އުމުރުން 16 އަހަރުގެ ޖަރުމަނު މިޑްފީލްޑަރު ބާސެލޯނާއަށް!

ޖަރުމަނުގެ ފްރެއިބާގަށް ކުޅެމުން އަންނަ އުމުރުން 16 އަހަރުގެ މިޑްފީލްޑަރު، ނޯ ޑާވިޗް ސްޕެއިންގެ ބާސެލޯނާއަށް ބަދަލުވާން ނިންމައިފިއެވެ.

ޒުވާން ކުޅުންތެރިޔާ ހޯދުމަށް ބާސެލޯނާއިން މިހާރު ފްރެއިބާގާއެކު އެއްބަސްވުމަކަށް އައިސްފައިވާކަމަށް މީޑިއާތަކުން ބުނެއެވެ. އޭނާ ހޯދުމަށް ބާސެލޯނާއިން ތިން މިލިއަން ޔޫރޯގެ ފިކްސްޑް ފީއެއް ދައްކާނެ ކަމަށް މީޑިއާތަކުން ބުނެއެވެ. މީގެ އިތުރުން މުޅި ޕެކޭޖުގެ ފުރިހަމަ އަގު، ފަސް މިލިއަނަށް އަރާނެ ކަމަށްވެސް ވަނީ ބުނެފައެވެ. މިއީ ބާސެލޯނާއިން މުސްތަގުބަލަށް ރަނގަޅު ޓީމެއް އެކުލަވާލުމަށް ކުރަމުން އަންނަ މަސައްކަތުގެ ތެރެއިން ހޯދާ ކުޅުންތެރިއެއް ކަމަށް ރިޕޯޓުތައް ބުނެއެވެ.

ނޯ ޑާވިޗް ފާހަގަވެފައިވަނީ އެ އުމުރުގައިވެސް މިޑްފީލްޑުގައި ހުނަރުވެރި ކުޅުމެއް ދައްކަމުން އަަންނަ މޮޅު ކުޅުންތެރިޔެއްގެ ގޮތުގައެވެ. އުމުރުން އެންމެ 16 އަހަރުގައި އޭނާއަށް ވަނީ ފްރެއިބާގްގެ ފުރަތަމަ ޓީމުގައި ކުޅުމުގެ ފުރުސަތު ލިބިފައެވެ. މީގެ އިތުރުން އޭނާ އަންނަނީ ޖަރުމަނުގެ ޒުވާން ގައުމީ ޓީމަށްވެސް ކުޅެމުންނެވެ. 2021ން 2022ށް އޭނާ ވަނީ ޖަރުމަނުގެ 16 އަހަރުން ދަށުގެ ގައުމީ ޓީމަށް ކުޅެފައެވެ. އެއަށްފަހު، 2022 ވަނަ އަހަރު ވަނީ 17 އަހަރުން ދަށުގެ ގައުމީ ޓީމުންވެސް ޖާގަ ހޯދާފައެވެ.