ޗުއްޓީއަށްފަހު މަޖިލީހުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހު ފަށަނީ

ޗުއްޓީއަށްފަހު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހު ފަށަން ތައްޔާރުވެއްޖެއެވެ.

ޖަލްސާ އެޖެންޑާ ކޮށްފައިވަނީ ހޯމަ ދުވަހުގެ ހެނދުނު 9:00 ށެވެ.

Advertisement

ރައްޔިތުންގެ މަޖިލީހުގެ 2023 ވަނަ އަހަރުގެ ދެވަނަ ދައުރުގެ ޖަލްސާތައް ނިންމާލައި، މަޖިލީސް ޗުއްޓީއަށް ގޮސްފައިވަނީ 22 ޖޫން 2023 ވީ ބުރާސްފަތި ދުވަހު އެވެ. އެ ދުވަހު މަޖިލީހުގެ ރިޔާސަތު ބެލެހެއްޓެވީ މަޖިލީހުގެ ރައީސް މުހައްމަދު ނަޝީދެވެ.

މަޖިލީހުގެ ދެވަނަ ދައުރު ނިންމާލީ، މަޖިލީހުގައި މަސައްކަތްތައް ނުނިމި ހުރުމާއެކު ދައުރު ދިގުދަންމާލުމަށް މެމްބަރުން އެދިވަޑައިގަންނަވަމުން ދަނިކޮށެވެ. އެގޮތުން އެ ދުވަހުގެ ޖަލްސާގައިވެސް މެމްބަރުން ގެންދެވީ، ކުރަން ހުރި މަސައްކަތްތައް ނުނިންމައި ޗުއްޓީއަށް ދާތީ އެކަމުގެ ކަންބޮޑުވުން ފާޅުކުރައްވަމުންނެވެ.

އަދި މަޖިލީހުގެ ރައީސަށް އެމްޑީޕީގެ ޕީޖީ ގްރޫޕުން ވަނީ އެކަމަށް އެދި ސިޓީއެއްވެސް ހުށަހަޅާފައެވެ. އެހެން އަހަރުތަކުގައި ދައުރު ނިންމާލާއިރު މަޖިލީހުގެ މަސައްކަތްތައް ދިޔަ ގޮތާމެދު މަޖިލީހުގެ ރައީސް ވާހަކަފުޅުދައްކަވައެވެ. އަދި ނިމުނު މުހިންމު މަސައްކަތްތަކަށް އަލިއަޅުއްވާލައްވައެވެ. އެއާޚިލާފަށް އެ ދުވަހުގެ ޖަލްސާ ނިންމާލީ ކުއްލި ގޮތަކަށެވެ.

މިމައްސަލާގައި މެންބަރު ކަންބޮޑުވުންފާޅުކޮށް، ތިން ބައިކުޅަ އެއް ބައި މެމްބަރުންގެ ސޮޔާއެކު، ދައުރުން ބޭރުން މަޖިލީހުގެ ޖަލްސާތަކެއް ބާއްވާދިނުމަށް އެދި ސިޓީއެއް ހަމަ އެދުވަހު ހުށަހެޅިއެވެ. އެހެންކަމުން ދައުރުން ބޭރުން ދެ ޖަލްސާއެއް ކުރިއަށް ގެންގޮސްފައިވެއެވެ.

ފުރަތަމަ ޖަލްސާ ކުރިއަށް ގެންގޮސްފައިވަނީ 03 ޖުލައި 2023 ވީ ހޯމަ ދުވަހުގެ ހެނދުނެވެ. އަދި އެދުވަހުގެ ޖަލްސާ ވެސް 3 މިނެޓުގެ ތެރޭގައި ނިންމާލިއެވެ.

އަދި ދައުރުން ބޭރުން ބޭއްވި ދެވަނަ ޖަލްސާ 10 ޖުލައި ވާ ހޯމަ ދުވަހު ކުރިއަށް ގެންގޮސް، ކޮމިޓީތައް އެކުލަވާލާނެ ގޮތާއި ގުޅޭ ރިޕޯޓު އެންމެ ފާސްކޮށްފައިވެއެވެ. މި ދެ ޖަލްސާގެ ރިޔާސަތު ބަލަހައްޓަވާފައިވަނީ މެންބަރު ޙަސަން އަފީފެވެ.

މަޖިލީހުގެ 3 ވަނަ ދައުރު ފެށޭއިރު، ޑިމޮކްރެޓްސް ގެ ނަމުގައި ޕާޓީއެއް ރަޖިސްޓްރީކޮށް، ކުރިން އެމްޑީޕިން ވަކިވެވަޑައިގެން ތިއްބެވި މެމްބަރުންތައް ވަނީ އެ ޕާޓީއާ ގުޅިވަޑައިގެންފައެވެ. މާނައަކީ ރިސެސް ނިމި، މަޖިލިސް ހުޅުވޭއިރު، ޕާޓީތަކާއި އަމިއްލަ މެމްބަރުންގެ އަދަދުތަކަށް އަނެއްކާވެސް އޮންނާނީ ބަދަލުތައް ގެންނަން ޖެހިފައެވެ. އެކަމުގެ ސަބަބުން މަޖިލީހުގެ މުހިއްމު މަސައްކަތްތައް އަނެއްކާވެސް މަޑުޖެހުން އެކަށީގެންވެއެވެ.

ރައްޔިތުންގެ މަޖިލީހުގައި ނުނިމި ހުރި މަސައްކަތްތަކުގެ ތެރޭގައި، މަޖިލީހުގެ ކޮމިޓީތައް އެކުލަވާލުމުގެ މަސައްކަތާއި މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހިމެނެއެވެ. އަދި ބަންޑާރަނައިބު އިބްރާހީމް ރިފްއަތާއި ފޮރިން މިނިސްޓަރ އަބްދުﷲ ޝާހިދުގެ އިތުބާރު ނެތްކަމުގެ މައްސަލަވެސް، ނުނިމި ހުރި މަސައްކަތްތަކުގެ ތެރޭގައި ހިމެނެއެވެ. މީގެ އިތުރުން އިލެކްޝަންސް ކޮމިޝަނާއި ބްރޯޑްކޮމްއަށް މެމްބަރަކު އައްޔަންކުރުން ފަދަ، އިދާރާތަކާއި މުއައްސަސާތަކާ ގުޅުންހުރި މަސައްކަތްތައް ކޮމިޓީ މަރުހަލާގައި މަޑުޖެހިފައި އެބަހުއްޓެވެ.