މުވައްޒަފުންނަށް މުސާރަ ނުދޭތާ ހަތަރު މަސްވެ، ވާދޫ ސްކޫލްގެ އައު އިމާރާތުގެ މަސައްކަތް ހުއްޓިފައި
މަސައްކަތަށް މަޑު ޖެހެމުން އައިސް، މިދިޔަ ހަފުތާ އިން ފެށިގެން މަސައްކަތް ވަނީ އެއްކޮށް ކަހަލަ ގޮތަކަށް މަޑު ޖެހިފައި
ގދ ވާދޫ - ވާދޫ ސްކޫލުގައި އައު އިމާރާތެއް ޤާއިމު ކުރުމުގެ މަސައްކަތް ފެށީ ނިމުނު ރައީސް އިބްރާހީމް މުޙައްމަދު ޞާލިޙުގެ ސަރުކާރުން
ގދ. ވާދޫގައި ހުންނަ ޖަމާލުއްދީން ސްކޫލްގެ އައު އިމާރާތް ޤާއިމު ކުރުމުގެ މަސައްކަތް މަޑު ޖެހި، އެ މަސައްކަތް ކުރާ ކުންފުނީގެ މުވައްޒަފުންނަށް މުސާރަ ނުދޭ މައްސަލަ ބޮޑުވެއްޖެ އެވެ.
ވާދޫ ސްކޫލުގައި އައު އިމާރާތެއް ޤާއިމު ކުރުމުގެ މަސައްކަތް ފެށީ ނިމުނު ރައީސް އިބްރާހީމް މުޙައްމަދު ޞާލިޙުގެ ސަރުކާރުންނެވެ. ވާދޫ އިން ވާހަކަ ދެއްކި ރައްޔިތަކު ބުނީ، ކުރީ ސަރުކާރުގައި ފެށި އެ މަސައްކަތް ވަރަށް ބާރު ދުވެލީގައި ކުރިއަށް ދިޔަ ކަމަށެވެ. އަދި މަސައްކަތް ނިމޭނެ ކަމަށް އަންދާޒާ ކޮށްފައިވާ ތާރީޚަށްވުރެ ކުރިން، އެ މަސައްކަތް ނިމޭނެ ކަމަށް ވެސް ލަފާ ކުރެވުނު ކަމަށް އޭނާ ބުންޏެވެ.
އެހެން ނަމަވެސް ވެރިކަން ބަދަލުވެ، ރައީސް ޑޮކްޓަރު މުޙައްމަދު މުޢިއްޒުގެ ސަރުކާރު އައި ފަހުން އެ މަސައްކަތަށް މަޑު ޖެހުން އަންނަމުން ދިޔަ ކަމަށް އެ މީހާ ވަނީ ފާހަގަ ކޮށްފަ އެވެ. މަސައްކަތަށް މަޑު ޖެހެމުން އައިސް، މިދިޔަ ހަފުތާ އިން ފެށިގެން މަސައްކަތް އެއްކޮށް ކަހަލަ ގޮތަކަށް ހުއްޓިފައިވާ ކަމަށް ވެސް އޭނާ ބުންޏެވެ. މަސައްކަތް ހުއްޓި، އެ މަޝްރޫއުގައި މަސައްކަތް ކުރަމުން އަންނަ މީހުން މަސައްކަތަށް ނުނިކުންނަނީ މުސާރަ ނުދޭތާ އެތައް ދުވަހެއް ވުމުން ކަމަށް ވެސް އޭނާ ބުންޏެވެ. އެގޮތުން ބައެއް މީހުންނަށް މުސާރަ ނުދޭތާ ހަތަރު ވަރަކަށް މަސް ދުވަސް ވެފައިވާ ކަމަށް އޭނާ ބުންޏެވެ.
މުސާރަ ނުދޭތީ މަސައްކަތަށް އައިސް ތިބި މީހުން މަދުވަމުން މަދުވަމުން ގޮސް، މިހާރު ތިބީ ގާތް ގަނޑަކަށް ފަސް ވަރަކަށް މީހުންނެވެ. އޭނާ ބުނީ އެމީހުން ވެސް މިހާރު ކުރަމުން އަންނަނީ ރަށު ތެރޭގައި އެކި އެކި ކަހަލަ މަސައްކަތް ހޯދައިގެން، އެ ތަންތަނުގެ މަސައްކަތް ކަމަށެވެ. އެހެން ނަމަވެސް، މީގެ ދެ ދުވަހެއް ކުރިން ސްކޫލް އައު އިމާރާތުގެ މަސައްކަތް ކޮންމެ ވެސް ވަރަކަށް ކުރަން ފެށި ކަމަށް ފާހަގަ ކުރި އެވެ. ނަމަވެސް އެފަދަ ބޮޑު މަޝްރޫއަކާ ބަލާއިރު، އެއީ މަސައްކަތް ކުރިއަށް ދާން ޖެހޭ ދުވެލި ކަމަށް ޤަބޫލު ނުކުރެވޭ ކަމަށް އޭނާ ވަނީ ބުނެފަ އެވެ.
ރައީސް ޑޮކްޓަރު މުޢިއްޒުގެ ސަރުކާރު އައި ފަހުން ރަށް ރަށުގައި ތަރައްޤީގެ މަޝްރޫއުތައް ކުރިއަކަށް ނުދެ އެވެ. ކުރީ ސަރުކާރުން ރަށް ރަށުގައި ފަށާފައިވާ ތަރައްޤީގެ މަޝްރޫއުތައް ވެސް ހުއްޓިފައިވާ ކަމުގެ ކަންބޮޑުވުންތައް ރަށް ރަށުގެ ކައުންސިލުންނާއި، ރައްޔިތުން ވެސް އަންނަނީ ކުރަމުންނެވެ.
