ރީކޯ މޫސަގެ އިތުބާރުގެ ވޯޓް ނެގުމުގެ ކުރިން އަޅުގަނޑު ޖަލަށްލާނެ: ގާސިމް
ގާސިމްގެ މައްޗަށް ކުރަނީ ރިޝްވަތު ދިނުމުގެ ތުހުމަތު
ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމް
ރައްޔިތުންގެ މަޖިލީހުގެ ނައިބު ރައީސްގެ އިތުބާރުގެ މައްސަލައިގެ ވޯޓް ނެގުމުގެ ކުރިން އޭނާ ޖަލަށްލާން ސަރުކާރުން ބޭނުންވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ނައިބު ރައީސް ރީކޯ މޫސާ މަނިކުގެ މައްޗަށް ހުށަހަޅާފައިވާ އިތުބާރު ނެތް ކަމުގެ މައްސަލަ އެޖެންޑާ ކޮށްފައިވަނީ އަންނަ އަންގާރަ ދުވަހުގެ މަޖިލިސް ޖަލްސާއަށެވެ.
ބުދަ ދުވަހުގެ ރޭ ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ އޭނާގެ މައްޗަށް ހިންގާ މައްސަލަ ކުރިއަށްދަނީ "ހައި ސްޕީޑް" ގައި ކަމަށެވެ. ނަމަވެސް ބޮޑެތި ޚިޔާނާތުގެ މައްސަލަތަކުގައި ހިމެނޭ މީހުންގެ މައްސަލަތައް ނުހިނގާ ކަމަށް އޭނާ ވިދާޅުވި އެވެ.
ގާސިމް ވިދާޅުވީ ބޮޑެތި ޚިޔާނާތްތައް ހިންގާ މީހުންގެ މައްޗަށް ޝަރީއަތް ހިންގުމުގެ ބަދަލުގައި، އެމީހުންނަށް ލިބެމުންދަނީ މަތީ މަގާމުތައް ކަމަށެވެ.
ގާސިމް ވިދާޅުވީ އޭނާ ޖަލަށް ލެވިދާނެ ކަމަށާއި ނަމަވެސް ރާއްޖެ އިސްލާހު ކުރުމަށް ކުރަމުންދާ މަސައްކަތް ނުހުއްޓުވޭނެ ކަމަށެވެ. އަދި އިސްލާހީ މަސައްކަތުގެ ރޫހު ދިވެހި ފަސްގަނޑުން ނައްތާ ނުލެވޭނެ ކަމަށް އޭނާ ވިދާޅުވި އެވެ.
ގާސިމްގެ މައްޗަށް މަޖިލިސް މެންބަރުންނަށް ރިޝްވަތު ދެއްވަން އުޅުމުގެ ތުހުމަތުކޮށް ފަސް ދުވަހުގެ ތަހުގީގެއް ހިންގުމަށް ފަހު، ދައުވާކޮށްދިނުމަށް އެދި ފުލުހުން ވަނީ ޕްރޮސެކިއުޓާ ޖެނެރަލްގެ އޮފީހަށް ހުށަހަޅާފަ އެވެ. އަދި ރާއްޖެއިން ބޭރަށް ފުރުން ގާސިމަށް މަނާކޮށް ކްރިމިނަލް ކޯޓުން ވަނީ އަމުރެއް ނެރެފަ އެވެ.
