ސްކޫލުތަކުގެ ކިޔެވުން ފެށޭ ނަމަ މި ހަފްތާ ނިމުމުގެ ކުރިން އަންގާނެ: އެޑިއުކޭޝަން މިނިސްޓްރީ

މިހާރު ރާއްޖޭގައި ފެތުރެމުންދާ ރޯގާއާ ގުޅިގެން ސްކޫލުތަކުގެ ކިޔެވުން ފެށޭކަން ނުވަތަ ނޫން ކަން މި ހަފްތާ ނިމުމުގެ ކުރިން އަންގާނެ ކަމަށް އެޑިއުކޭޝަން މިނިސްޓްރީން ބުނެފި އެވެ.

އެ މިނިސްޓްރީގެ މީޑިޔާ އޮފިޝަލް ވިދާޅުވީ، މިޑްޓާމް ބަންދަށް ފަހު ސްކޫލުތައް ހުޅުވޭނެ ކަން ނުވަތަ ނޫން ކަން ވެސް އެ މިނިސްޓްރީން ސްކޫލުތަކަށް މި ހަފްތާ ނިމުމުގެ ކުރިން އަންގާނެ ކަމަށެވެ.

މިއީ ސްކޫލުތަކުގެ މިޑް ޓާމް ބަންދު ހަފްތާ ކަމުގައި ވީ ނަމަވެސް މިޑް ޓާމް ބަންދު އައުމުގެ ކުރިން، މިހާރު ފެތުރެމުންދާ ރޯގާއާ ގުޅިގެން ސްކޫލުތަކުގެ ކިޔެވުން ވަނީ ބަންދުކޮށްފަ އެވެ.

ބަންދުކުރަން ނިންމީ ޕްރީ ސްކޫލުން ފެށިގެން ގްރޭޑް 12 އާއި ހަމައަށް ކިޔަވައިދޭ ހުރިހާ ސްކޫލްތަކެކެވެ. އޭރު އެޑިއުކޭޝަން މިނިސްޓްރީން ބުނީ މިޑްޓާމް ބަންދު ނިމޭއިރު، ރޯގާ ފެތުރޭ މިންވަރަށް ބެލުމަށް ފަހު ސްކޫލުތައް ހުޅުވުމާ މެދު ގޮތެއް ނިންމާނެ ކަމަށެވެ.

ހެލްތް ޕްރޮޓެކްޝަން އޭޖެންސީން އެޗްޕީއޭ އިން އާއްމުކޮށްފައިވާ އެންމެ ފަހުގެ ތަފާސް ހިސާބުތަކަށް ބަލާ އިރު، އިންފްލުއްޒާ އެންވަންއެންވަން ޖެހިގެން، މިހާތަނަށް ތިން މީހުން މަރުވެފައިވާ އިރު 140 އަށް ވުރެ ގިނަ މީހުންނަށް ވަނީ އިންފްލުއެންޒާ އެޗްވަންއެންވަން ޖެހިފަ އެވެ. މި ހާތަނަށް 400 އަށް ވުރެ ގިން މީހުން ވަނީ މި ބައްޔަށް ޓެސްޓްކޮށްފަ އެވެ.