ރައްޔިތުންގެ މަޖީލީހުގެ ރައީސް ޢަބްދުﷲ މަސީހުގެ އިތުބާރު ނެތްކަމަށް ފާސްކުރުމަށް ރައްޔިތުންގެ މަޖިލީހުގެ މެންބަރުން ކުރައްވަމުން ގެންދަވާ މަސައްކަތަށް އެއްބާރުލުން ދީ ހިތްވަރު ދިނުމަށް ހުރިހާ ބޭފުޅުން މިމަހުގެ 24 ވަނަ ދުވަހަށް މަލެ އެރުމަށް އެމްޑީޕީގެ ޗެއަރޕާސަންގެ ނައިބު ޢަލީ ނިޔާޒް އަނެއްކާ ވެސް ގޮވާލައްވައިފި އެވެ.. 

ނިޔާޒް މިހެން ވިދާޅުވީ ގުޅިފައިވާ ޕާޓީތަކުން ނ އަތޮޅު މަނަދޫގައި ހޮނިހިރު ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުންނެވެ.

މި ޖަލްސާގައި ވާހަކަ ދައްކަވަމުން ނިޔާޒް ވިދާޅުވީ އިސްލާހަށް މަސައްކަތް ކުރާ ފަރާތްތަކުން އަދި އެންމެހާ ދިވެހިރައްޔިތުން ކުރިމަތިލާފައި ވަނީ ވަރަށް މުހިއްމު ވަގުތަކާ ކަމަށާއި  މިފެށެނީ ވަރަށް މުހިއްމު ހަފްތާއެއް ކަމަށެވެ.

"މިކުރިމަތިލަނީ ބަރުލަމާނީ ހަޔާތުގައި މުހިއްމު ވާހަކަ ތަކެއް ދައްކާނެ ދުވަހަކާ. އިސްލާހީ މަސައްކަތައް ވަރަށް ބޮޑު ހިތްވަރެއް ލިބޭނެ އެދުވަހު. މަޖިލީހުގެ މެންބަރުން ކުރައްވާ މަސައްކަތައް އެހީތެރިވާން ޖެހޭ. އެންމެ ރަނގަޅު ގޮތަކީ ވަޑައިގެންނެވުނު ގޮތަކުން މާލެ ވަޑައިގެން މަޖިލިސް ދޮށުގައި ތިބުން.،" ނިޔާޒް ވިދާޅުވިއެވެ

ނިޔާޒް ވިދާޅުވީ ރައްޔިތުންގެ މަޖިލީހުގެ ރައީސް ބޭރުކުރަން ޖެހޭ ކަމަށާއި އެކަމަށް މަސައްކަތް ކުރަން ޖެހޭ ވަރަށް ގިނަ ސަބަބު އެބަހުރި ކަމަށެވެ. ތިންބާރުވެސް މިނިވަން ކުރަން ޖެހޭ ކަމަށާއި އެއްވެސް މީހަކަށް ޤާނޫން އަސާސީއާ ދެކޮޅަށް މަސައްކަތެއް ނުކުރެވޭނެ ކަމަށެވެ.

"ރައީސް ޔާމީނަށް ތާއީދު ކުރާ ފަރާތްތަކަށް ހީވި ރައީސް ޔާމީންއަކީ އާދަޔާ ޚިލާފް ބާރެއް ލިބިފައިވާ ބޭފުޅެއް ކަމަށް. އެކަމަކު އެއްވެސް އިންސާނަކީ މާބޮޑު ބާރެއް ލިބިފައިވާ މީހެއް ނޫން. އެއްވެސް މީހަކު އަނެއް މީހާގެ އަޅަކަށް ވެގެން ހުންނާކަށް ނުޖެހޭނެ،" ނިޔާޒް ވިދާޅުވިއެވެ.

ނިޔާޒް ވިދާޅުވީ އިސްލާހަށް މަސައްކަތް ކުރާ ފަރާތްތަކާ ދެކޮޅަށް ސަރުކާރާއި މަޖިލީހުން ކުރި މަސައްކަތް އެވަނީ ފެއިލްކޮށްފައި ކަމަށާއި އިރާދަކުރެއްވިއްޔާ މިކަމަށް މިހާރު ހުރަސް އަޅަމުންދާ ޖުޑިޝަރީގެ ބާރުވެސް ފެއިލް ކޮށްލެވޭނެ ކަމަށެވެ.   

މަޖިލީހުގެ ރައީސް ބޭރުކޮށްލެވުމުން އިސްލާހީ އެޖެންޑާގެ މަސައްކަތް އަދި އެފެށެނީ ކަމަށާއި  އޭގެ އެންމެބޮޑު ބާރަކީ ރައްޔިތުންގެ އަތުން އަތުލައިގެންފައިވާ ބާރު އަނބުރާ ހޯދައިދިނުން ކަމަށް ނިޔާޒް ވިދާޅުވިއެވެ. އެކަމަށް އެހީތެރިވުމަށް ދެވެން އޮތް ގޮތަކަށް މިމަހުގެ 24 ވަނަ ދުވަހަށް މާލެ ވަޑައިގަތުމަށް ނިޔާ ވަނީ ގޮވާލައްވާފައެވެ.