ކެނެބިސް ޓްރެފިކް ކުރުމުގެ ދައުވާ އުފުލާފައިވާ ނަވީން ޝަރީއަތް ނިމެންދެން ބަންދު

ކެނެބިސް ޓްރެފިކް ކުރުމުގެ ދައުވާ އުފުލާފައިވާ ތ.ގުރައިދޫ އަތަމާވިލާ މުޙައްމަދު ނަވީން ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައިގައި ދައުވާލިބެނީ ތ ވިލުފުށީ ހައިވަކަރުގޭ އިބްރާހިމް އިރުފާނުއާއި، ށ މިލަންދޫ ނަސީމީވިލާ މުޙައްމަދު ނާޖިހުއާއި، ތ ގުރައިދޫ އަތަމާވިލާ މުޙައްމަދު ނަވީންގެ މައްޗަށެވެ.

އެމީހުންގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމާއި، ކެނެބިސް ބޭނުން ކުރުމުގެ ކުށުގެ ދައުވާއެވެ.

މި މައްސަލަ ބައްލަވަނީ ކްރިމިނަލް ކޯޓުގެ ގާޒީ އިބްރާހިމް ޛިހުނީއެވެ. ގާޒީ ވަނީ ދައުވާލިބޭ ފަރާތްތަކަށް ލިބިގެންވާ ޙައްޤުތައް ކިޔާދެއްވާފައެވެ.

މި އަޑުއެހުމުގައި އިރުފާނުގެ ވަކީލު ބައިވެރިވެލައްވާފައިނުވާތީ ގާޒީ ވަނީ އޭނާގެ ދައުވާ އެހެން ދުވަހެއްގައި ކުރިއަށް ގެންދިއުމަށް ނިންމަވާފައެވެ.

އަދި ނާޖިހުއަށްވެސް ވަކީލަކު އައްޔަނު ކުރުމަށް 10 ދުވަހުގެ ފުރުސަތެއް ގާޒީ ވަނީ ދެއްވާފައެވެ.

އެއަށްފަހު ގާޒީ ވަނީ މުޙައްމަދު ނަވީންގެ ބަންދު މުރާޖައާ ބައި ކުރިއަށް ގެންދަވާފައެވެ.

ދައުލަތުން ބުނެފައިވަނީ އޭނާ ބަންދުކުރި ސަބަބަށް ބަދަލެއް އައިސްފައިނުވާ ކަަމަށެވެ.

ދައުލަތުގެ ވަކީލު ވިދާޅުވީ، މި މައްސަލައާ ގުޅިގެން ފުލުހުންގެ އިންޓެލިޖެންސްއަށް ލިބިފައިވާ މައުލޫމާތުތަކާއި، ލިބިފައިވާ ހެކިތަކަށް ބަލާއިރު، ބަންދުގައި ބަހައްޓަން ބަލަންޖެހޭ މިންވަރަށްވުރެ އިތުރަށްވެސް ހެކި ލިބިފައިވާ ކަމަށެވެ.

ވުމާއެކު، ދެފަރާތުން ދެއްކި ވާހަކަތަކަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ އޭނާ ޝަރީއަތް ނިމެންދެން ބަންދު ކުރުމަށް އަމުރު ކުރަައްވާފައެވެ.

ގާޒީ ވިދާޅުވީ، ދައުވާ ސާފު ކުރުމުގެ ބައި ކުރިއަށް ގެންދަވާނީ ދެން އޮންނަ އަޑުއެހުމެއްގައި ކަމަށެވެ.