ށ.ފީވަކުން ކުރިން ފެނުނީ މާކަނޑޫދޫގައި ޗަކަ ބިން ހިއްކައިގެން ގެދޮރު އެޅި ފަދަ މަންޒަރުތައް - ރިޒާ
މި ސަރުކާރުން އެންމެ ފުރަތަމަ ވެސް ކުރި ކަމަކީ އެ ދާއިރާގެ ނަރުދަމާގެ މަސައްކަތް ކުރެވޭނެ ގޮތެއް ހޯދުން
މެންބަރު ރިޒާ
ށ.ފީވަކުން ކުރިން ފެނުނީ މާކަނޑޫދޫގައި ޗަކަ ބިން ހިއްކައިގެން ގެދޮރު އެޅި އިރު ފެނުނު ފަދަ މަންޒަރުތައްކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެންބަރު އަލީ ރިޒާ ވިދާޅުވެއްޖެއެވެ.
ރިޒާ އެފަދައިން ވިދާޅުވީ އަންގާރަ ދުވަހު ހެނދުނު ފީވަކުގައި ބޭއްވި ބަނދަރު ބައްދަލުވުމުގައި ވާހަކަދައްކަވަމުންނެވެ. އޭނާ ވިދާޅުވީ އެ ރަށުގައި ހުންނަވާ ވާހަކަދައްކަވާއިރު ހަނދާނަށް އަންނަނީ މާކަނޑޫދޫގައި މީހުން ދިރިއުޅުނު އިރުގެ ހަނދާންތައް ކަމަށެވެ. އެއީ ޖަޒުބާތީ ވާހަކަތަކަކަށް ވެސް ވެދާނެ ކަމަށް ފާހަގަކުރައްވާ ރިޒާ ވިދާޅުވީ މާކަނޑޫދޫގައި ގެދޮރު ބިނާ ކުރީ ގޯންޏަށް ވެލި އަޅައިގެން ރަށުގެ ޗަކަ ބިން ހިއްކައިގެން ކަމަށެވެ. ފީވަކަކީ ވެސް ދާދި އެފަދަ ރަށެއްކަމަށް އޭނާ ވިދާޅުވިއެވެ. ނަމަވެސް ފީވަކުގެ ބަނދަރުގެ މަސައްކަތް ނިމުމާއެކު އެ ރަށަށް ވަރަށް ބޮޑަށް ލުއިވެގެންދާނެ ކަމަށް އޭނާ ވިދާޅުވިއެވެ.
އެ ބަދަލާއެކު އެ ރަށުގައި ގެދޮރު އެޅުމަށް ދިމާވި އުނދަގޫތައް ހައްލުވީ ކަމަށް ވެސް ރިޒާ ވިދާޅުވިއެވެ. ރިޒާ އިތުރަށް ވިދާޅުވި މި ސަރުކާރުން ފީވަކަށް ވަރަށް ގިނަ މަސައްކަތްތައް ކޮށްދެއްވަމުން ދަނީ އުނދަނގުލުގައި ކަމަށެވެ.
ފާއިތުވި ދެ ދައުރުގައިވެސް އެ ރަަށަށް އަޅާނުލެވޭ ކަމަށް އޭނާ ވިދާޅުވިއެވެ. އަދި މިދިޔަ ވެރިކަމުގައި ވެސް އިންތިޚާބުގެ ވޯޓުލާން 7 ދުވަހަށް ވީމަ މަދު ހޮޅިކޮޅުތަކަކާއި، މަދު ވެލިތަކަކާ އެކު ނަރުދަމާ އަޅަން ކަމަށް ބުނެ ދަޅަ ދެއްކި ކަމަށް ރިޒާ ވިދާޅުވިއެވެ. މި ސަރުކާރުން އެންމެ ފުރަތަމަ ވެސް ކުރި ކަމަކީ އެ ދާއިރާގެ ނަރުދަމާގެ މަސައްކަތް ކުރެވޭނެ ގޮތެއް ހޯދުން ކަމަށް އޭނާ ވިދާޅުވިއެވެ. އެ މަސައްކަތަށް ވަގުތުތަކެއް ހޭދަވި ނަމަވެސް ފީވަކުގެ ރައްޔިތުންނަށް އެކަންކޮށްދިން ކަމަށް އޭނާ ވިދާޅުވިއެވެ.
