އައްޑޫ ސިޓީގައި ގާއިމުކޮށްފައިވާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގައި ''ނޫސަންދަ އައްޑޫ''ގެ ނަމުގައި ކުލިނިކެއް ހުޅުވައި ޚިދުމަތްދޭން ފަށައިފިއެވެ.
މި އޮގަސްޓް މަހުގެ 2 ވަނަ ދުވަހު ބޭއްވި ޚާއްސަ ރަސްމިޔާތެއްގައި، މި ކުލިނިކު ހުޅުއްވައިދެއްވީ ކޮމިޝަނަރ އޮފް ޕޮލިސް މުހައްމަދު ހަމީދެވެ.
ބުދަ ދުވަހުން ފެށިގެން މި ކުލިނިކުން ޚިދުމަތްދޭން ފަށާފައިވާއިރު، ފުލުހުންނާއި ފުލުހުންގެ އާއިލާތަކަށާއި ފުލުހުންގެ ބަންދުގައި ތިބޭ މީހުންނަށް ޚިދުމަތް ދޭނެކަމަށް ފުލުހުން ބުނެއެވެ. އަދި އިމަޖެންސީ ހާލަތްތަކުގައި ފުލުހުންނަށް ލިބޭ އަނިޔާތަކަށްވެސް މި ކުލިނިކުން ފަރުވާދޭނެއެވެ.
މި ކުލިނިކުގައި އާންމު ބަލިތަކުގެ ޑޮކްޓަރުންނާއި އެކިއެކި ބަލިތަކުގެ ޚާއްސަ ޑޮކްޓަރުންގެ ޚިދުމަތް ކުރިއަށް އޮތް ދުވަސްތަކުގައި ދޭނެއެވެ. އަދި ބޭސް ފިހާރައިގެ ޚިދުމަތާއި އެކްސްރޭ އަދި ސްކޭންކުރުމުގެ ހިދުމަތްވެސް ދޭނެއެވެ.
ފުލުހުންނާއި ފުލުހުންގެ އާއިލާތަކަށް މިހާރު ޚިދުމަތްދެމުން ދިޔަނަމަވެސް ކައިރި މުސްތަގުބަލެއްގައި އާންމު ރައްޔިތުންނަށްވެސް މި ކުލިނިކުން ޚިދުމަތްދިނުމަށް ހަމަޖެހިފައިވާ ކަމަށް ފުލުހުން މައުލޫމާތުދެއެވެ.
