ބެންފީކާ އަށް ކުޅެމުން އައި ޕޯޗުގަލްގެ ފޯވާޑް ގޮންޒާލޯ ރާމޯސް ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ސޮއި ކޮށްފި އެވެ.

ދާއިމީ އެއްބަސްވުމެއްގެ ދަށުން ޕީއެސްޖީން ހޯދަން މަސައްކަތް ކުރި ރާމޯސް އެ ކުލަބަށް ސޮއި ކުރީ ލޯނު އެއްބަސްވުމެއްގެ ދަށުންނެވެ. އެއީ ޕީއެސްޖީގެ ފައިނޭންޝަލް ފެއާ ޕްލޭގެ މައްސަލައާ ހެދި އެވެ. އެއް އަހަރު ދުވަހަށް އެކުލަވާލި ލޯނު އެއްބަސްވުމުގެ މުއްދަތު ހަމަވުމުން، ޕީއެސްޖީ އަށް ދާއިމީ އެއްބަސްވުމެއްގެ ދަށުން އޭނާ ހޯދުމުގެ ފުރުސަތު އޮވެ އެވެ. އޭނާ ހޯދުމަށް ޕީއެސްޖީން ވަނީ ޖުމުލަ 80 މިލިއަން ޕައުންޑު ޚަރަދުކޮށްފަ އެވެ. ޕީއެސްޖީގައި ރާމޯސް ބޭނުން ކުރާނީ ނުވަ ނަންބަރު ޖާޒީ އެވެ.

ޕީއެސްޖީ އަށް ސޮއި ކުރުމަށްފަހު ވާހަކަ ދައްކަމުން ރާމޯސް ބުނީ، އެ ކުލަބަކީ ދުނިޔޭގައި އޮތް އެންމެ ބޮޑު އެއް ކުލަބު ކަމަށެވެ. އެހެންކަމުން ޕީއެސްޖީގައި ޖާޒީގައި ކުޅުމުގެ ފުރުސަތު ލިބުމަކީ ވަރަށް ބޮޑު ޝަރަފެއް ކަމަށް ވެސް އޭނާ ވަނީ ބުނެފަ އެވެ. މީގެ އިތުރުން ރާމޯސް ބުނީ މިހާ ހިސާބަށް އޭނާ އަށް އާދެވުނީ ވަރަށް ގިނަ ބައެއްގެ މަސައްކަތާއި، އެހީތެރިކަމާއެކު ކަމަށެވެ. އެހެންކަމުން އެ އެންމެނަށް ވެސް ޝުކުރު އަދާ ކުރާ ކަމަށް އޭނާ ބުންޏެވެ.

ރާމޯސް ޕީއެސްޖީ އަށް ސޮއި ކުރުމާ ގުޅިގެން އެ ކުލަބުގެ ރައީސް ނާސިރު އެލް ޚެއްލާފީ ވިދާޅުވީ، ރާމޯސް އަކީ ޤައުމީ ޓީމުގައި މޮޅު ކުޅުމެއް ދައްކާފައިވާ، ހުނަރުވެރި ޒުވާން ކުޅުންތެރިޔެއް ކަމަށެވެ. ރާމޯސް އަކީ ޓީމަށް ކަންކަން ހާސިލް ކުރުމަށް ގަދަ އަޅާ މަސައްކަތް ކުރާ ކުޅުންތެރިޔެއް ކަމަށާއި، އޭނާ އަކީ ޕީއެސްޖީން ބޭނުންވާ ކަހަލަ ކުޅުންތެރިޔެއް ކަމަށް ވެސް އޭނާ ވިދާޅުވި އެވެ.

ރާމޯސް އޭނާގެ ސީނިއާ ކެރިއަރު ފެށީވެސް ބެންފީކާއިންނެވެ. އެ ކުލަބަށް ކުޅެދިން 143 މެޗުގައި އޭނާ ވަނީ 57 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ އެއް ތަށި ކާމިޔާބުކޮށްފަ އެވެ. ރާމޯސްއަށް ޕޯޗުގަލްގެ ގައުމީ ޓީމުން އެންމެ ފުރަތަމަ ޖާގަ ލިބުނީ 2022 ވަނަ އަހަރުއެވެ. އެއީ ރަފާ ސިލްވާ ގައުމީ ޓީމަށް ކުޅުން ހުއްޓާލަން ނިންމުމުންނެވެ. އޭގެ ފަހުން މިދިޔަ އަހަރު ގަތަރުގައި އޮތް ފީފާ ވޯލްޑް ކަޕަށް ޕޯޗުގަލްއިން އެކުލަވާލި ސްކޮޑުގައި ރާމޯސް ވަނީ ހިމަނާފައެވެ. ފަހަކަށްއައިސް އޭނާ ވިދާލީވެސް އެ މުބާރާތުންނެވެ.

މުބާރާތުގެ ގަދަ 16 ވަނަ ބުރުގައި ޕޯޗުގަލްއިން ސްވިޒަލެންޑާ ދެކޮޅަށް ކުޅުނު މެޗުގައި، އޭރުގެ ކޯޗު ފެނާންޑޯ ސަންޓޯސް ވަނީ، ކެޕްޓަން ކްރިސްޓިއާނޯ ރޮނާލްޑޯގެ ބަދަލުގައި ރާމޯސްއަށް ފުރަތަމަ 11 އިން ޖާގަ ދީފަ އެވެ. އެ މެޗުގައި ރާމޯސް ވަނީ ތިން ލަނޑު ޖަހައި، ހެޓްރިކް ހަމަކޮށްފަ އެވެ.