ކައުންސިލް އިދާރާއާއި ސްކޫލަށް ބޭނުންވާ އެޑްމިން އިމާރާތް އަޅުއްވާނެ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
ގދ. ވާދޫ ރައްޔިތުން އެދޭ ތަރައްގީ ކުރިއަށް އޮތް ފަސް އަހަރުގެ ތެރޭގައި ގެނެސްދެއްވާނެ ކަމަށް, ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުދަ ދުވަހު ދުވަހު ގދ. ވާދޫގައި ބޭއްވި "އުފާވެރި އަމާން ރާއްޖެ" ކެމްޕޭނުގެ ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ކުރިއަށް އޮތް 5 އަހަރު ވާދޫގައި ތަރައްގީގެ ގިނަ މަޝްރޫއުތައް ކުރިއަށްގެންދަވާނެ ކަމަށެވެ.
އެގޮތުން އެރަށުގެ ކައުންސިލް އިދާރާ އެޅުމާއި، ސްކޫލަށް ބޭނުންވާ އެޑްމިން އިމާރާތް އެޅުމާއި، ސްޕޯޓްސް ކޮމްޕްލެކްސެއް އެޅުމާއި، އަދި މިރަށުގެ ބޮޑެތި މަގުތައް ޒަމާނީ ފެންވަރަށް ތަރައްގީ ކޮށްދެއްވާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ ސިއްހީ މަރުކަޒަށް ބޭނުންވާ އިތުރު އެޑްމިން ބްލޮކްތައް އިމާރާތް ކުރުމާއި، ރައްޔިތުން އެދިފައިވާ ގޮތަށް ފަތާ ފެންގަނޑެއް ހައްދަވައިދެއްވާނެ ކަމަށާއި، ސަރަހައްދީ ފެންވަރުގެ ވޮލީ ކޯޓެއް ގާއިމްކޮށްދެއްވާނެ ކަމަށެވެ. އަދި ވިދާޅުވީ ބޯހިޔާވަހިކަމުގެ މައްސަލައަށްވެސް ހައްލު ގެނެސްދެއްވާނެ ކަމަށެވެ.
މި ދައުރުގައި ވާދޫގައި އައިސްޕްލާންޓެއް ގާއިމް ކުރުމަށް ވެވަޑައިގެންނެވި ވައުދުފުޅަށް އިޝާރާތް ކުރައްވައި ރައީސް ވިދާޅުވީ، އެ މަޝްރޫއު ކުރިއަށް ގެންދިއުމަށް މަސައްކަތްކުރެއްވި ކަމަށެވެ. ނަމަވެސް ތިނަދޫގައި އައިސް ޕްްލާންޓެއް ގާއިމްކުރެވި، މުޅި ސަރަހައްދަށް އެކަމުގެ ފައިދާ ވާނެކަން އެމަނިކުފާނު ފާހަގަކުރެއްވިއެވެ.
