ގދ. ވާދޫގެ ބޮޑު ބަޔަކުން ކަރަންޓް ކެނޑި ރައްޔިތުން ކަނު އަނދިރީގައި ތިބޭތާ 4 ގަޑިއިރަށް ވުރެ ގިނަ އިރުވެއްޖެއެވެ.

ވާދޫގެ ބޮޑު ސަރަހައްދަކުން ކަރަންޓް ކެނޑިފައިވަނީ އާދިއްތަ ދުވަހުގެ ހަވީރު 5:30ން ފެށިގެންނެވެ.

ކަރަންޓް ކެނޑިފައިވަނީ ރަށުގެ މައި މަގުން ފެށިގެން ރަށުގެ ބޮޑު ސަރަހައްދަކުންނެވެ.

ރާއްޖެއެމްވީ އަށް މައުލޫމާތު ދެއްވަމުން އެރަށު ކައުންސިލްގެ ރައީސް ހަސަން އަބްދުالله ވިދާޅުވީ، މިވަގުތާ ހަމަ އަށް ވެސް ކަރަންޓް ނުލިބޭ ކަމަށާއި، ކަރަންޓް ކެނޑުނު ސަރަހައްދުގެ ރައްޔިތުންނަށް ވަރަށް ބޮޑެތި ގެއްލުން ލިބެމުންދާ ކަމަށެވެ.

ބައެއް ގޭގޭ އަގުބޮޑެތި ސާމާނުތަކަށް ގެއްލުންވެގެން އެކަން ކައުންސިލް އަށް ރިޕޯޓް ކުރަމުންދާ ކަމަށާއި އެގޮތުން އައިސް އަލާމާރިއާއި އޭސީ ފަދަ ތަކެތި ހަލާކުވެގެން ރިޕޯޓް ކޮށްފައިވާ ކަމަށެވެ.

ކަރަންޓްގެ މައްސަލައަށް މިހާ ހިސާބަށް ވެސް ހައްލެއް ލިބިފައި ނުވާއިރު، ކަރަންޓް ކެނޑެން މެދުވެރިވި ސަބަބު ރަށުގެ އިންޖީނުގޭގެ ޓެކްނީޝަނުންނަށް ދެނެގަނެވިފައި ނުވާތީ، އެކަމުގެ ކަންބޮޑުވުން ފާޅުކޮށް ހަސަން ވިދާޅުވީ، އަސްލު މައްސަލަ ދެނެގަނެވިފައި ނުވަނީ އެކަމަށް ނާގާބިލްވުމުން ކަމަށެވެ.

އޭނާ ވިދާޅުވި ގޮތުގައި އެންމެ ފަހުން ގައްދޫއިން ޓެކްނީޝަނެއް ގެނެސް ކަރަންޓް ކެނޑެން މެދުވެރިވި ސަބަބު ވަނީ ދެނެގަނެވިފައެވެ.

"ގައްދޫ އިންޖީނުގޭގައި ހުރި ޓެކްނީޝަނެއް އައިސް ބެލި ބެލުމުން ކަރަންޓް ކޭބަލް ކަނޑައިގެން ދިއުމުގެ ސަބަބުން ދިމާވި މައްސަލައެއް ކަމަށް ބުނީ. މިވަގުތަށް އޮތް ހައްލަކީ މަތިން ކޭބަލް އެއް އަޅައިގެން ކަރަންޓް ދިނުން ކަމަށް. އެކަމުގެ މަސައްކަތް މިހާރު ކުރިއަށްދޭ" ހަސަން ވިދާޅުވިއެވެ.

ކަރަންޓުގެ މައްސަލަ ހައްލުކޮށް ކަރަންޓް ދެވޭނެ އިރެއް އަދި ނޭނގޭ ކަމަށް ހަސަން ވިދާޅުވިއެވެ. އަދި އެންމެ ބޮޑު އެއް ކަންބޮޑުވުމަކީ މި ގޮތަށް ކަރަންޓް ކެނޑުމުގެ ސަބަބުން ރައްޔިތުންގެ މުދަލަށް ގެއްލުންވުން ކަމަށް އޭނާ ފާހަގަ ކުރެއްވިއެވެ.

ފަހަކަށް އައިސް ރާއްޖޭގެ އެކި ސަރަހައްދުތަކުން ކަރަންޓް ކެނޑޭ މައްސަލަ ވަނީ ބޮޑުވެފައެވެ. އެގޮތުން އައްޑޫގެ ގުޅިފައިވާ ރަށްތަކުން ކަރަންޓު ކެނޑެމުންދާތާ މަހެއްހާ ދުވަސް ވެފައިވާއިރު، އެކަމަށް ހައްލެއް ނުހޯދި ރައްޔިތުން ތިބީ މާޔޫސްވެފައެވެ.