ރައީސް ސާލިހުގެ ފަރާތްޕުޅުން ފެނިގެންދަނީ މުޅި ތަފާތު ސިފަފުޅުތަކެއް
ހދ. ހަނިމާދޫގައި ކުރިއަށްގެންދިޔަ އުފާވެރި އަމާން ރާއްޖެ ކެމްޕޭން ޖަލްސާގައި އެމްޑީއޭގެ ރައީސް އަހްމަދު ސިޔާމް ވާހަކަފުޅު ދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ ރައްޔިތުން ބޭނުންވާ ކަންކަން ކޮށްދެއްވުމަށް ދަހިވެތިވެވަޑައިގެންފައިވާ ވެރިއެއް ކަމަށް، އެމްޑީއޭގެ ރައީސް އަހްމަދު ސިޔާމް ވިދާޅުވެއްޖެއެވެ.
ބުދަ ދުވަހުގެ ރޭ ހދ ހަނިމާދޫގައި ކުރިއަށްގެންދިޔަ އުފާވެރި އަމާން ރާއްޖެ ކެމްޕޭން ޖަލްސާގައި ސިޔާމް ވިދާޅުވީ، ރާއްޖޭގެ ވަރަށް ގިނަ ރައީސުންގެ އަރިހުގައި މަސައްކަތްކުރައްވާފައި ވާކަމަށާއި، ވަރަށް ގިނަ ރައީސުން އަމަލުފުޅުތައް ވަރަށް ގާތުން ފެނިވަޑައިގެންފައި ވާކަމަށެވެ. ނަމަވެސް ރައީސް ސާލިހުގެ ފަރާތްޕުޅުން ފެނިގެންދަނީ މުޅި ތަފާތު ސިފަފުޅުތަކެއް ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ މީގެ ކުރީގެ ރައީސުން އަތޮޅުތެރޭގެ ރަށްރަށަށް ވަޑައިގެން ރައްޔިތުންނާ ބައްދަލުކުރެއްވުމަށްފަހު، ކޮށްދެވޭނެ ދެކަމެއް ނުވަތަ ތިން ކަމެއް ހުށަހެޅުމަށް އެންގެވިނަމަވެސް، ރައީސް ސާލިހު އެހެން އަމަލުޕުޅު ނުކުރައްވާ ކަމަށާއި، ރައްޔިތުން ބޭނުންވާ ހުރިހާ ކަމެއް ހުށަހެޅުމުގެ ފުރުސަތު ދެއްވާކަމަށެވެ. އަދި ރައްޔިތުން އެދޭ ހުރިހާ ކަމެއް ކޮށްދެއްވާނެކަމުގެ ޔަގީންކަން އެމަނިކުފާނު ރައްޔިތުންނަށް ދެއްވާ ކަމަށް ސިޔާމް ވިދާޅުވިއެވެ. މިއީ ރައްޔިތުންނަށް ކަންތައްތައް ކޮށްދިނުމަށް ދަހިވެތިވެވަޑައިގެންފައިވާ ރައީސުންގެ އަމަލުފުޅު ހުންނަ ގޮތް ކަމަށް ސިޔާމް ވިދާޅުވިއެވެ.
ހަނިމާދޫއަށް އިޝާރާތްކުރައްވައި ސިޔާމް ވިދާޅުވީ، ހަނިމާދޫގެ ރައްޔިތުން ބޭނުންވާ ތަރައްގީގެ ހުރިހާ މަޝްރޫއެއް މިސަރުކާރުން ހިންގާނެ ކަމަށެވެ. ސިޔާމް ވިދާޅުވީ ރައްޔިތުން ވިސްނަންޖެހޭނީ އަމިއްލަ ހާލަތަށް ކަމަށާއި، ވަކި ސިޔާސީ ލީޑަރެއްގެ ފަހަތުން ރައްޔިތުން ދުވަން ނުޖެހޭނެ ކަމަށެވެ. އަދި މި ނޫން ގޮތަކަށް ރައްޔިތުން އަމަލުކޮށްފިނަމަ އިތުރު 100 އަހަރު ފަހަތަށް ރާއްޖެ ދިއުމަކީ އެކަށީގެންވާ ކަމެއް ކަމަށް ސިޔާމް ވިދާޅުވިއެވެ.
ލޯކަލް ޓޫރިޒަމަށް އަލިއަޅުއްވާލައްވައި ސިޔާމް ވިދާޅުވީ، ރާއްޖޭގެ ފަތުރުވެރިކަމަކީ އިގްތިސާދުގެ މައިބަދަ ކަމަށާއި، ރާއްޖޭގެ ފަތުރުވެރިކަން ކުރިއަށް ގޮސްގެން ނޫނީ މި ބޭނުންވާ މަންޒިލަށް ނުދެވޭނެ ކަމަށެވެ. އެގޮތުން ބޮޑުތިލަދުންމަތީގެ އެއާޕޯޓު ހެދިގެން ގޮސް 1.5 މިލިއަން ޓޫރިސްޓު އަންނަން ފެށުމުން، މިސަރަހައްދުގެ ހުރިހާ ރައްޔިތުންނަށް ޖީބު ބަރުކުރާ ވަރަށް ފައިސާ ލިބެމުންދާނެ ކަމަށް ސިޔާމް ވިދާޅުވިއެވެ. މިހާރު ކ. މާފުށީގައި ލޯކަލް ޓޫރިޒަމް ތަރައްގީވެ، ކުރިއަރާފައިވާއިރު، އެރަށުން އެމަންޒަރު ފެންނަ ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ ފަތުރުވެރިކަމުގެ ސިނާއަތާއެކު ރައްޔިތުންގެ ޖީބަށް ވަންނަ ފައިސާ އިތުރުވެ އަމާންކަމާއި އުފާވެރިކަމާއެކު ރާއްޖޭގައި ދިރިއުޅުމުގެ ފުރުސަތު ފަހިވާނެ ކަމަށެވެ. މިސިނާއަތް ކުރިއަށް ގެންދަން ޖެހެނީ ވަރަށް ވިސްނައިގެން ކަމަށް ސިޔާމް ވިދާޅުވިއެވެ.
