ރައީސް ޞާލިހުގެ ކެންޑިޑެސީ އީސީން ބަލައިގެންފި
އެމްއެންޕީގެ ކެންޑިޑޭޓުގެ ކެންޑިޑެސީވެސް ވަނީ ބަލައިގެންފައި
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރައީސުލްޖުމްހޫރިއްޔާ އަދި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ކެންޑިޑޭޓް، އިބްރާހިމް މުޙައްމަދު ޞާލިހުގެ ކެންޑިޑެސީ، އިލެކްޝަންސް ކޮމިޝަނުން ބަލައިގެންފިއެވެ.
އީސީގެ ނައިބު ރައީސް އިސްމާއިލް ހަބީބު ވަނީ އާދީއްތަ ދުވަހުގެ ރޭ މިކަން ޓްވިޓަރ މެދުވެރިކޮށް ޔަގީންކޮށްދެއްވާފައެވެ. އެގޮތުން، ރައީސް ޞާލިހް ގެ ފޯމުގައިވާ މަޢުލޫމާތާއި ތަކެތި، އިލެކްޝަންސް ކޮމިޝަނުގެ ފަރާތުން، ބަލައި ޗެކްކުރިއިރު، ޤާނޫނުގައިވާ ގޮތުގެ މަތީން، އެމަނިކުފާނު، ރިޔާސީ އިންތިޚާބަށް ޝަރުތު ހަމަވާ ބޭފުޅެއްކަމުގައި ބަލައިގެންފައިވާ ކަމަށާއި، ހުށަހެޅުއްވި ހުށަހެޅުއްވުން އިލެކްޝަންސް ކޮމިޝަނުން ގަބޫލު ކޮށްފައިވާ ކަމަށް އޭނާ ވިދާޅުވިއެވެ.
އާދިއްތަ ދުވަހު ރައީސް ސާލިހުގެ ކެންޑިޑަސީ ފޯމު އިލެކްޝަންސް ކޮމިޝަނަށް ހުށައެޅުއްވާފައިވަނީ އެމަނިކުފާނުގެ އިންތިޚާބީ އެޖެންޓު މުހައްމަދު ނާޝިޒެވެ. ފޯމާއި ހަވާލުވެޑައިގަތީ އިލެކްޝަންސް ކޮމިޝަންގެ ރައީސް ފުއާދު ތައުފީގެވެ.
މިއަހަރުގެ ރިޔާސީ އިންތިޚާބުގައި ރައީސް ޞާލިހުގެ ރަނިންމޭޓުގެ ގޮތުގައި އެމަނިކުފާނު ކަނޑައަޅުއްވީ ރައްޔިތުން މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމެވެ. ރައީސް ޞާލިހު މިފަހަރު ވެސް ކޯލިޝަނަކާއެކު އިންތިޚާބަށް ނުކުމެވަޑައިގަންނަވާއިރު އެމަނިކުފާނުގެ ރަނިންމޭޓާމެދު ހިތްހަމަޖެހިވަޑައިގަންނާ ކަމަށް ކޯލިޝަނުގައި ހިމެނޭ އަދާލަތު ޕާޓީ އާއި އެމްޑީއޭއިން ވަނީ ބުނެފައެވެ.
އީސީއަށް އާދީއްތަ ދުވަހު ތިން ބޭފުޅަކު ކެންޑިޑެސީ ފޯމު ހުށަހެޅުއްވިއިރު އާދީއްތަ ދުވަހުގެ ރެއާ ހަމައަށް ރައީސް ޞާލިހުގެ އިތުރުން މޯލްޑިވްސް ނޭޝަނަލް ޕާޓީ (އެމްއެންޕީ) ގެ ކެންޑިޑޭޓު މުޙައްމަދު ނާޒިމްގެ ކެންޑިޑެސީ ވެސް އީސީން ވަނީ ބަލައިގެންފައެވެ.
ރައީސްކަމަށް ވާދަކުރައްވާ ފަރާތްތަކުން ހުށަހަޅުއްވާ ކެންޑިޑަސީ ފޯމާމެދު 48 ގަޑިއިރުގެ ތެރޭގައި އިސީން ގޮތެއް ނިންމާނެއެވެ.
ރިޔާސީ އިންތިޚާބަށް ކުރިމަތިލާން ބޭނުންވާ ފަރާތްތަކުން ނަން ހުށަހެޅުމަށް ހުޅުވާލާފައިވާ ފުރުސަތު ހޯމަ ދުވަހުގެ މެންދުރު 2:00 އަށް ހަމަވާއިރު ނަން ހުށަހެޅުއްވި ކެންޑިޑޭޓުންގެ ނަން ތަރީތީބުކުރުން ބުދަ ދުވަހު އޮންނާނެއެވެ.
މިއަހަރުގެ ރިޔާސީ އިންތިޚާބު އޮންނާނީ ސެޕްޓެމްބަރު މަހުގެ 9 ވަނަ ދުވަހުއެވެ. މި އިންތިޚާބުގައި 283،272 މީހުންނަށް ވޯޓުލުމުގެ ޙައްގު ލިިބިގެންވެއެވެ.
