނަން ޖެހުމުންނެވެ. ރެއާލްގައި ކެޕާ ކުޅޭނީ މިހާރު ކުރިއަށްދާ ސީޒަންގެ ނިޔަލަށެވެ.

އަންޗެލޮޓީ ބުނީ، ކެޕާ ހުރީ ވަރަށް ރަނގަޅު ފެންވަރެއްގައި ކަމަށާއި، ޒުވާން ކުޅުންތެރިޔާގެ ކިބައިގައި ބައިނަލްއަގުވާމީ ފެންވަރުގެ ތަޖުރިބާ ހުރިކަމަށެވެ. އަންޗެލޮޓީ ބުނީ ބަދަލު ކީޕަރު ލުނިންގެ މަދީ ތަޖުރިބާ ކަމަށެވެ. ނަމަވެސް އޭނާއަކީވެސް ޒުވާން ކުޅުންތެރިއެއް ކަމަށާއި، މުސްތަގުބަލު ކުރިއަށް އޮތް ކަމަށް އަންޗެލޮޓީ ވަނީ ބުނެފައެވެ. އޭނާ ބުނީ ކޮންމެ ތިން ދުވަހުން އެއް ދުވަހު ކަހަލަ ގޮތަށް މެޗެއް ކުޅެންޖެހޭއިރު، މާ ބޮޑަށް ރޮޓޭޓު ނުކުރެވިދާނެ ކަމަށެވެ. އެހެންކަމުން ކޮންމެވެސް އެއް ކީޕަރަކަށް އިތުރަށް ކުޅުމުގެ ފުރުސަތު ލިބޭނެކަމަށް އޭނާ ވަނީ ބުނެފައެވެ. ކެޕާއާއެކު މި ސީޒަނުގައި ރެއާލުން ހާސިލްކުރަން ބޭނުންވާ ކަންކަން ހާސިލްވާނެކަމުގެ ފުރިހަމަ އިތުބާރު އޮތް ކަމަށްވެސް އަންޗެލޮޓީ ވަނީ ބުނެފައެވެ.

މީގެ އިތުރުން އަންޗެލޮޓީ ވަނީ ޓީމުތަކުގެ ލޮކާ ރޫމުގައި ކެމެރާ ހަރުކުރުމަށް ނިންމި ނިންމުމާ ގުޅޭގޮތުން ވެސް ވާހަކަދައްކާފައެވެ. އޭނާ ބުނީ ސްޕެނިޝް ލީގުގެ ކުރިމަތީގައި ރެއާލަށް ހައްގެއް އޮންނާނެކަމަށް ދެކޭކަމަށާއި، ދާދި ފަހުން ކޯޓުންވެސް ބުނެފައިވަނީ އެހެން ކަމަށެވެ. އޭނާ ބުނީ ލޮކާ ރޫމަކީ ޓީމަށް ވަރަށް މުހިންމު ތަނެއް ކަމަށާއި، އެ ތަނުގައި ކެމެރާ ހަރުކޮށްފައި ހުރުމަކީ އެއްވެސް މާނައެއް އޮތް ކަމެއް ނޫންކަމަށެވެ.

ސްޕެނިޝް ލީގުގައި ރެއާލުން ކުޅުނު ފުރަތަމަ މެޗުން ވަނީ މޮޅުވެފައެވެ. ދެ ވަނަ މެޗުގައި އަލްމޭރިއާގެ ދަނޑުގައި އެ ޓީމާ ދެކޮޅަށް ނިކުންނާނީ ހޮނިހިރު ދުވަހުގެ ރޭ 22:30ގައެވެ.