ލޯނު އެއްބަސްވުމެއްގެ ދަށުން ބެންފީކާއަށް ކުޅެމުން އަންނަ ޕޯޗުގަލްގެ ފޯވާޑް ގޮންޒާލޯ ރާމޯސް ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން ނިންމައިފި އެވެ.

ރާމޯސް ހޯދުމަށް އެންމެ ފުރަތަމަ ޕީއެސްޖީން މަސައްކަތް ކޮށްފައި ވަނީ ދާއިމީ އެއްބަސްވުމެއްގެ ދަށުންނެވެ. އެހެން ނަމަވެސް ފައިނޭންޝަލް ފެއާ ޕްލޭގެ ދަށުން އެކަމަށް ޕީއެސްޖީ އަށް ވަނީ ދަތިތަކާ ކުރިމަތިވެފަ އެވެ. އެހެންވެ މިހާރު ޕީއެސްޖީން ނިންމާފައި ވަނީ ލޯނު އެއްބަސްވުމެއްގެ ދަށުން ރާމޯސް ހޯދުމަށް ނިންމައިފަ އެވެ. އެއް އަހަރު ދުވަހަށް އެކުލަވާލާ ލޯނު އެއްބަސްވުމުގެ މުއްދަތު ހަމަވުމާއެކު، ދާއިމީ އެއްބަސްވުމެއްގެ ދަށުން އޭނާ ގަތުމުގެ ބައި ވެސް ވަނީ އެއްބަަސްވުމުގައި ހިމަނައިފަ އެވެ. އެހެންކަމުން ޕީއެސްޖީން އޭނާ އާއެކު ދާއިމީ އެއްބަސްވުމެއް އެކުލަވާލާނެ އެވެ. ލޯނު އެއްބަސްވުމެއްގެ ދަށުން އޭނާ ހޯދުމަށް ޕީއެސްޖީން 80 މިލިއަން ޕައުންޑު ހޭދަ ކުރާނެ އެވެ. ޕީއެސްޖީ އަށް ބަދަލުވުމަށް ރާމޯސް ފުރިހަމަ ކުރަން ޖެހޭ މެޑިކަލްގެ ކަންކަން ފުރިހަމަ ކުރުން އޮންނާނީ އަންނަ ހަފްތާގަ އެވެ.

ރާމޯސް އޭނާގެ ސީނިއާ ކެރިއަރު ފެށީވެސް ބެންފީކާއިންނެވެ. އެ ކުލަބަށް މިހާތަނަށް ކުޅެދިން 143 މެޗުގައި އޭނާ ވަނީ 57 ލަނޑު ޖަހާފައެވެ. އެ ކުލަބާއެކު އޭނާ ވަނީ އެއް ތަށި ކާމިޔާބުކޮށްފައެވެ. ރާމޯސްއަށް ޕޯޗުގަލްގެ ގައުމީ ޓީމުން އެންމެ ފުރަތަމަ ޖާގަ ލިބުނީ 2022 ވަނަ އަހަރުއެވެ. އެއީ ރަފާ ސިލްވާ ގައުމީ ޓީމަށް ކުޅުން ހުއްޓާލަން ނިންމުމުންނެވެ. އޭގެ ފަހުން މިދިޔަ އަހަރު ގަތަރުގައި އޮތް ފީފާ ވޯލްޑް ކަޕަށް ޕޯޗުގަލްއިން އެކުލަވާލި ސްކޮޑުގައި ރާމޯސް ވަނީ ހިމަނާފައެވެ. ފަހަކަށްއައިސް އޭނާ ވިދާލީވެސް އެ މުބާރާތުންނެވެ.

މުބާރާތުގެ ގަދަ 16 ވަނަ ބުރުގައި ޕޯޗުގަލްއިން ސްވިޒަލެންޑާ ދެކޮޅަށް ކުޅުނު މެޗުގައި، އޭރުގެ ކޯޗު ފެނާންޑޯ ސަންޓޯސް ވަނީ، ކެޕްޓަން ކްރިސްޓިއާނޯ ރޮނާލްޑޯގެ ބަދަލުގައި ރާމޯސްއަށް ފުރަތަމަ 11އިން ޖާގަ ދީފައެވެ. އެ މެޗުގައި ރާމޯސް ވަނީ ތިން ލަނޑު ޖަހައި، ހެޓްރިކް ހަމަކޮށްފައެވެ.