އާސެނަލްގެ ތައްޔާރީތަކާމެދު އާޓެޓާ ވަރަށް ބޮޑަށް ހިތްހަމަ ޖެހޭ

އައު ސީޒަނަށް އާސެނަލްގެ ތައްޔާރީތަކާ މެދު ވަރަށް ބޮޑަށް ހިތްހަމަ ޖެހޭ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ އައު ސީޒަންގެ އިނގިރޭސި ޕްރިމިއާ ލީގައި އާސެނަލްގެ ފުރަތަމަ މެޗުގައި ނޮޓިންހަމް ފޮރެސްޓާ ދެކޮޅަށް ހޮނިހިރު ދުވަހު ކުޅޭ މެޗުގެ ކުރިން ވާހަކަ ދައްކަމުންނެވެ. އޭނާ ބުނީ މިއީ އާސެނަލަށް އޮތް އައު ފުރުސަތެއް ކަމަށާއި، އަނެއްކޮޅުން މިއީ އައު ޗެލެންޖަކަށް ވާނެ ކަމަށެވެ. ޚާއްސަކޮށް ފުރަތަމަ މެޗު އަމިއްލަ ދަނޑުގައި ކުޅެން އޮތުމަކީ ލީގުގައި ރަނގަޅު ފެށުމެއް ހޯދުމަށް ފަސޭހަވާނެ ކަމެއް ކަމަށް އޭނާ ވަނީ ބުނެފަ އެވެ. އައު ސީޒަނަށް ޓީމުގެ ތައްޔާރީތަކާ ގުޅޭ ގޮތުން އޭނާ ބުނީ މިވަގުތަށް ހިތްހަމަ ޖެހޭ ކަމަށެވެ. އެހެން ނަމަވެސް ޓްރާންސްފާ މާކެޓުގައި އުންމީދު ނުކުރާ ކިތަންމެ ކަމެއް މިހާތަނަށް ވެއްޖެ ކަމަށާއި، އެހެންކަމުން ކުރިއަށް އޮތް ތަނުގައި ވެސް ވާނެ ގޮތެއް ނޭނގޭ ކަމަށް އާޓެޓާ ބުންޏެވެ.

އިދިކޮޅަށް ކުޅެން ޖެހޭ ނޮޓިންހަމް ފޮރެސްޓާ ގުޅޭ ގޮތުން އާޓެޓާ ބުނީ، އެއީ ވަރަށް ރޭވުންތެރިކަމާއެކު ކުޅެމުން އަންނަ ޓީމެއް ކަމަށެވެ. ޚާއްސަކޮށް މިދިޔަ ސީޒަނުގައި ވެސް އެ ޓީމުގެ ފަރާތުން ފެނުނީ މޮޅު ކުޅުމެއް ކަމަށާއި، އެހެންކަމުން އެއީ އާސެނަލުން ވަރަށް ބޮޑަށް ސަމާލުކަން ދޭން ޖެހޭ ކަމެއް ކަމަށް އޭނާ ދެކެ އެވެ. އޭނާ ބުނީ އާސެނަލްގެ އެންމެހައި ކުޅުންތެރިން ވެސް ތިބީ އަލުން ލީގު ފަށާތީ ވަރަށް އުފާވެފައި ކަމަށާއި، ކުޅުންތެރިންގެ ފަރާތުން އޭނާ އަށް ފެންނަނީ ވެސް މޮޅުވުމުގެ ރޫހު ކަމަށެވެ. އޭނާ ބުނީ އާސެނަލުން ރަނގަޅު ކުރަން ޖެހޭ ބައިވަރު ކަންކަން ވެސް ހުރި ކަމަށާއި، މާޒީގެ ކަންކަމުގެ ފިލާވަޅު ލިބިގަނެގެން ކުރިއަށް ދާން ބޭނުންވާ ކަމަށެވެ.

ޕްރިމިއާ ލީގަށް އަލުން ކުރިމަތިލާއިރު، ވާދަވެރި މެންޗެސްޓަރ ސިޓީ ބަލިކޮށް ޗެރިޓީ ޝީލްޑް ކާމިޔާބު ކުރެވުނު ނަމަވެސް، ކުޅުންތެރިންގެ އުންމީދުތައް މަތި ނުވާނެ ކަމަށް އޭނާ ވަނީ ބުނެފަ އެވެ. އާޓެޓާ ބުނީ އަބަދު ވެސް މަސައްކަތް ކުރަންވީ މިއަދަށްވުރެ މާދަމާގެ ނަތީޖާ އާއި ކުޅުން ރަނގަޅު ކުރުމަށް ކަމަށެވެ. އެހެންކަމުން އާސެނަލުން ލީގު ފަށާނީ އެގޮތުގައި އަޒުމު ކަނޑައަޅައިގެން ކަމަށް ވެސް އޭނާ ވަނީ ބުނެފަ އެވެ.

މިދިޔަ ސީޒަނުގައި އާސެނަލްގެ ފަރާތުން ފެނިފައި ވަނީ މޮޅު ކުޅުމެކެވެ. ގިނަ ދުވަސްތަކެއް ވަންދެން ލީގު ތާވަލްގެ އެއް ވަނައިގައި އެ ޓީމު ހިފާއްޓާލިއިރު، ލީގު ގެއްލުނީ ފަހު ވަގުތު ހެދުނު ގޯސްތަކުގެ ސަބަބުންނެވެ. އެކަން އާސެނަލްގެ ކުޅުންތެރިން އަދި އާޓެޓާ ވެސް ޤަބޫލުކުރެ އެވެ.