500 ޑޮލަރު މާރުކުރާ އުސޫލާއެކު ސިނާއަތް ހަލާކުވާނެ، އެއީ ކުރެވޭނެ ކަމެއް ނޫން: މެންބަރު ސިޔާމް
2 ޑިސެމްބަރު 2024 | ހޯމަ 05:00އިގްތިސާދީ ކާރިސާއެއް ކުރިމަތިވެގެންދިޔައީ ފައިސާއަށް ހިޔާނަތްތެރިވުމުން
ފަށާއިރު ޕްރޮގްރާމްގައި އެމްޑީއޭގެ ލީޑަރު އަދި މީދޫ ދާއިރާގެ މެމްބަރު އަޙުމަދު ސިޔާމް މުޙައްމަދު ވާހަކަދައްކަވަނީ
ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރާ އުސޫލާއެކު ސިނާއަތް ހަލާކުވެގެންދާނެ ކަމަށާއި، އެއީ ކުރެވޭނެ ކަމެއް ނޫން ކަމަށް ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެެއްޖެއެވެ.
ހޯމަ ދުވަހުގެ ފަށާއިރު ޕްރޮގްރާމްގައި މެންބަރު ސިޔާމް ވިދާޅުވީ ރިސޯޓުތަކުން ދައުލަތަށް ދައްކަން ޖެހޭ ހުރިހާ ޓެކްސްއެއް ދައްކަމުންދަނީ ޑޮލަރުން ކަމަށާއި، އެއީ ދައުލަތަށް ވަންނަ ފައިސާ ކަމަށެވެ.
ރާއްޖެއަކީ ފައިސާ ވަންނަ ގައުމެއްކަން ފާހަގަކުރައްވައި މެންބަރު ސިޔާމް ވިދާޅުވީ މުޅި ރާއްޖެއަށް ޑޮލަރުގެ ތާށިކަން ކުރިމަތިވެ، އިގްތިސާދީ ކާރިސާއެއް ކުރިމަތިވެގެންދިޔައީ ފައިސާއަށް ހިޔާނަތްތެރިވުމުން ކަމަށެވެ.
މީގެ އިތުރުން މެންބަރު ސިޔާމް ވިދާޅުވީ މިފަދަ ބަދަލެއް ގެނައުމުގެ ކުރިން ސިނާއަތް ހިންގާގޮތް ސަރުކާރުން ބަލަންޖެހޭ ކަމަށެވެ. ބޮޑެތި ރިސޯޓުތަކަށް އާއިލާތައް ގެނައުމަށް ކުޑަކުދިންގެ އަތުން އެއްވެސް ވަރަކަށް ރުފިޔާ ނުނަގާ ކަމަށާއި، ނަމަވެސް ކޮންމެ ބޮލަކަށް 500 ޑޮލަރު މާރުކުރަން ސަރުކާރުން އެންގުމުން ދެކޮޅު ނުޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ ނުލިބޭ އެއްޗެއް ނުދެވޭނެ ކަމަށެވެ.
މެންބަރު ސިޔާމް ވިދާޅުވީ މި ގަވާއިދަށް އިތުރު އިސްލާހުތަކެއް ގެންނަން ޖެހޭ ކަމަށާއި، ގާނޫނު އަސާސީން ވެސް މިކަން މިގޮތަށް ކުރުމަށް މަޖުބޫރުނުކުރެވޭނެ ކަމަށެވެ. މެންބަރު ސިޔާމް ވިދާޅުވީ ފަތުރުވެރިކަމުގެ ސިނާއަތަކީ ހުޅުވާލެވިފައިވާ އިގްތިސާދެއް ކަމަށާއި، އެ ނޫން ގޮތަކަށް މި އިގްތިސާދު ކުރިއަށް ނުދާނެ ކަމަށެވެ. އަދި އިގްތިސާދާ ކުޅޭއިރު ވަރަށް ވިސްނަންޖެހޭ ކަމަށް އޭނާ ވިދާޅުވިއެވެ.
މީގެ އިތުރުން މެންބަރު ސިޔާމް ވިދާޅުވީ ރާއްޖޭގައި ހުރި ރިސޯޓުތަކުގެ ތެރެއިން ގާތްގަނޑަށް 80 އިންސައްތަ ރިސޯޓު އޯން ކުރަނީ ބޭރުގެ އިންވެސްޓަރުން ކަމަށާއި، ދިވެހިން ނޫން ކަމަށެވެ. ހަގީގަތުގައި ދިވެހިން އޯން ކުރާ ރިސޯޓުތަކަކަށް އެތަންތަން ހަދަންޖެހޭ ކަމަށާއި، އެ އަމާޒަށް ވާސިލްވެވޭނީ ރާއްޖޭގައި ފައިނޭންސް ހުރެގެން ކަމަށް އޭނާ ވިދާޅުވިއެވެ. ނަމަވެސް އެވަރަށް ކުރިއަށް ގެންދިއުމަށް ފައިނޭންސް ނުހުންނަ ކަމަށް މެންބަރު ސިޔާމް ވިދާޅުވިއެވެ.
މިހާރުގެ ހާލަތަށް އިޝާރާތް ކުރައްވައި މެންބަރު ސިޔާމް ވިދާޅުވީ ރިސޯޓު ހުރިހާ މުވައްޒަފުންނަށް މުސާރަ ދެނީ ޑޮލަރުން ކަމަށާއި، ނަމަވެސް ސަރުކާރު މިގަވާއިދަށް އަމަލު ކުރުމަށް މަޖުބޫރުކޮށްފިނަމަ މުވައްޒަފުންގެ މުސާރަ ރުފިޔާއިން ދޭން މަޖުބާރުވާނެ ކަމަށެވެ. އަދި އެގޮތަށް އަމަލު ކުރުމުން ނިކަމެތިވެ، ދެރަ ލިބިގެންދަނީ ރައްޔިތުންނަށް ކަމަށް މެންބަރު ސިޔާމް ވިދާޅުވިއެވެ.
