ބެންފީކާ އިން ބަޔާން ބަލިކޮށްފި، ދެ ޓީމު ވެސް ގަދަ 16 އަށް

މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް ސީގެ ފަހު މެޗުގައި ޖަރުމަނުގެ ބަޔާން މިއުނިކާ ދެކޮޅަށް ކުޅުނު މެޗުން ބެންފީކާ މޮޅުވެއްޖެ އެވެ.

މުބާރާތުގައި ބަޔާންގެ ފުރަތަމަ މެޗުގައި އޯކްލޭންޑް ސިޓީ އަތުން މޮޅުވެފައިވާއިރު، ދެ ވަނަ މެޗުގައި ވަނީ ބޮކާ ޖޫނިއާސްގެ މައްޗަށް ވެސް ކުރި ހޯދައިފަ އެވެ. ބެންފީކާގެ ފުރަތަމަ މެޗުގައި ބޮކާ ޖޫނިއާސްއާ އެއްވަރުވީއިރު، ދެ ވަނަ މެޗުގައި ވަނީ އޯކްލޭންޑް ސިޓީ އަތުން މޮޅުވެފަ އެވެ.

ގުރޫޕް ސްޓޭޖުގެ ފަހު މެޗުގައި ބަޔާންއާ ދެކޮޅަށް ކުޅުނު މެޗު ބެންފީކާ އިން ކާމިޔާބު ކުރީ 1-0 އިންނެވެ. މެޗުގައި ބެންފީކާ އިން ލަނޑު ޖެހީ ވެސް، މެޗުގެ ފުރަތަމަ ހާފުގަ އެވެ.

މެޗު ފަށައިގެން ވެސް ބެންފީކާ އިން ވަނީ ބަޔާން ކޮޅަށް ލަނޑު ޖަަަހަން މަސައްކަތް ކޮށްފަ އެވެ. އެގޮތުން އެ ޓީމަށް ކުޅެމުން އަންނަ އާޖެންޓީނާގެ އެންހެލް ޑި މާރިއާ ފޮނުވާލި ބޯޅަ ބޭރަށް ދިޔައީ ބަޔާންގެ ގޯލު ކީޕަރު މެނުއަލް ނޯޔާގެ އަތުގައި ޖެހިފަ އެވެ.

އޭގެ ފަހުން މެޗުގެ 13 ވަނަ މިނެޓުގައި ބެންފީކާ އިން ވަނީ ލަނޑު ޖަހައި ލީޑު ނަގައިފަ އެވެ. ބަޔާންގެ އޭރިޔާ ބޭރުން ބެންފީކާގެ ޖިއާންލުކާ ޕްރެސްޓިއާނީ ހުރަސްކޮށްދިން ބޯޅަ ގޯލަށް ވައްދާލީ އެންޑްރިއަސް އެވެ.

މެޗުގެ ދެ ވަނަ ހާފުގައި ބަޔާނުން ވަނީ ލަނޑު ޖަހައި ނަތީޖާ ހަމަހަމަ ކުރުމަށް މަސައްކަތް ކޮށްފަ އެވެ. ބަޔާންގެ ލެރޯއީ ސާނެ ފޮނުވާލި ބޯޅަ ހުއްޓުވީ ބެންފީކާގެ ގޯލު ކީޕަރެވެ. އޭގެ ފަހުން ބެންފީކާގެ އޭރިޔާ ތެރެއިން ލިބުނު ފުރުސަތެއްގައި ބަޔާންގެ ތޯމަސް މުލާ ފޮނުވާލި ބޯޅަ ވެސް ބެންފީކާގެ ގޯލު ކީޕަރު ވަނީ މަތަކޮށްފަ އެވެ.

މެޗުން މޮޅުވެ ބެންފީކާ އިން މުބާރާތުގެ ގަދަ 16 ވަނަ ބުރުން ޖާގަ ހޯދީ މި ގުރޫޕުގެ އެއް ވަނަ ޓީމުގެ ގޮތުގަ އެވެ. އެއީ އެ ޓީމު ކުޅުނު ތިން މެޗުން ހަތް ޕޮއިންޓާ އެކު އެވެ. ބެންފީކާ އަތުން ބަލިވި ނަމަވެސް، ދެ ވަނައިގައި ބަޔާން އަށް ވަނީ ގަދަ 16 ވަނަ ބުރުން ޖާގަ ލިބިފަ އެވެ.