ފްރިމިއަރ ލީގަށް ޕްރޮމޯޓްވި ބާންލީއިން މެންޗެސްޓާ ސިޓީގެ ޒުވާން ގޯލްކީޕަރު ޖޭމްސް ޓްރެފޯޑް އެޑްއޮންތަކާއެކު 19 މިލިއަން ޕައުންޑްގެ ހަތަރު އަހަރުގެ އެއްބަސްވުމެއްގެ ދަށުން ސޮއިކޮށްފިއެވެ.

މި އެއްބަސްވުމުގެ ތެރެއިން ސިޓީއަށް 20 ޕަސެންޓް ސޭލް އޮން ކްލޯޒާއި ބައި ބެކް އޮޕްޝަނެއް އޮންނައިރު އެއީ 15 މިލިއަން ޕައުންޑް އަޕް ފްރޮންޓް އަދި ހަތަރު މިލިއަން ޕައުންޑްގެ އެޑް-އޮން އެވެ. އުމުރުން 20 އަހަރުގެ ޓްރެފޯޑް ޕްރިމިއާ ލީގުގައި ނުފެންނައިރު، އޭނާ ވަނީ މިދިޔަ ދެ ސީޒަން ވެސް ލޯނު އުސޫލުން އެކްރިންޓަން އާއި ބޯލްޓަންއާއެކު ހޭދަކޮށްފަ އެވެ.

19 މިލިއަން ޕައުންޑުގެ މި އެއްބަސްވުމުގެ ސަބަބުން ޓްރެފޯޑް ބާންލީގެ އެންމެ އަގުބޮޑު ކުޅުންތެރިޔާއަށް ވާނެއެވެ. މީގެކުރިން އެންމެ އަގުބޮޑު ކުޅުންތެރިންނަކީ 15 މިލިއަން ޕައުންޑަށް ގެނައި ކްރިސް ވުޑާއި ބެން ގިބްސަން އެވެ. އެއީ 2017 ވަނަ އަހަރާއި 2018 ވަނަ އަހަރު ގެނައި ދެ ކުޅުންތެރިންނެވެ.

މި މަހު ކުރިޔަށްދިޔަ 21 އަހަރުން ދަށުގެ ޔޫރޯގެ އެންމެ މޮޅު ކީޕަރަކީ ޓްރެފޯޑެވެ. އޭނާ ކައިރިން މި މުބާރާތުގައި އެންމެ ލަނޑެއްވެސް ވަދެފައެއް ނުވެއެވެ. އެއީ މުބާރާތުގެ ތާރީހުގައިވެސް ރެކޯޑެކެވެ. އޭނާ ވަނީ ފައިނަލް މެޗުގެ ފަހު ވަގުތު ސްޕެއިންގެ އެބެލް ރުއިޒް ޖެހި ޕެނަލްޓީ އެއްވެސް މަތަކޮށްފައެވެ.

ސީޒަނުގެ ފުރަތަމަ މެޗުގައި ބާންލީ ނިކުންނާނީވެސް ސިޓީއާ ދެކޮޅަށެވެ. ބާންލީގެ ކޯޗަކީ ސިޓީގެ ކުރީގެ ކެޕްޓަން ވިންސެންޓް ކޮމްޕެނީ އެވެ.