ގދ.ވާދޫ ރައްޔިތުންގެ ތަރައްގީއަށް މިސަރުކާރުން ހުރަސްއަޅާފައިވާ ކަމަށާއި، އިމާރާތް ކުރަން ފަށާފައިވާ އައު އިންޖީނުގެ އިމާރާތް ކުރުމުގެ މަސައްކަތް ހުއްޓުވާފައިވާ ކަމަށް އެރަށުގެ ކައުންސިލުން ބުނެފިއެވެ.

ހޯމަ ދުވަހު ވާދޫ ކައުންސިލުން ނެރުނު ބަޔާނެއްގައި ބުނީ ކުރީގެ ރައީސް އިބްރާހިމް މުހައްމަދު ސާލިހުގެ ވެރިކަމުގައި ފެނަކައިގެ މުވައްޒަފުން ޒަމާނުއްސުރެ ކަޅުދުމާއި ދުނބުޅީގެ ތެރޭގައި މަސައްކަތްކުރުން ނިމުމަކަށް ގެނެސް، ފެނަކަ ކޯޕްރޭޝަނުން ރާއްޖޭގެ ގިނަ ރަށްތަކުގައި އައު އިންޖީނުގެތައް އިމާރާތް ކުރުމަށްފެށި ބިޔަ މަޝްރޫއުގެ ދަށުން ވާދޫގައި އައު އިންޖީނުގެއެއް އިމާރާތް ކުރުމުގެ މަސައްކަތް ފަށައި، ބާރު ސްޕީޑްގައި ދަނިކޮށް 2023 ވަނަ އަހަރު ވެރިކަން ބަދަލުވެ ޑރ.މުހައްމަދު މުއިއްޒު ވެރިކަމާ ހަވާލުވެ ވަޑައިގެން، ރާއްޖޭގެ އެއްވެސް ރަށެއްގައި ހިންގަން ފަށާފައިވާ ތަރައްގީގެ މަޝްރޫއެއް ހުއްޓުވާ ނުލައްވާނެ ކަމަށް ވިދާޅުވި ނަމަވެސް ވާދޫގައި އިމާރާތް ކުރުމުގެ މަސައްކަތް ފަަށައި، 80 އިންސައްތަ އަށް ވުރެން ބޮޑުކޮށް ނިންމާފައިވާ އައު އިންޖީނުގޭގެ މަސައްކަތް ފެނަކަ ކޯޕަރޭޝަނުން ހުއްޓުވާފައިވާ ކަމަށެވެ. އަދި އެމަސައްކަތް ނިންމުމަށް ވާދޫއަށް ގެނެސްފައިވާ މުދާތައް ސަރުކާރުގެ ނުފޫޒު ގަދަ ފަރާތްތަކުގެ ރަށްތަކަށް ގެންދާ ގެންދިއުން ހަރުކަށި އިބާރާތުން ކައުންސިލުން ވަނީ ކުށްވެރިކޮށްފައެވެ.

ވާދޫގައި އިމާރާތް ކުރަމުންދާ އައު އިންޖީނުގޭގައި ނުނިމި ހުރީ އެންމެ 4 މަހުން ނިންމާލެވޭނެ މަސައްކަތްތަކެއްކަން ފާހަގަކޮށް ކައުންސިލުން ބުނީ އެ މަސައްކަތް ނުކުރުމުގެ ވިސްނުމާއެކު ވާދޫގައި ހުރި އެންމެހައި މުދާތައް ގެންދިއުމަކީ ރަށު ރައްޔިތުންނަށް، ފެނަކަ އަދި ސަރުކާރުން ކުރި މާލާމާތެއް ކަމަށެވެ. އަދި ކޮންމެ ދުވަހަކު ރައްޔިތުންގެ މަޖިލީހުގައި ވާދޫ ރައްޔިތުންނާ ބެހޭގޮތުން ސަރުކާރުން ތަމްސީލު ކުރާ މެންބަރުން ދައްކަމުން ގެންދާ ހަގީގަތާ ހިލާފު ދޮގު ވާހަކަތަކާއި ރައްޔިތުންނަށް ކުރާ މަލާމާތާ ފުރައްސާރަ ވެސް ކުށްވެރިކޮށް މިކަންކަން ހުއްޓާލުމަށް ކައުންސިލުން ވަނީ ގޮވާލާފައެވެ.

ކައުންސިލުން ވަނީ ފެނަކަ ކޯޕްރޭޝަނުން މިކުރަމުން ގެންދާ ކަންކަން ހުއްޓާލައި، ވާދޫ އިންޖީނުގޭގެ މަސައްކަތް ވީހާ ވެސް އަވަހަށް ނިންމައިދިނުމަށް ސަރުކާރަށް ގޮވާލާފައެވެ.

މީގެ އިތުރުން ކައުންސިލުން ބުނީ ކޮންމެ ސިޔާސީ ޕާޓީއަކުން ސަރުކާރެއް އިންތިޚާބު ކުރެވުނު ނަމަވެސް ދިވެހި ދިދައިގެ ހިޔަލުގައިވާ ކޮންމެ ދިވެހި ރައްޔިތަކީ ވެސް ފެހި ގާނޫނު އަސާސީގެ ދަށުން އެއްވެސް ތަފާތު ކުރުމެއްނެތި އެއިރެއްގައި ހުންނަވާ ރައީސަކު ޚިދުމަތް ކޮށްދެއްވަންޖެހޭ ރައްޔިތުންތަކެއްކަން މިސަރުކާރުގެ އިސްފަރާތްތަކަށް ނޭނގުމަކީ ވަރަށް ބޮޑު ކަންބޮޑުވުމެއް ކަމަށާއި، އެކަމާ ހިތާމަ ކުރާ ކަމަށެވެ.

ރަށު ތަރައްގީއަށް ހިންގާ އެއްވެސް މަޝްރޫއެއް ހުއްޓާނުލައި ކުރިއަށް ގެންދާނެ ކަމަށް އެކިއެކި ފޯރަމްތަކުގައި ރައީސް ވިދާޅުވިކަން ފާހަގަކޮށް ކައުންސިލުން ބުނީ ވާދޫގައި މިހާތަނަށް ހިންގަން ފަށާފައިވާ މަޝްރޫއުތަކުގެ ތެރެއިން ނަރުދަމާގެ މަސައްކަތް ފިޔަވައި އެހެން އެއްވެސް މަސައްކަތެއް ކުރިއަށް ގެންދަން ފެށިފައިނުވުމަކީ މިސަރުކާރުން ވާދޫ ރައްޔިތުންގެ ތަރައްގީއަށް ހުރަސް އަޅަމުންދާ ކަމުގެ ހެއްކެއް ކަމަށެވެ.

ވާދޫ ރައްޔިތުންގެ ހައްގުތައް ހިމާޔާތް ކުރުމަށާއި، ވާދޫ ރައްޔިތުންނަށް ތަރައްގީ ހޯދުމަށް ކުރަން ޖެހުނު އެއްވެސް މަސައްކަތެއް ހުއްޓާނުލައި ފަސްޖެހުމެއްނެތި އަޑު އުފުލައި ކަންކަން ހާސިލްކުރުމަށް އަބަދުވެސް ސާބިތުކަމާއެކު މަސައްކަތް ކުރާނެ ކަމަށް ކައުންސިލުން ބުނެއެވެ.