ރާއްޖޭގެ އިގްތިސާދު ރަނގަޅު ކުރުމަށް ވައްކަން ކުރުން ހުއްޓާލަންޖެހޭ: މެންބަރު ސިޔާމް

ރާއްޖޭގެ އިގްތިސާދު ރަނގަޅު ކުރުމަށް ވައްކަން ކުރުން ހުއްޓާލަންޖެހޭ ކަމަށް ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެެއްޖެއެވެ.

ހޯމަ ދުވަހުގެ ފަށާއިރު ޕްރޮގްރާމްގައި މެންބަރު ސިޔާމް ވިދާޅުވީ ރާއްޖޭގެ އިގްތިސާދު ރަނގަޅު ކުރުމަށް ވައްކަން ކުރުން ހުއްޓާލަންޖެހޭ ކަމަށާއި، ވައްކަން ކުރެވޭ ފުރުސަތުތައް ބަންދު ކުރަންޖެހޭ ކަމަށެވެ. ނަމަވެސް މިދިޔަ އަހަރުތަކުގެ ތެރޭގައި ހުރިހާ ސަރުކާރަކުން ވެސް ރާއްޖޭގައި ވައްކަން ކުރުން ފިޔަވައި އިތުރު ކަމެއް ކޮށްފައިނުވާ ކަމަށް މެންބަރު ސިޔާމް ވިދާޅުވިއެވެ.

މެންބަރު ސިޔާމް ވިދާޅުވީ ހުރިހާ ސަރުކާރަކުން ވެސް ވައްކަން ކުރުމަށް ކުންފުނިތައް ހަދާ ކަމަށާއި، ރާއްޖޭގައި ގާތްގަނޑަކަށް 250 ކުންފުނި އެބަހުރި ކަމަށެވެ. އެކުންފުނިތައް ހިންގުމަށް ސަރުކާރުން ބިލިއަނުން ފައިސާ ހަރަދުކުރާއިރު، އެއްވެސް ކުންފުންޏަކަށް ފައިދާއެއް މިހާތަނަށް ހޯދިފައިނުވާ ކަމަށް އޭނާ ވިދާޅުވިއެވެ. އަދި ވިދާޅުވީ ކުންފުނިތަކަކީ ވައްކަން ކުރުމަށް ހޯދާ ލައިސެންސެއް ކަމަށެވެ.

ރާއްޖޭގައި ގިނަ ކްލާސްރޫމްތައް އަޅާކަން ފާހަގަކުރައްވައި މެންބަރު ސިޔާމް ވިދާޅުވީ އެބޭފުޅާ އަމިއްލައަށް ކްލާސްރޫމް އެޅުމަށް ދެ ލައްކަ ރުފިޔާ ހޭދަކުރާއިރު، އެފަދަ އެހެން ކްލާސްރޫމްތައް އެޅުމަށް ސަރުކާރުން ދެ މިލިއަން ރުފިޔާ ހޭދަ ކުރާ ކަމަށެވެ. މިއީ ކުރެވޭ ވައްކަން ކަމަށާއި، މިގޮތަށް އަމަލުކުރާއިރު، ސަރުކާރުގައި ފައިސާ ނުހުންނާނެ ކަމަށް މެންބަރު ސިޔާމް ވިދާޅުވިއެވެ.

ރައްޔިތުން ގައުމަށް ކިތަންމެ ގިނައިން ޓެކްސް ދެއްކި ނަމަވެސް އިގްތިސާދު ކުރި ނާރާނެ ކަމަށާއި، އެފައިސާ ނަހަމަ ގޮތުގައި ބޭނުންކޮށް، ފަސާދާ ކުރާވަރަކަށް ގައުމު އިގްތިސާދު ދާނީ ދަށަށް ކަމަށް މެންބަރު ސިޔާމް ވިދާޅުވިއެވެ.